Қостанай өңірінде ардақты ақсақал Мираш Тәшетовтың есімі ерекше құрметпен аталады. Оның имандылық, адамгершілік, қайырымдылық мақсатындағы сіңіріп жатқан еңбегі ауыз толтырып айтарлықтай.

Өмірдің талай асуларынан өткен қажы қандай сияпатқа да лайықты. Таяуда Арқалық шаһарында тұратын Мираш Тәшетұлының ғұмырында ұмытылмастай оқиға орын алды.

Ел қадірлісі «Жарты ай және Жұлдыз» («Полумесяц и Звезда») бірінші дәрежелі Халықаралық Орденімен марапатталды. Осынау беделді орденға осы уақытқа дейін әлемде санаулы ғана мемлекеттік, саяси және қоғам қайраткерлері ие болған еді.

Олардың қатарында Әзірбайжанның, Тәжікстанның Президенттері Ильхам Әлиев, Эмомали Рахмонов, Дағыстан Республикасының басшысы Рамазан Абдулатипов және басқалар бар.

Арқалық қаласындағы салтанатқа аталмыш награданы тапсыру үшін Біріккен Ұлттар Ұйымының жанындағы адам Құқығын Қорғау жөніндегі Халықаралық Комитеті Бақылау Кеңесінің мүшесі, академик, генерал-лейтенант Анвар Ниезов арнайы келді.

Ол жиналған жұртшылық алдында ардақты ақсақалдың кеудесіне Орденді тағып, куәлік пен марапат кітапшасын тапсырды.

Біз де Мираш қажы Тәшетовты осынау жоғары наградасымен шын жүректен құттықтап, оған алдағы уақытта да мықты денсаулық, отбасына бақыт тілейміз.

О. Жабайтегі

Имандылықтың ордасындай болған Оңтүстік Қазақстан облысы тағы бір жаңа мешітпен толықты. Сарығаш ауданының «Жаңа тіршілік» ауылында бой көтерген мешітте бір мезгілде 300 адам құлшылық жасай алады.

Мешіттің ашылу салтанатына ҚМДБ төрағасы, Бас мүфти Ержан қажы Малғажыұлы қатысып, өз ризашылығын білдіріп, ізгі тілегін жолдады. Сондай-ақ Бас Мүфти қасиетті Құран Кәрімді сыйға тартты. ҚМДБ төрағасының орынбасары, наиб мүфти, «Әзірет Сұлтан» мешітінің Бас имамы Серікбай қажы Сатыбалдыұлының бастамасымен салынған «Ақмола» мешітінде бүгін алғаш рет азан шақырылып, намаз оқылды.

Әбу Аюбтан (оған Алла разы болсын) жеткен хадисте, егер кімде кім Рамазанның оразасын аяқтаған сон Шәууәл айында алты күн ораза тұтса, бір жыл ораза ұстағанмен тең болады делінеді.

Бұл Алла Тағаланың бізге берген ұлы Мейірімі. Аз ғана амал жасап, он есе сауап алу – жақсы табыс көзі және керемет келісім.

Осыған орай, бізге осы айдағы оразаны қалай ұстау керек: үзіліссіз бе әлде арасында үзіліс жасап па, Рамазандағы қарыздарды өтегеннен соң ба әлде өтемес бұрын ба, қай күндері, қай уақытта деген толассыз сұрақтар келіп түсуде.

Сол себепті біз Шәууәл айындағы оразаға қатысты жиі қойылатын сұрақтарға жауап беруді ұйғардық:

1. Ханафи мәзһабы бойынша Шәууәл айының оразасын Рамазан айының қазасын өтемес бұрын ұстауға рұқсат етілген.

Әйелдер, сапардағылар мен Рамазан айында сырқаттанып я болмаса белгілі себептермен әрі себепсіз оразасын қаза қылғандар Рамазандағы қарыз оразаны келесі Рамазанға дейін міндетті түрде өтеу шартымен Шәууәл айында ораза тұта алады.

Алайда, егер бірінші Рамазан айындағы қазаны толтырып, артынан Шәууәл айының алты күнін ұстау ұнамды амал болып табылады.

