Нұр-Мүбарак университетінің жанынан жаңа ашылған дайындық курсы 1 қыркүйектен бастап келесі 2015-2016 оқу жылына оқуға талапкерлер қабылдайды.

Оқу мерзімі - кемі 8 ай. Осы мерзімде Құран Кәрім, араб тілі, ислам фиқһы, ақида пәндері бойынша жүйелі түрде сабақ жүргізіледі.

Сабақты университет бітіріп келген білікті мамандар жүргізеді. Дайындық курсына жасы 30-ға толмаған ислам жолымен жүретін талапты, қабілетті жастар іріктеліп алынады.

Талапкерлерге тегін жатақхана, асхана мен қамтамасыз етіледі.

Дайындық курсына түсуші талапкерлерден құжаттар екі кезеңмен қабылданады; 1-ші кезең 20 тамыз бен мен 1 қыркүйек аралығында құжаттар қабылданып, 2-5 қыркүйек аралығында сұхбат өткізіледі. 2-ші кезең 20 қыркүйектен бастап 1 қазан аралығында құжаттар қабылданып, 1-5 қазан аралығында сұхбат өткізіледі.

Керекті құжаттар:

- Өтініш;

- Аттестат немесе диплом (түпнұсқа);

- 3x4 мөлшердегі 6 фотосурет;

- 086-У үлгісіндегі медициналық анықтама+ флирография снимок;

- Жеке куәлік көшірмесі.

Сондай-ақ, Исламтану мамандығына түсетіндер үшін Наркологиялық, психотерапиялық диспансерден анықтама және сотталмағандығы туралы куәлік талап етіледі.

Тағылым

Жүйріктен жүйрік озар жарысқанда

Облыстық дін тақырыбына арналған ақындар айтысы мен мүшәйрасынан

Баршаға мәлім, Қазақстан мұсылмандары діни басқармасының төрағасы, Бас мүфти Ержан қажы Маямеров үстіміздегі жылды „Дін және дәстүр жылы„ деп жариялағаны белгілі. Бұл бастама қостанайлықтардың тарапынан да үлкен қолдау тапты.

Жуырда ғана облыстық Марал ишан мешіті, Қазақстан қажылар қауымдастығының өңірдегі филиалы және „Зекет„ қорының осындағы өкілдігінің тікелей ұйымдастыруымен кейінгі жастарға танымдық-тағылымдық жағы мол үлкен мәдени шара болып өтті.

Бұл Ілияс Омаров атындағы облыстық қазақ драма театрының концерт залында өткен марқұм, белгілі журналист Еренғайып қожа Әбдіхалықұлы атындағы облыстық ақындар айтысы мен мүшәйра еді.

Аталған шараның өтуіне „Нұр-Қазақстан„ қажылық компаниясының президенті Амангелді Еренғайыпұлы тікелей демеушілік етті. Театрдың концерт залына мұсылман қауымы көп жиналды. Салтанатты Қазақстан Республикасының мәдениет қайраткері, көрнекті ақын Ақылбек Шаяхмет ашып, құрметті қонақтармен таныстырды.

Алғашқы сөзді Қазақстан мұсылмандары діни басқармасының Қостанай облысындағы өкіл имамы Асылхан қажы Түсіпбек алып, ол өңірде де Ислам дінін өркендетуге байланысты атқарылып жатқан игі жұмыстарға қысқаша тоқталып өтті. Осы басқосудың мәні мен мазмұны жайлы айтты.

Дініміздің ел бірлігі мен татулығын нығайтуда да алатын орны жайлы да тілге тиек етті. Ұйымдастырушылардың ұсыныс-тілегін „Нұр-Қазақстан„ қажылық компаниясының басшысы Амангелді Әбдіхалық бірден қолдап, бүгін өзі де арнайы келіп отырғандығын баяндады.

Содан кейін Қазақстан қажылар қауымдастығының Қостанай облысындағы филиалының төрағасы, қадірменді ақсақал Жақсылық Ғайсин айтулы қаламгер, кезінде Амангелді аудандық газетінің бас редакторы болып ұзақ жылдар бойы жемісті қызмет атқарған Еренғайып Әбдіхалықұлының азаматтық қырлары мен қайраткерлігіне, артында қалдырған бай рухани мұрасына тоқталды.

