Қазақстан мұсылмандары діни басқармасы биылғы жылды «Ислам және адал қоғам» жылы деп жариялағаны белгілі. Осы бағыт аясында Аймағанбет қажы Спанұлы мешітінде жамағатқа «Бас имам сағаты» ұйымдастырылды.
Кездесу барысында Қостанай облысының Бас имамы Бектұрсын қажы Торғайбайұлы «Мешітке жанашыр болу» тақырыбында уағыз-насихат айтып, Алла үйінің қоғамдағы орны мен маңызына кеңінен тоқталды.
Уағызда мешіттің тек құлшылық орны ғана емес, рухани тәрбие мен бірлік ордасы екені айтылып, жамағатты мешіт тазалығына, тәртібіне, тұрақты намазға және ізгі амалдарға белсенді болуға шақырды. Сонымен қатар, адал қоғам қалыптастыруда әр мұсылманның жауапкершілігі ерекше екені атап өтілді.
Шара соңында ел амандығы мен бірлігі үшін дұға жасады.
Қостанай облыстық мешітінің баспасөз қызметі
Жақында Арқалық қалалық «Мухтасиф Әлмұхаммед» мешітінің бас имамы Балғабай Оразханұлы шаһардағы мәдениет үйінде болды. Ол жергілікті жастармен ұйымдастырылған “Жастар және адал қоғам” атты рухани кешке қатысты.
Жиналғандардың алдында жалпы адалдықтың қоғамда алатын орны мен маңызына кеңінен тоқталып, уағыз-насихат айтты. Оның ғибратты сөздерінен қаншама тағылым алды.
Өз кезегінде қаладағы мәдениет сарайының басшысы оның уақыт талабына сай ой-толғамдарына дән ризашылығын білдіре келіп, имамға Алғыс хатты табыс етті.
Қостанай облыстық мешітінің баспасөз қызметі
ҚР Мұсылмандар діни басқармасының тапсырмасына сәйкес, Қостанай облысының жастар секторы мешітке келуші жастармен «Менің алғашқы оразам» тақырыбында кездесу өткізді.
Кездесуде облыстағы сектор меңгерушісі Әлішер Ертайұлы атқарылып жатқан жұмыстар және жалпы Рамазан айы туралы айтып берді.
Сонымен қатар, халықаралық және республикалық байқаулардың жеңімпазы, психолог Ырысхан Ибрагимұлы ораза ұстау бойынша тренинг өткізу үшін арнайы шақырылды.
Қостанай облысының Бас имамы Бектұрсын қажы Уәлиев қалалық «Марал ишан» мешітінде болды. Алдымен жұма намазында жамағатқа «Зекет пен садақа берудің пайдасы мен берекеті» жайлы уағыз-насихат айтты.
Сондай-ақ, аталған имандылық ордасына келуші жастармен «Жастар және адал қоғам» тақырыбы бойынша кездесу өткізді. Онда ол өзекті адалдық, тақуалық, шыншылдық жөніндегі ғибратты сөздерді қозғады. Өзге де көкейкесті мәселелер талқыланды.
Жиналғандар дін қайраткерінің Рамазан айындағы бұл жүздесулерінен көп жайды көңілдеріне түйіп, ұмытылмас әсер алды.
Қостанай облыстық мешітінің баспасөз қызметі
Қазақстан мұсылмандары діни басқармасының төрағасы, Бас мүфти Наурызбай қажы Тағанұлы хазіреттің қасиетті Рамазан айындағы атқарылатын жұмыс жоспары аясында жастарға ауызашар беру де қарастырылған.
Соны басшылыққа алған Қостанай өңіріндегі жастар секторының ұйымдастыруымен облыстық «Аймағанбет қажы Спанұлы» мешітіне келуші 100 жас өркенге ауызашар берілді.