Соған қарамастан, егер адам үлгермей жатса немесе Шәууәл айы аяқталғанша алты күнді ұстай алмай қаламын деп қауіптенсе, керісінше де жасауға болады

2. Шәууәл айындағы ораза тек Шәууәл айында ғана ұсталады. Егер кімде кім ай аяқталғанша ұстап үлгермесе, күнә болып саналмайды, себебі бұл ораза парыз етілмеген. Шәууәл айының оразасын Ораза Айт мейрамының бірінші күні өткен соң ұстай беруге болады.

Яғни, Шәууәл айының екінші жұлдызынан бастап Рамазан айының қазасын өтеп, одан әрі Шәууәл айының нәпіл оразасын ұстауға болады.

3. Рамазан айында мүлде ораза тұтпаған жандар парыз оразаны себепсіз қалдырған болса да, Шәууәл айының оразасын ұстай алады. Алайда, олар бір жылдық ораза тұтқанның сауабын ала алмайды. Себебі ондай сауапты алу үшін, хадисте келгендей, парыз болған оразаны міндетті түрде ұстауы қажет. Соған қарамастан, Алла қаласа, олар Шәууәл айындағы алты күндік оразаның сауабын алады.

Дегенмен, олар үшін Рамазандағы қазаның орнын толықтыру хайырлы. Себебі парызды қалдырып қою Алланың алдында үлкен күнә болып саналады.

4. Шәууәл айының алты күнін үзбей ұстауға да, арасында үзіліс жасап ұстауға да болады. Егер бір күн қоспаса, жұма күндері ораза тұтуға болмайды. Мысалы: бейсенбі- жұма немесе жұма- сенбі. Егер осындай етіп ұстар болса, жұма күні ораза тұтуға рұқсат.

Егер Рамазан айында ешқандай қазасы болмаған жандар болса, Шәууәл айының оразасын дүйсенбі және бейсенбі күндері ұсталатын сүннет оразасы күндері ауыз бекітуіне болады. Алайда, бұл бір жолы ғана. Шәууәл айының қосымша оразасын қай күні ұстау әр адамның жеке басының ісі.

5. Шәууәл айындағы ораза мен Рамазан айындағы ораза, сондай - ақ, өзге айлардағы тұтылатын оразалардың барлығы таңнан кешке дейін ұсталады.

Таң намазы мен ақшам намазының уақыттары қай кезде кіретінін білу үшін сайтымыздағы "Намаз уақыты және құбыла" айдарына кіріп, өз қалаңызды таңдап, сол жерден анықтай аласыз.

Таң намазы – ауыз бекітер уақыттың басталуы. Бұл деген сөз, сәресі ішуді және оразаны бұзатын амалдарды (ерлі- зайыптыларға жыныстық қатынасты, тіс тазалау барысында тіс пастасы жұтып қою, тағы басқа ) тоқтату қажет деген сөз.Рамазан айындағы оразаны бұзатын амалдырдың барлығы да кез келген оразаны да бұзады.

Ақшам намазының уақыты – ауыз ашатын уақыт. Күн ұясына бата салысымен мұсылман адам оразада тыйым салынған амалдарды жасауына болады.

Алла Тағала баршамыздың оразамызды қабыл алып, екі ғұмырда да сауапқа кенелтсін!

_______________

Azan.kz

Биылғы жылы Қасиетті Рамазан айында Қарасу ауыл тұрғындары үшін ерекше ай болды. Ауылымызда намазхана ашылғаннан бері Ораза ұстаушы жамағаттың қатары көбеюде. Тарауих намазына, жұма намазына келушілер де арта түсті.

Рамазан айының соңына таман ауылымыздан шыққан белгілі кәсіпкер, қазіргі уақытта Арқалық қаласында тұратын Нұрлан Омаров атты бауырымыз намазханамызға киім ілетін орны бар кітап сөресін, компьютер үстелін, жамағатқа арнайы дөңгелек үстелдерін сыйға тартты.

Осындай ауыл тұрғындарының жүрегі жомарт ағамызға алғысы шексіз. Алла Тағала Нұрлан бауырымыздың отбасына амандық, деніне саулық берсін! Келесі жылғы Рамазан айына аман-есен жетуді Алла Тағала нәсіп еткей!

ҚМДБ-ның Қостанай облысындағы өкілдігінің баспасөз қызметі

Қостанай облыстық «Марал ишан» мешітінде тарауих намазы аяқталып, жамағат Құран хатым батасына қатысты. Отыз күн оразасын ұстаған Қостанай жұртшылығын тарауих намазына ұйытып, қасиетті Құран Кәрімді басынан-аяғына дейін оқып шыққан қариымыз Рамазанның 29-жұлдызында осы бір абыройлы да сауапты істі соңына жеткізді.