Сондай-ақ Қазақстан Жазушылар Одағының мүшесі, „Құрметті қажы„ алтын медалінің иегері Жолбарыс қажы Баязид Еренғайып ағамызға арнау өлеңін көпшілік алдында оқып берді.

Әділқазылар алқасына елімізге кеңінен танымал қаламгер Ақылбек Шаяхмет төрағалық етті. Оның құрамында Социалистік Еңбек Ері Кәмшат қажы Дөненбаева, Қазақстанның халық ақыны Әсия Беркенова, көпшілікке есімі белгілі, Қазақстанның Жазушылар Одағының мүшесі Нағашыбай Мұқатов, дарынды айтыс ақыны Айбек Қалиев және басқа да азаматтар болды.

Айтыс пен мүшәйраға негізінен дін және дәстүр тақырыбы арқау болды. Оған бес жұп айтыс ақындары және бірнеше жазба ақындары қатысып, өздерінің бақтарын сынады.

Айтыс десе делебесі қозбайтын қазақ бар ма? Залға жиналған жұртшылық айтыс ақындары шыққан кездері оларға деген ризашылықтарын қайта-қайта қол шапалақтауларымен білдіріп отырды.

„Жүзден жүйрік, мыңнан тұлпар„ демекші, айтыс барысында бірінші орынды Батырлан Сағынтай, екінші орынды Мамай Ізтілеу, үшінші орынды Бағила Балмышевалар иеленді.

Ал жыр мүшәйрасында бірінші, екінші және үшінші орындарды Әскерхан Ақтай, Асылан Қанғожин және Байбатыр Ахметбектер жеңіп алды. Сондай-ақ Абай Қажи, Нұрболат Мешітбаев және Абылай Маудановтар да өздерінің тынымсыз ізденісте екендіктерін танытты.

Осы басқосу барысында мен аталмыш ақындар айтысы мен мүшәйраға қолдау көрсеткен „Нұр-Қазақстан„ қажылық компаниясының президенті Амангелді Еренғайыпұлын да әңгімеге тартқанымда ол:

- Бүгінгі кешті ұйымдастырушыларға алғысым шексіз. Бұл орайда облыстық Марал ишан мешітінің бас имамы Асылхан қажы Түсіпбекке, Қазақстан қажылар қауымдастығы облыстық филиалының төрағасы Жақсылық Ғайсинге және басқа да белсене атсалысқан бауырларымызға тек Алланың нұры жауа берсін! - деді. Осы айтыс пен мүшәйраға тәнті болған жерлестеріміздің арасынан Ұзынкөл ауданының бас имамы Есенгелді қажы Әжімахантегіден өзінің пікірін білдіруін сұрағанымызда былай деді:

- Бас мүфти үстіміздегі жылды „Дін және дәстүр жылы„ деп жариялағаны көпшілікке аян. Бүгін де ол қостанайлықтардың тарапанын қолдау тауып, жерлестеріміз үлкен рухани ләззатқа бөленді. Облыстық Марал ишан мешіті және басқа да ұйымдастырушылар шараға жан-жақты әзірлік жасағаны көрініп тұр. Кеш барысында облысқа белгілі өнер жұлдыздары Талғат Молдағалиев, Азамат Мұқатов, Түлкібек Рысмағамбетовтер асқақтата ән шырқап, басқосудың ажарын аша түсті.

Байқаудың соңында өнер ордасының киелі сахнасына Қазақстан Жазушылар Одағының мүшесі, әділқазылар алқасының төрағасы Ақылбек Шаяхмет, Қазақстанның халық ақыны Әсия Беркеновалар көтеріліп, жеңімпаздар мен таланттарымен дараланған жүйріктерге ақшалай сыйлықтар мен дипломдарды табыс етті. Осынау басқосуға республикалық „Иман„ журналының бас редакторы, Қазақстанның құрметті журналисі Оңғар қажы Өмірбек және басқа да бірқатар азаматтар қонақ ретінде қатысты.

