Жер бетінде анадан артық асыл жан бар ма? Мұны жете ұққан Денисов ауданы «Жұма» мешіті аудан әкімдігімен бірлесе отырып, осындағы «Әлем» мәдениет үйінде жергілікті жердегі ақ жаулықты аналарымызға ілтипат көрсетті.
Салтанатты жағдайда көп балалы 12 анаға «Алғыс хат» тапсырылды. Көрсетілген ерекше құрметке барша аналар қауымы шынайы алғыстарын білдірді.
Сонымен бірге Жітіқара аудандық «Ержан Тәтішев» мешітінде де әжелеріміз бен ақ жаулықты аналарымызға арналып дастархан жайылды.
Жиылған қауымға мешіт имамы Сабыржан Зейнелғабиденұлы алғысын білдіріп тілегін айтты.
Мешіт қызметіне разылығын білдірген 84 жастағы Шұға әжей жиылған аналар қауымының атынан тілегін білдіріп, батасын берді.
ҚМДБ-ның Қостанай облысындағы
өкілдігінің баспасөз қызметі
Есенгелді Әжімахан тегі басқаратын Ұзынкөл аудандық «Балықты» мешітінің қызметкерлері жылда Наурыз айы туғанда осы өңірдегі ардақты аналарға құрмет көрсетуді дәстүрге айналдырған.
Осы сөзіміздің нақты дәлелі ретінде жақында бас имам және аудандағы мешіт жанындағы ақсақалдар алқасының мұрындық болуымен ақ жаулықты апаларымызға сый-құрмет көрсетілді.
Мешіттің асханасында дастархан жайылып, әрбір шаңырақтың ажары болып табылатын ақ жаулықты апаларымызға жылы лебіздер айтылып, өнерпаздар концерт қойды.
Жиналған аналарымызға салтанатты түрде сыйлықтар табыс етілді. Оған Ағайша Бижан сынды жеке кәсіпкерлер демеушілік етті. Оларға деген көпшіліктің алғысы шексіз.
ҚМДБ-ның Қостанай облысындағы
өкілдігінің баспасөз қызметі
Қазақстан мұсылмандары діни басқармасының Қостанай облысындағы өкіл имамы Бақытбек қажы Тәжімбет Нұр-Мүбарак университетіндегі қостанайлық студенттермен кездесті. Негізгі мақсат: биылғы түлектерді жұмысқа шақыру және өзге студенттерді жазғы маусымда аймақ мешіттеріне тәжірибелік жұмыстарға баулу.
Қостанай өңірін қазағы қайнаған Оңтүстік аймақтармен салыстыра алмаймыз. Қызметке кіріскен әуелгі уақытта ислам білімінің артықшылығы жайлы елге жеке-жекелеп тұрып түсіндіргендейміз. Соның нәтижесінде білімге қызығушылығы артқан 10 бала екі айда біраз нәтижеге қол жеткізгені бізді қуанышқа бөледі. Енді оларды көріп тағы оннан аса жастар білім алуға келіп жатыр. Осы арнайы білім беріп жатқан жастар арасында бірнеше бала Нұр-Мүбарак университетіне келуге. Исламтанушы болуға ниеттері бар...
Осылайша қуанышымен бөліскен Бақытбек қажы Тәжімбет болашақта Нұр-Мүбарак университетінің дайындық курсын ашуға ниеттері барын жеткізді. Өйткені, дінді түсінген тұрғындар арасында ислам біліміне деген қызығушылық та арта түскен.
Ал бүгінде Нұр-Мүбарак университетінде Қостанай облысынан барлығы 19 студент білім алуда. Оның бесеуі қыз бала. Алдағы жазда арқалық студенттердің үшеуі бакалавр дәрежесіне ие болу алдында тұр.
«Хаққа қызмет, халыққа қызмет» деген қостанайлық делегация Алла жолында елге қызмет етудің артықшылығы жайлы жан-жақты саралап өтті.
Айша КЕҢЕСБАЙ,
Нұр-Мүбарак университетінің баспасөз қызметі
Қостанай облысының өкіл имамы Бахытбек Тәжімбеттің басшылығымен Қазақстан Мұсылмандары Діни басқармасының 2020 жылға дейінгі білім беруді дамыту тұжырымдамасы негізінде бастау алған сауат ашу курсы бірінші түлектерін шығарып салып, енді міне жалғасын бастап та кетті.
Қазір облыс көлемінен келген 14 шәкірт Қостанай қалалық мешітінде оқуда. Оларға облыстағы білікті діни мамандар сабақ береді. Аталған мерзім ішінде Құранды жете үйреніп, Ақида, Тәжуид және араб тілінен дәріс алады.
Салтанатты рәсімде Қостанай облысы «Марал ишан» мешітінің наиб имамы Икрам Бахытжан білім алушы шәкірттерге сәт сапар тіледі.
ҚМДБ-ның Қостанай облысындағы
өкілдігінің баспасөз қызметі
Жуырда Қостанай облыстық Марал ишан мешітінің наиб имамы Бақытжан қажы Икрам кезекті жүздесуін өткізді.
Бұл жолы ол білім саласында жылда үлкен жетістіктерге ие болып жүрген Сырбай Мәуленов атындағы қазақ гимназиясына ат басын тіреді. Мұндағылар дін қайраткерін жылы жүзбен қарсы алды.
Өз саласының білікті мамандар білім ордасындағы 9-шы сынып оқушыларына жалпы дін туралы мол мағлұмат берді. Өскелең жас ұрпақтың жат ағымдардан аулақ болулары жөнінде өздерінің нақты пікірлерін айтты. Олардың қойған сауалдарына тиянақты жауап берді.