Қостанай облыстық «Марал ишан» мешітінің бас имамы Асылхан қажы Мұханбетжанұлы қасиетті Құран Кәрімнің хатым батасын жасап, Жаратушы Хақтан еліміз бен жеріміздің тыныштығын тілеп, дұға қылды.

Құран хатым батасынан соң жиылған жамағат алдында отыз күн бойы имамдық етіп, Құран хатым етуге қатысқан қариға құрмет көрсетіліп, қазақы дәстүрімізге сай иығына шапан жауып, алғысын білдірді. Естеріңізге сала кетейік, биыл облыстық «Марал ишан» мешітінде тарауих намаздарына имамдыққа Мұхаммад Иқбал есімді Тәжікстандық азамат тағайындалып, Құран хатым еткен болатын.

Зекет– Ислам дінінде намаздан кейін орын алатын бес парыздың бірі. Өйткені, ол Құранның жиырма жеті жерінде намазбен қатар қайталанған. Зекет һижреттің екінші жылы Рамазан оразасынан кейін Шәууәл айында парыз етілді. Зекеттің парыздығы Құран, Сүннет, Иджмағпен дәлелденген.

Зекет беру - бес парыздың бірі

Хадисте Пайғамбарымыз Мұхаммед (с.ғ.с.): «Байлықтарыңды зекет беру арқылы қорғаңдар, дерттеріңді садақа берумен емдеңдер, түрлі қауіп-қатерлеріңді дұға арқылы қайтарыңдар»,-деген.

ҚМДБ Зекет қоры – Зекет және қайырымдылық садақаларыңызды қабылдап, оны шариғат үкімдеріне сай таратуды жүзеге асырады.

Мақсаты:

Шын мәнінде садақалар (зекеттер), кедей - кепшіктерге, түгі жоқ міскіндерге, көңілдері жібітілуі мақсат етілгендерге (жаңа мұсылмандарға), құлдарды азат етуге, қарызға батқандарға, Аллаһ жолында және қиналған жолаушыларға, зекет жинауға тағайындалған адамдарға берілуі Аллаһ тарапынан парыз етілген. Сондай-ақ діни оқу орындарындағы студенттерге шәкіртақы тағайындау, заман ағымына сай оқу орындарының құрылысын салу, әрі оларды жабдықтауды қамтамасыз ету, Ислам дінінің лайықты түрде насихатталуына және өзін-өзі қаржылай қамтамасыз ете алмайтын ауыл мешіттеріндегі дін қызметкерлеріне қаржылай қолдау көрсету.

Басты ұстанымы:

Шариғатқа (Ханафи мәзһабы бойынша) сәйкестік, халыққа ашықтық және ресмилік.

ҚМДБ Зекет қоры:

Исламның басты бес парызының бірі - зекет ғибадаты туралы көпшілік жамағат арасында толық ақпарат әлі де жеткіліксіз болғандықтан, көбіне міндетті парыз емес, қосымша қайырымдылық деп түсініп, садақамен шатастыратындар бар.

Зекеттің шариғаттағы терминдік мағынасы, «Нисап» көлеміне жететін байлыққа ие болған мұсылманның байлығының белгілі бір бөлігін, жылына бір рет Аллаһ тағаланың ризалығы үшін белгіленген шараларға жұмсау.

Зекет парыз болуы үшін күнделікті тіршілікте қолданылатын негізгі қажеттер мен қарыздардан тыс, нисап көлеміне жеткен қаражатқа, не байлыққа ие болуы керек.

Нисап дегеніміз - зекетті парыз ететін белгілі табыс мөлшері.

Зекет ғибадаты адамды кішіпейілділікке, жомарттыққа және кеңпейілділік сияқты жақсы сипаттарға тәрбиелеп баулиды. Сондай-ақ пәле жаладан, апаттан, ауру-сырқаудан сақтайды да, байлықтың құрып кетуіне тосқауыл болып, берекесін арттырады. Сонымен қатар қоғамдағы ұрлық - қарлық, алдау-арбау, адам тонау, кісі өлтіру сияқты жаман әдеттердің кеңінен жайылуына бөгет болады.