Сонымен қатар өнер додасына демеушілік еткен Амангелді Әбдіхалық ғұмырлары бүкіл қазақ елі жұртшылығына өнеге Социалистік Еңбек Ері Кәмшат Дөненбаева, Жақсылық Ғайсин және қадірменді ақсақалға „Нұр-Қазақстан„ қажылық компаниясы тағайындаған „Құрметті қажы„ алтын медалін салтанатты түрде тапсырды.

Қысқасы, бұл ғибраттық жағы өте мол әрі ұмытылмас кеш болды. Жиналған жұртшылықтың жүздерінен ұйымдастырушыларға деген шынайы ризашылық айқын сезілді. Оразалы Жақсанов

Кеншілер қаласындағы өткен спорт жарыстары

Қасиетті рамазан айы аяқталысымен Рудный қалалық «Нұр» мешіті әдеттегідей жамағат арасында спорт ойындарын ұйымдастырды. «Тәні саудың – жаны сау» - дейді дана халқымыз. Дені сау болған адамның құлшылыққа деген құлшынысы бекем болатыны белгілі. Спорт – денсаулық кепілі. «Әлсіз мұсылманға қарағанда әлді (денсаулығы мығым) мұсылман Аллаһқа анағұрлым ұнамды» екені Пайғамбарымыздың (с.ғ.с.) хадистерінде де ашық айтылған. Кеншілер қаласында өткізілген спорт түрлеріне қысқаша тоқталсақ:

1) Арқан-тартыс (үш команда қатысты) 2) Гір көтеру (16 кг) 3) Қол күрес 4) Суда жүзу сайыстары (200 және 100 метр бойынша) 5) Жүгіру сайыстары 2000 метр

Аталған сайыстар бойынша арқан-тартыстан («Жамағат», «Ислам», «Нұр мешіт») командалары бағын сынады. Тартысты бәсекеде жеңіске жеткен «Нұр мешіт» командасы.

Гір көтеруден кіл мықтының ішінен суырылып шыққан Өмірзақов 16 кг 60 рет көтеріп бірінші орынға ие болды.

Қол күрес сайысы өте тартысты өтті, ақ білектің күшімен барлығын таза жеңген тағы да Жандос Өмірзақов бауырымыз.

Қаламыздағы «Горняк» спорт кешенінде 25 метрлік бассейінде суда жүзуден 200 метр қашықтыққа таласқан жамағат арасында 1-ші орынға ие болған Мұрагер бауырымыз алдына жан салмады, онымен ілесе жүзген мешіт қызметкері наиб имам Хасенов Саят барын салып 2-ші орынға ие болды, 3-ші орынды қанжығасына байлаған Қостанай облыстық орталық мешіттің наиб имамы, қонағымыз Дархан Сыздыков болатын.

Жарыс ойдағыдай өтіп, спортшыларға сыйлық ретінде грамота, медаль, уағыз-насихат дискілері мен Бас мүфтиіміздің «Дін мен дәстүр» атты кітабы табысталды. Марапаттарды арнайы табыстаған мешітіміздің бас имамы Сейіт қажы Темірбекұлы мен наиб имам Абзал Сұлтанғалиұлы. Сол жерде Сейіт қажы Темірбекұлы спорт ойындарына қатысқандарға салауатты өмір салтын ұстану жайында уағыз айтып, болашақта футбол және т.б. осындай іс-шаралар жалғасын табатынын тілге тиек етті.

Асыл дінімізде білім алу, ғылым меңгеру жоғары бағаланады. Ай асып, жыл санап еліміздің әр түкпірінен бой көрсетіп келе жатқан мешіт мұнаралары мен намазға жиылған жұртшылықтың қарасынан халықтың дінге деген ықыласы мен ынтасының артқанын байқауға болады.