ҚМДБ Қостанай облысы бойынша
өкілдігінің баспасөз қызметі
Үстіміздегі жылы елімізде алғыс айту күні тұңғыш рет өткізілді. Сондықтан бұл мерекеге облыстық Марал ишан мешітінің ұжымы да ерекше көңіл бөлді.
Сол күні аталған мешіттің наиб имамы Бақытжан Икрам мен «Зекет» қорының өңіріміздегі өкілі Жақсылы Ғайсин және жанашыр қажы аталар мен аналар облыстық балалар үйінде болды.
Олар осында тәрбиеленіп жатқан балдырғандарға ең ізгі тілектерін білдіріп, тәттілерін таратып, сол мекемеге кілем табыс етті. Мекемедегі басшылары мен тәрбиешілер жанашыр жандарға шынайы алғыстарын жеткізді.
ҚМДБ Қостанай облысы бойынша
өкілдігінің баспасөз қызметі
Тағылымы мол кеш
Бас мүфти 2016 жылды «Дін және тарих тағылымы» жылы деп жариялады
Қазақстан мұсылмандары діни басқармасының төрағасы, Бас мүфти Ержан қажы Малғажыұлы 2016 жылды «Дін және тарих тағылымы» деп жариялады. Осыған орай Жітіқара аудандық «Ержан Тәтішев» мешітінде қалалық политехникалық колледжінің студентерімен «Дін. Тарих. Мәдениет.» атты кездесу өткізілді.
Жүздесу барысында мешіттің бас имамы Сабыржан Есмурзин қазақ халқының этногенезі мен этникалық тарихын және көшпелі мәдениетінің қалыптасуын баяндап, ислам мәдениетінің игі әсерін түсіндірді.
Бұл басқосуға қатысқан студенттерге мешіттің бас имамы қазақ халқының исламды қабылдау кезеңінің VIII ғасырдың соңы мен IX ғасырдың басынан бастау алатындығын және XII-XIV ғасырларда Қазақстан исламның Ханафи мәзһабының негізгі орталықтарының бірі ретінде танылғандығын түсіндірді.
Кездесу соңында жастар имамға көкейде жүрген сауалдарын қойып, нақты жауап алды.
ҚМДБ Қостанай облысы бойынша
өкілдігінің баспасөз қызметі
Әулиекөл ауданының Құсмұрын елді мекеніндегі УК 161/4 түзету мекемесінде Қостанай облысы «Марал ишан» мешітінің наиб имамдары Мурзаканов Азамат пен Сыздыков Дархан абақтыда отырғандармен кездесіп, ұлы ақын Абай Құнанбайұлының өмір жолы туралы деректі филімін көрсетті.
Сонымен бірге бостандықтан шектелгендермен Құран мен сүнет негізінде «Мұсылманның тұлғалық бейнесі», «Сабырлық», «Әбу Ханифа мазхабының дәлелдемесі» тақырыбында жеке кездесулер өткізді.
ҚМДБ Қостанай облысы бойынша
өкілдігінің баспасөз қызметі
Арқалық қалалық «Мухтасиб Әлмұхаммед» мешітінің бас имамы Бектұрсын Торғайбайұлы «Дінге артылса сенімің, имандылық болар серігің» атты тақырыпта қаладағы медициналық колледждің 1-2 курс студенттерімен кездесу өткізді.
Кездесуде имандылық, ар-ұят, тәртіп пен тазалық жайында мазмұнды насихат айтылды. Әңгіме барысында имам Бектұрсын Торғайбайұлы Ислам діні мен медицинаның қаншалықты тығыз байланысты екендігін, адамның жеке басының гигиенасы жайында да қызықты мәліметтер келтірді.
Теолог маман Әсет Бауыржанұлы студенттерге «Алданған жастар» атты бейне ролик көрсетіп, теріс ағымдар жайлы тұшымды түсінік берді.
Осындай басқосу қаладағы педагогикалық институттың жатақханасында өткізіліп, асыл дініміздің құндылықтары мен халқымыздың тәрбиелік маңызы бар әдеп-ғұрпы жайлы да сөз қозғалды. Тыңдарман жастар көкейде жүрген сауалдарын қойып, өздерінің ой-пікірлерін айтты.
ҚМДБ Қостанай облысы бойынша
өкілдігінің баспасөз қызметі
Лисаков қаласындағы мешітіміздің жанашыры демеушісі «ЖеңісБек» ЖШС нан зауыты ерекше қайырымдылық сауап істі қолға алып отыр. Олар әр дүйсенбі, сәрсенбі, жұма күндері халыққа елу данадан тегін нан таратуды қолға алған.
Ұжым басшысы Сандыбаева Гүлім айтуынша бұл шара «Нан» және «Леал» дүкендерінде таңертеңнен басталады. Алғашқыда көпшілігі таң қалыспен қарап жүрді. Ал қазір адамдар ертемен келіп алатын болған. Сонымен бірге бұл ұжым өз қызметкерлерлеріне нанды елу пайыз жеңілдікпен береді.
Жалпы Гүлім Сәндібекқызы қаладағы барлық іс – шараларға белсене ат салысып қатысып отырады. Мұндай сауапты істі халық тарапы жылы қабылдап, рахмет айтуда. Жақсылықта жарысатын осындай азаматтарымыз көп болсын деп тілейміз.
Лисаков «Әс-Сәләм» мешітінің бас имамы
Рахым Серік Темірбекұлы
Миләди
Хижри