Барлық байлықтың иесі Аллаһ Тағала, сондықтан ондай байлыққа ие болып, шоғырландырған адам Аллаһ Тағаланың берген ырыздық-несібесі екенін түсініп, оның бір бөлігін қоғамымыздағы жағдайы төмен топтардың (мұқтаждардың, кедейлердің) игілігі үшін жұмсағаны парыз.

Енді сол асыл дініміздің бес парызының бірі - зекетті өз шарттары мен қағидаларына сәйкес, жүйелі түрде халыққа түсіндіріп, Аллаһ Тағала алдындағы міндетімізді кіршіксіз орындау үшін жүйелі жұмыс істеудің уақыты келді, Аллаһ бірлігімізді сақтап берекемізді арттырсын.

Зекет қоры Қостанай облысында 1 маусымнан бастап өз жұмысына кірісті.

«ҚМДБ Зекет қоры» корпоротивті қорына қаржы аудару жолдары:

Төлем терминалдары арқылы:

Қордың есеп шотына банк арқылы қаржы аударумен қатар ОСМП (Qiwi) төлем терминалдары және «Beeline» операторының абоненттері «2011» нөміріне хабарлама (мәтінсіз) жіберу арқылы да (әр хабарламаның құны 200 тенге) зекет парызын өтей алады.

Есеп шоттар арқылы:

Филиал религиозного объединение Духовное управление Мусулман Казахстана Мечеть Марал ишан «Зекет қоры» АО «Народный банк Казахстана» БИК БАНКА HSBККZKX ИИК KZ 706010221000161205 Код 18, КБЕ 18, КНП 119

Зекет парызын өтеу туралы анықтаманы мына телефондар арқылы алуға болады:

Зекет қорының Қостанай облысы бойынша өкілі, тел.: 53-18-37.

Есепші: 53-42-54, факс: 54-66-77.

Биыл да жылда қалыптасқан дәстүр бойынша облыстық Марал ишан мешітіндегі Ораза айт намазына халық көп жиналды. Олардың арасында жастардың қатары да мол болды.

Мұнда бас қосқан мұсылман қауымның алдында облыстық мешіттің наиб имамы Дархан Сыздықов сөз сөйлеп, Ораза айтының өзіндік ерекшелігіне кеңінен тоқталды. Уағыз айтып, жұртшылықтың көкейінде жүрген мәселелер жөнінде де ойын ортаға салды.

Ерекше тоқтала кетер бір жай, осынау басқосуда облыс әкімі Нұралы Сәдуақасов барша жиналған жерлестерімізді қасиетті Ораза айт мерекесімен шын жүректен құттықтады. Әрбір отбасына шадыман-шаттық, ырыс-береке тіледі. Оның жанында Қостанай қаласының әкімі Ахмедбек Ахметжанов та болды.

Үстіміздегі жылғы Рамазан айы өңірде жоғары деңгейде өтті. Облыстық Марал ишан мешітінен бастап бірқатар үлкен мешіттерде ауызашар отыз күн бойы берілді. Бұл да болса қостанайлықтардың Ислам діні мен өздерінің ата-бабамыздан келе жатқан салт-дәстүрлеріне ерекше ден қойып келе жатқандығын айқын байқатады, – дейді ҚМДБ-ның Қостанай облысы бойынша өкіл имамы Асылхан қажы Түсіпбек.

Жалпы Ораза айт намазы облысымыздағы барлық қалалық және аудандық мешіттерде жоғары деңгейде ұйымдастырылды.

ҚМДБ-ның Қостанай облысындағы өкілдігінің баспасөз қызметі 28.07.2014ж.

Ораза айт мерекесіне аман-есен жеткізген Алла тағалаға сансыз шүкірлер мен мадақтар болсын. Барша отандастарымды мұсылман қауымының ұлық, қастерлі мерекесі – Ораза айт мейрамының басталуымен құттықтаймын. Айт мүбәрак болсын!

Қасиетті Рамазан айының аяқталғанын білдіретін Ораза айт – мейірімділіктің, игіліктің, бірліктің, ізеттіліктің, қайырымдылықтың, достық пен шаттықтың мерекесі. Ораза айт ұлттар мен ұлыстарды ынтымаққа ұйыстырады. Иманды күшейтіп, кеңпейіл, бауырмал, қонақжай халқымызды жақсылыққа, қайырлы іс жасауға жетелейді.