Осы орайда білікті имамдар әлі күнге тапшы екені, ал дін мамандықтарына зәру екеніміз жасырын емес. Бұл ретте Қазақстан мұсылмандары діни басқармасы тарапынан өңірлерде ашылып жатқан медресе, діни оқу орындары қал-қадерінше халыққа қызмет етіп, болашақ имамдарды даярлау ісін үздіксіз жүргізіп келеді. Бұған қоса Түркияның «Хасеки» имамдардың білімін жетілдіру институтымен үлкен келісімшартқа қол жеткізіп, бүгінде онда Қазақстаннан барған дін мамандарының алғашқы легі білім алуда. Ал, Мысырдағы тамыры терең «әл-Әзһар» университетінде жыл сайын еліміздің үздік түлектері ілім алуға аттануда. Бүгінде онда білімін шыңдаған алғашқы буын Қазақ елінің руханиятына өзіндік үлесін қосып, қызмет етуде.

Бүгін дін ілімінің алғашқы шаңырағы – елордамыздағы «Астана» медресесінде жаңа оқу жылына шәкірттерді қабылдау емтиханы өткізілді. Мәні терең емтиханда Қазақстан мұсылмандары діни басқармасының Шариғат және пәтуа бөлімінің меңгерушісі Сансызбай Шоқанов, Оқу-ағарту бөлімінің меңгерушісі Бақтыбай Бейсенбаев бастаған білімі терең ұстаздар шәкірттердің білім деңгейін шарықтап, деңгейлерін анықтады. Шәкірттермен сұхбат жүргізіп, түрлі сауалдар қойды. Бұған қоса қазақ тілі және Қазақстан тарихы пәндері бойынша ЖОО арнайы оқытушы-профессорларының қатысуымен тест те жүргізілді.

Бүгінде дінге бет бұрып, құбыласын тани бастаған жастарымыздың кейбірі теріс пиғылды ағымдардың шырмауығына ілігіп қалып жатады. Жаңылысқан жастарымыздың басым бөлігі орыс тілді жеткіншектер екенін бүгінде көз көріп, құлақ естіп жүр. Осы жайды жөнге салу мақсатында биыл ҚМДБ тарапынан орыс тілді уағыз-насихатты жандандыру мақсатында тың жобалар әзірленген болатын. Республикалық, жергілікті қазақ және орыс тілді Ақпараттық-насихат топтары құрылып, өңірлерде дін насихатын жүргізді. Биылғы медресе шаңырағында орыс тілді топтар да осы мақсатта ашылып, бүгінгі өткен қабылдау емтиханында жалпы саны 52 шәкірт бақтарын сынап, 47-сі медресе шәкірті атанды. Оның 34-і қазақ тобына түссе, 13 бала орыс тобында үш жыл ілім игеруге мүмкіндік алды.

Қазақстан мұсылмандары діни басқармасы төрағасының орынбасары, наиб мүфти Серікбай қажы Ораз еліміздегі қарилар орталығының жетекшілерімен кездесті.

Басқосуда шәкірттерді қысқа мерзімде Құранды толық жаттауға үйрету, мешіттерде Құран хатым етуге дайындау, жұмыс тәртібі, болашақ қарилардың жан-жақты білімін арттыру, т.б. мәселелер талқыланды.

«Қариларды өзімізден шығару үшін ең алдымен осы орталықтардың жұмысын жетілдіруіміз қажет. Шәкірттерді Отанды сүюге тәрбиелеу, оларға адамгершілік құндылықтарды үйрету – баршамыздың ортақ мақсатымыз», – деді Серікбай қажы Ораз.

Еліміз бойынша 4 қарилар орталығы бар. Онда 150-ден астам шәкірттер Құран жаттауда.

muftyat.kz

Аллаға шүкір, айлардың сұлтаны - Рамазанды аман-есен, құлшылықпен өткіздік. Жаратушы Иеміз дұға-тілектерімізді, қасиетті айдағы әрбір ізгі істер мен сауапты амалдарымызды, пітір-садақаларымызды Өз құзырында қайырымен қабыл еткей!

Иманмен өмір сүрейік

Рамазан - рухани жаңару айы. Пенде осы айда игі амалдары арқылы Жаратушыға жақындай түседі. Адамның бойында Алладан қорқу, тақуалық сипат көрініс табады. Рамазан - 11 айға рухани азық жинауға берілген үлкен мүмкіндік, шексіз нығмет. Құл ораза ұстау арқылы жаны мен тәніне рухани қуат алады. Халқымыз Рамазан бойы жақсылықтарға ұмтылып, барынша сауап алуға тырысып, екі дүние бақыты үшін берілген мол мүмкіндіктер мезгілін Құдайға құл, сүйікті Пайғамбарымызға үмбет болумен өткізді.