30 күн оразада халқымыз ыждаһаттылықпен ауыз бекітті. Мешіттерімізде ауызашарлар мен қайырымдылық іс-шаралар ұйымдастырылып, тұрмыс жағдайы төмен отбасыларына көмек көрсетілді. Ел игілігі үшін қызмет етіп жүрген көптеген азаматтар жақсылыққа үлес қосып, сауабы мол амалдарға атсалысты. Баршасына «Алла разы болсын» дегім келеді.

«Айт» сөзі «қарымта» деген мағынаны білдіреді. Жаратушы Иеміз әрбір ізгі амал мен игілікті істің сауабын беріп, мейірім-шапағатын төгеді.

Айт күнінде ғұсыл құйынып, жұпар иіс себініп, жамағатпен айт намазына қатысудың сауабы мол. Туған-туыстарды, көршілерді, дос-жаранды мерекемен құттықтап, дастархан жайып, ұлық мейрамның сәні мен салтанатын арттыру – Ораза айттың өзіне тән жарасымды һәм сауапты амалдарынан. Осы мерекеде өзара ренжіскен кісілерді татуластырсақ, өзгенің қате-кемшілігін кешіріп, ата-анамыздың құрметі мен ризалығына бөленсек, ол да – мұсылманға тән сипат. Исламда әрбір ізгі амал – садақа. Көршіге көмектесу, мұқтажға қол ұшын беру, тіпті жетімнің басын сипап, өзгелерге жылы шырай таныту, ол да – садақа.

Күндегі оразасын құрмамен ашуды сүннет еткен Пайғамбарымыз (с.ғ.с) айт намазына барарда алдымен құрмадан дәм татып барып үйінен шыққанды ұнататын.

Ораза айтта отбасымызды шаттыққа бөлеп, ағайынға сыйлық берудің де маңызы зор.

Алла тағала ұстаған оразаларымызды, дұға-тілектерімізді қабыл еткей! Халқымыздың бірлігі мен ынтымағы артып, Тәуелсіздігіміздің тұғыры биік, егемендігіміз мәңгі баянды болғай! Әмин!

Жуырда Түркия діни басқармасы, облыстық Марал ишан мешіті және Қостанай облыстық «Зекет» қорының ұйымдастыруымен қасиетті Рамазан айында «Ешкім елеусіз қалмасын» атты қайырымдылық шаралар өтті.

Бұл қайырымдылық шараны облыстық «Зекет қорының» өкілі Жақсылық қажы Ғайсин ашып, жиналған жамағатты қасиетті ораза айымен құттықтады. Алғашқы сөзді Түркиядан келген Марал ишан мешіттің жанындағы сауат ашу курсының ұстазы Нұх Темірджиге берді.

Ұстаз Нұх екі елдің бауырлас түбі, діні бір мемлекеттер екеніне тоқтала келіп, Түркия мемлекетінің қайырымдылық сыйлықтарын табыс етті.

Қайырымдылық қордан көмек алған 5 баланың анасы, Қостанай қаласының оңтайландыру орталығынан келген Ботагөз Женебаева осы акцияны ұйымдастырушыларға шын жүректен шыққан шынайы алғысын тебіреніспен жеткізді.

Бас қосуда облыстық Марал ишан мешітінің бас имамы Асылхан Түсіпбек Ислам дінінің біздің елде қарыштап дамып келе жатқанына, еліміз тәуелсіздік алғаннан кейін өңірде қаншама мешіттер ашылып, діни сауат ашу курстары, медреселер ашылып жатқанына, алдағы уақытта этнос аралық татулыққа айрықша көңіл аудару керектігіне жан-жақты тоқталды. Айта кететін жағдай осы қайырымдылық қорының сыйлықтарына татар, қырғыз, өзбек, әзірбайжан және орыс, грузин ұлттарының өкілдері де ие болды.

Рамазан Алла Тағала Өзінің жаратқандарын сынаққа алатын және мәңгілік бақытқа қол жеткізуге мүмкіндік беретін қасиетті айы. Ораза адам баласына күнәларынан арылып, рухани биік дәрежеге қол жеткізуге мүмкіндік береді.

Біздің заманымызда көптеген мұсылмандардың ораза жайлы түсінігі дұрыс емес әрі сол ораза кезінде уақытты дұрыс пайдаланбайды. Олар уақыттарының басым бөлігін бос тірлікпен және теледидар көрумен ұйқылы- ояу жүріп өткізеді. Уақытты осылай өткізу жалқау әрі кәрпияз болуға әдеттендіреді.

Дегенмен Рамазан айы мұсылман адамға белсенділік пен рухани кемелдену айы болуы тиіс.

Хижрадан кейін және өмірден озғанға дейін Пайғамбарымыз (оған Алланың игілігі мен сәлемі болсын) Рамазан айын шамамен тоғыз мәрте көрген. Осы айда көптеген тарихи оқиғалар болып өтті және де Алла жолында құрбан болу мен Оған бойұсынуда жарқын естеліктер қалды.

Хижраның үшінші жылы, Рамазан айының он жетінші жұлдызында Алла Тағала Ұлы Бәдір шайқасында ақиқатты жалғаннан ажыратты. Пайғамбар (оған Алланың игілігі мен сәлемі болсын) және оның 313 сахабассымен Меккеде тұтқындалған өзінің сауда керуенін қайтармақ болып жиналады. Ол сауда керуенді Әбу Суфиян басқарды, ал тауардың бағасы шамамен 50 000 динарға бағаланды. Мұсылмандарды жақсы жасақталған Ислам сәулесін сөндірмекші болған құрайыш әскері қарсы алды. Мүшріктердің әскер саны мұсылмандардан асып тұрса да мұсылмандар Пайғамбарымызды (оған Алланың игілігі мен сәлемі болсын) қорғау үшін және де шейіттік жолмен Жаратушының разылығына жету мақсатында ерлікпен шайқасты. Рамазан айының осы бір күні Алла Тағала оларға естен кетпес жеңіс берді.

Хижраның алтыншы жылы Заид ибн Харис Уади әл-Кураға осы аймақтың әйел басшысы Фатима бинт Рабиамен шайқасуға әскер басы болып аттанады. Фатима Исламға ашық қарсы келуші басшы еді. Ол Рамазан айында мұсылмандарға қарсы соғыста мерт болды.

Хижраның сегізінші жылы Рамазан айында Худайбия келісімі бұзылған кезде мұсылман әскері солтүстікте византия әскерімен шайқасқа түседі. Осы кезде Пайғамбарымыз (оған Алланың игілігі мен сәлемі болсын) Араб түбегінің және Меккенің дінсіздігіне түбегейлі балта шабу керектігін сезеді. Алла Тағала Өзінің Үйін бейбіт, қауіпсіз әрі Исламның қасиетті жері етіп жариялады. Енді Қасиетті Қағбаны серікқосушылардың надандықтары мен ластықтарынан тазалайтын уақыт жетті. Пайғамбарымыз (оған Алланың игілігі мен сәлемі болсын) бұрын- соңды ешкім көрмеген алып әскерімен Меккеге қарай бет алды. Олар Меккеге жақындаған кезде әскерді көрген адамдар таңқалысты. Мұсылмандардың табандылығы мен Аллаға бойұсынушылығы сондай, Алланың қалауымен Рамазанның 20-сы күні Мекке ұрыссыз беріледі. Бұл Ислам тарихындағы ең маңызды күн болып қалды. Осыдан соң Араб түбегінде Ислам орнықты. Осы жылы сол айда әскер Меккедегі пұттарды қиратып, Араб еліндегі өзге де пұтқа табынушылық жайлап отырған орталықтарға бағыт алды.

Пайғамбарымыз (оған Алланың игілігі мен сәлемі болсын) заманындағы Рамазан осындай еді. Бұл күнәдан арылу, жақсылық жасап, жамандықтан тыйу заманы еді. Пайғамбарымыз (оған Алланың игілігі мен сәлемі болсын) өмірден озған соң мұсылмандар бұл дәстүрді жалғастырды. Алла Тағала шынайы мұсылмандарды тарих барысында сынақа алды. Рамазан айы әдеттегідей ұлы сынақ және оқиғаларға толы болды.