Алайда кейбір бауырларымыз білместікпен Рамазаннан кейінгі айларда босаңсып, баяғы әдетіне салып, қателіктер мен асыл дініміз Ислам құптамайтын іс-әрекет пен қылыққа барып жатады. Рамазаннан кейін өзін тастап қоятын, құлшылықтарға мән бермейтін адамдарды байқаған бір ғалым: «Сендер сонда Рамазанда ғана мұсылмансыңдар ма?» - деп ашына сұрақ қойған екен. Иә, осы бір сұрақ баршамызды толғандыруы тиіс.

Ұдайы Құран оқып, оны көңілге тоқып жүрсек...

Біз осы айда барынша Құранға ден қойдық. Алланың қасиетті сөзін бірнеше рет қайталап, хатым еткендер де бар. Тым болмаса мағынасын түсіну үшін Құранға үңілгендер де жоқ емес.

Пайғамбарымыз Мұхаммед бір хадисінде: «Алла Тағаланың алдында ең қайырлы амал - аз да болса үнемі қайталанып, жасалатын игі амал», - деген. Үнемі Құранды оқып, оны көңілге тоқып жүру - пендені жақсылыққа жетелейді. Өйткені, Алла Елшісі өсиетті сөзінде: «Сендердің жақсыларың - Құранды үйреніп, оны өзгелерге үйреткендерің», - деп сауапты амалдың сансыз пайдалары мен игіліктерін атап көрсеткен. Құран - екі дүниенің жақсылығына кенелудің кілті. Адамның өмір сүру үлгісі мен жүйесі көрсетілген қасиетті Құранға ұдайы көңіл бөлмеуіміз - үлкен қателік, орны толмас өкініш.

Алла үйіндегі игі амалдың сауабы

Ақ жаулықты аналарымыз, батагөй ата-ағаларымыз, жалындаған жастарымыз Рамазан айында намазды мүмкіндігінше мешіттерімізде өтеді. Үйде оқыған намазбен салыстырғанда, Алла үйінде өтелген парыздың сауабы еселеніп жазылатынын баршамыз жақсы білеміз. Мұсылман 25 есе сауап жинайды. Әбу Һұрайра риуаят еткен хадисте Пайғамбар: «Жамағат намазы біреуіңнің жалғыз оқыған намазынан жиырма бес есе артық және таң намазына түнгі періштелер мен күндізгі періштелер жиналады», - деген. Тағы бір хадисте: «Егер бұл екі намазда (таң мен құптан) қандай сауап барын білсе еді, мешітке еңбектеп болса да жетер еді», - деп, мешітте намаз оқудың сауабының қаншалық көп екенін үмбетіне жеткізген.

Намазды мешітте оқу пенденің пейілін жақсартады, уақыты жүйеленіп, өмірі ізгілікке толы болмақ. Мешіт - мұсылмандарды, жалпы жамағатты біріктіретін, ауызбіршілігін нығайтатын, адамдар арасында мейірім, қайырым сезімдерін оятатын рухани орда. Рамазаннан кейінгі уақыттарда да мүмкіндігінше мешітте жамағатпен оқылатын намаздарға қатысқанымыз абзал.

Қайырымдылық жалғасын тапса...

Рамазан - қайырым мен мейірім айы. Аузы берік адам бұл айда күнделікті азығына, ас-тамағына ақшасы жетпейтін кедей-кепшіктің жағдайына түсіп, олардың хәлін мейлінше түсінеді. «Тамағы тоқтық, жұмысы жоқтық, аздырар адам баласын», - деп хәкім Абай дөп басқан емес пе?! «Аш бала тоқ баламен ойнамайды, тоқ бала аш болам деп ойламайды», - деген қазақтың қанатты сөзінде де ғибрат мол. Рамазан - барша адамзатты жақындастыратын ай. Бай мен кедейді, патша мен пақырды теңестіретін ораза адамдарды Алла алдында бірдей екенін сезіндіреді. Аш адамның хәлін түсінген халқымыз, бауырларымыз, аға-әпкелеріміз Рамазан айында оларға садақасы мен азық-түліктерін үлестірді. Осы қайырымды іс басқа кезде де жүйелі түрде өз жалғасын тауып отырса, Алла алдында қайырлы амал болмақ.