Хижраның тоқсан екінші жылы Ислам Солтүсткі Африка, Иран, Ауғаныстан, Йемен және Сирияға жайылды. Испанияны батыс-герман тайпасының королі Родерик басқарып отырған еді. Родерик Солтүстік Африка мұсылмандарынының көмегіне жүгінген яһудейлердің ізіне түседі. Солтүстік Африкадағы Омаядтардың билеушісінің орынбасары Муса ибн Хузайр оларға көмек ретінде берберлік және араб әскерінен құралған 12 000 әскерге Тариқ ибн Зиядты басшы етіп жібереді. Осы жылдың Рамазан айында піл сүйегі, күміс және қымбат тастардан жасалған тақта отырып басқарған Редриктің 90 000 біріккен христиан әскерімен шайқасады. Тариқ мұсылмандарды жеңіске ұмтылдыра сөз сөйледі. Үлкен құлшыныспен шайқасқан әскерге Алла Тағала кәпірлерді жеңуге күш берді.

Мұсылмандар үлкен жеңіске жетті. Редрик өлтіріліп, оның әскері құртылды. Ал Тариқ пен Мұса Испания, Сицилия және Францияның бір бөлігін азат етті. Бұл мұсылмандар 700 жыл биік құрған Әл- Андалустың алтын ғасырының басы еді.

Хижраның 582 жылы Салахуддин әл- Айюби крестжорықшыларымен көптеген жылдар бойы шайқасып, оларды Сириядан және олар қоршап алған аймақтан Рамазан айында қуып шығады. Осы кезде мұсылмандар үлкен әрі қауіпті жағдайды бастан кешті.

Хижраның жетінші ғасыры монғол әскерлері Азияны тұншықтырып жатыр еді. Шыңғыс хан өзін «Құдайдың адамдарды істеген күнәлары үшін жазалайтын адамзатқа жіберілген сабаушысы» деп жариялады. Хижраның 617 жылы Самарқанд, Рай және Хамдан қылышқа түсіп, 700 000 адам өлтіріліп, тұтқынға алынды. Хижраның 656 жылы Шыңғыс ханның немересі Хулагу хан осы қырғынды жалғастырды. Мұсылман әлеміндегі бас қала Бағдад қиратылды. Көптеген деректерге сүйенсек, осы шайқаста 1 800 000 мұсылман қаза тапқан. Осы кезде христиандарға шошқа етін жеп, шарап ішу ашық түрде рұқсат етілді, тіпті сол кездегі тірі қалған мұсылмандар да ішіп- жеуге мәжбүрленді. Азан айтылуға тиым салынған мешіттерде шарап сатылды.

Әлемнің өркениетіне қауып төніп тұрған осындай үлкен қиыншылық кездехижраның 658 жылы Рамазан айының 25-сі Алла Тағала Мысырлық мәмлүктердің ішінен Сайфуддин Қутузды мұсылман әскерімен монғолдарды Әйн Жәлутте (Палестинада) қарсы алуға жібереді. Жаудың қолы мұсылмандардан үстем бола тұра мұсылмандар Алланың жәрдемімен және әскери айламен, шайқалмайтын батырлықпен монғол әскерін ойсырата жеңіп, бұл қауіптің алдын алды. Бүкіл өркениет әлемі Ислам ұлдарының жеңісі алдында бас иіп, терең тыныстады.

Мұның барлығы да біздің салиқалы бабаларымызға шешімі жоқ мәселені артқа тастауға мүмкіндік сыйлаған Рамазанның рухы болатын. Бұл мұсылмандардың күндіз ат үстінде, түнде Алланың мейірімі мен кешірімін сұрап, құлшылықта болған уақыты еді.

Бүгінгі таңда мұсылман әлемі жоқшылықпен, аштықпен, әскери басқыншылықпен, материализмнің жалған сәттіліктерімен бетпе- бет келіп отыр. Ислам әлемі Пайғамбарымыз (оған Алланың игілігі мен сәлемі болсын) ізінен ерген саңлақ сахабаларға, Тариқ ибн Зияд, Салахуддин секілді Исламның қаһармандарына мұқтаж.

Алла Тағала мұсылмандардың ұрпағын жер шарының түкпір- түкпірінде Исламды ту ететін жандардан етсін, және де дінімізді дұрыс ұстану жолында бізге күш- қуат пен сәттілік нәсіп етсін. Алла Тағала біздерді Рамазан кезінде әрі Рамазаннан соң да Исламды амалымызда көрсетушілерден етсін. Алла Тағала және Оның періштелері біздің сүйікті Пайғамбарымызға игілік пен сәлем жолдайды.

Әмин.