Алла тағала баршамыздың екі дүниеде де жүзімізді жарық еткей! Рамазан бойы жасалған құлшылық, дұға-тілектеріміз қабыл болғай! Еліміз аман, жұртымыз тыныш болуын Жаратушы Иемізден тілейміз. Рамазаннан рамазанға дейін тақуалығымызды жалғастырып, амандықпен, имандылықпен, жақсы-лықпен жете берейік! Мұратымыз асыл, иманымыз кәміл болғай! Әумин!

Muftiyat.kz

Алла Елшісі (оған Алланың иігілі мен сәлемі болсын) былай деген:

«Бұл менің Үмметім, мейірім шуағы түскен менің Үмметім. Оларға ақыретте жаза жоқ, бірақ осы өмірде бүліктер арқылы, жоқшылық пен өлім арқылы жаза беріледі». (Әбу Дәуд)

Ойтолғау: Бұл деген сөз, біздің осы өмірдегі қиыншылықтарымыз – Алланың мейірімі. Қасиетті Құранда былай деген: «...Соңғы табыс тақуалардікі»,-деді»(Аъраф сүресі, 128 аят)

Иман еткендер ешқашанда жеңіліске ұшырамайды. Сондықтан да жаңалықтар мен Youtube- тағы небір бейнетаспаларды көріп алып қатты қайғыға салынбаңыздар. Лағынет шайтан сіздерді жағдайдан хабардар болсын деп көресің деп алдауы мүмкін, алайда оның түпкі мақсаты- бұл үмметке жететін Алланың мейірімінен түбегейлі күдер үзбейінше сізге әлсіздікті сездіріп, күйзелтіп, жабырқату.

Басқа жеткен қиыншылықтардан сабақ алыңыздар да жаралы жанға шипа болар Сүннетке қайтыңыздар. Мәселен, жүректеріңіз бен ойларыңызды емдеу үшін жоғарыдағы келтірілген хадисті еске алыңыздар.

Тағы да қайталаймын: «Иман еткендер ешқашанда жеңіліске ұшырмайды!»

Тіпті қысымшылық заманы бастарыңызға келсе де Алланың заңынан аттап қоймау үшін тақуалықты басшылыққа алыңыздар. Тіпті бізді езгінің астына алса да Алла қаласа жеңіс біздікі болады, яғни соңғы табыс біздікі! Сүннетке амал етудің әрбір дертке дауасы барын ұмытпайық.

Ресей мұсылман жастары одағының бастамасымен әлемде алғаш рет мұсылмандардың онлайн-фестивалі өтпек. 30 мыңға жуық адамның басын қосатын ауқымды шара 1- 15 тамыз аралығына жоспарлануда. Жиын барысында әлемнің түкпір-түпкірінен арнайы шақыртылған 30 шақты спикер фестиваль қатысушыларына онлайн режимінде қызмет ететін болады.

"Шараның мақсаты - әлемдегі жетекші мұсылман қайраткерлерінің баяндамалары арқылы халықты ақпараттандыру. Фестивальға Сирия, Австралия, БАӘ және басқа да елдердің өкілдері қатысады" деп хабарлайды Ресей мұсылман жастары одағының президенті Марсель Сабиров.

Ислам жайлы білгісі келетін кез-келген дін өкіліне фестивальдің есігі айқара ашық. "Біз арнайы діни білімі жоқ адамдардың ислам жайлы базалық көзқарасы қалыптасса дейміз", - деген ұйымдастырушылар онлайн-фестивальға қатысушыларды http://online-islam.ru сайтына тіркелуге шақырады.

Бұл фестивальдің бұрнағылардан артықшылығы әлемнің 15 тілінде онлайн режимінде өтуі, қаржының аз жұмсалуы. Сонымен бірге, барлық баяндамалардың ғаламтор бетінде сақталуы да жиынның артықшылықтарына жатады.

E-islam.kz