Онда Бас имам Бектұрсын қажы Торғайұлы Тәуелсіздігіміздің 35 жылдығы және Отанды қадірлеп-қастерлеу, жалпы қазіргі таңдағы өзекті мәселе патриоттық тақырып жайында уағыз-насихат айтты.
Қостанай облыстық мешітінің баспасөз қызметі
Ораза айы келгелі «Аймағанбет қажы Спанұлы» мешіті қабырғасында рухани дәрістер өтуде. Мешітке енді ғана келіп, дін жолына жаңа қадам жасап жүрген жас буынға Құран үйрету сабағы жүргізілуде. Сабақ барысында жастардың ықыласы, үйренуге деген ынтасы ерекше байқалды.
Бұл кездесу олардың тек Құран оқуды үйренуіне ғана емес, өздерін жаңа қырынан дамытуына, рухани тұрғыда өсуіне үлкен серпін берді. Жастардың жүзіндегі қуаныш пен жүректеріндегі ықылас бұл сабақтың қаншалықты пайдалы әрі әсерлі болғанын көрсетті. Осындай ізгі бастамалар арқылы мешіт – тәрбие мен білімнің, рухани кемелденудің ордасы екені тағы бір мәрте айқындалды
Қостанай облыстық мешітінің баспасөз қызметі
Бүгін «Аймагамбет Спанұлы» мешіті қабырғасында ауызашарға жиналған жамағаттың рухани әрі діни білімін шыңдау мақсатында арнайы викториналық сұрақ-жауап ұйымдастырылды. Игі шара барысында жамағатқа Құран, ислам әдебі және дінге қатысты тағылымды сұрақтар қойылып, белсенділік танытқан азаматтар өз білімдерін ортаға салды.
Сұрақтарға дұрыс әрі нақты жауап берген жамағат мүшелеріне арнайы діни кітаптар сыйға тартылды. Бұл кеш ауызашардың берекесін арттырып қана қоймай, жамағаттың білімге деген ынтасын оятып, рухани орта қалыптастырған тағылымды басқосуға айналды. Осындай пайдалы бастамалар арқылы мешіт – тек құлшылық орны емес, білім мен тәрбие ордасы екені тағы бір мәрте дәлелденді
Қостанай облыстық мешітінің баспасөз қызметі
Танымал кәсіпкер Қайрат Қазиханұлы Рудный қаласындағы «Сәуле» мейрамханасында жамағатқа ауызашар берді. Оған қонақ ретінде облыстың Бас имамы Бектұрсын қажы Уәлиев арнайы шақырылды. Ол «Ислам және адал қоғам» жылының ерекшелігіне кеңінен тоқталды. Оның тағылымды уағыз-насихатын жұртшылық ұйып тыңдады.
Сондай-ақ, Торғайбай қажы ақ батасын беріп, жиналғандарғы ең ізгі тілегін жеткізді.Ауызашардан кейін Бектұрсын қажы Рудный қалалық «Нұр» мешітіне барып, оразаның мән-маңызына тоқталып, мешіттің қадірін білу жөнінде намазхандарға уағыз айтты және тарауық намазына қатысты.
Алла берілген ауызашардың сауабын еселеп, кәсіпкерге береке-ырыс нәсіп етсін!
Қостанай облыстық мешітінің баспасөз қызметі
Елімізде Тәуелсіздіктің 35 жылдығына орай Бас мүфтидің тапсырмасы бойынша «Ислам және адал қоғам» жылы аясында республикалық «Рамазан сыйы» қайырымдылық марафоны ұйымдастырылғаны белгілі.
Осынау марафонға Қостанай өңіріндегі барша аудан мен қала мешіттері де өздерінің лайықты үлестерін қосты. Ол облыстық «Аймағанбет қажы Спанұлы» мешітінен бастау алды.
Онда Бас имам Бектұрсын қажы Торғайбайұлы сөз сөйлеп, көпшілік қауымға биылғы марафонның мәні мен мақсаты жайлы айтып берді. Рамазан айымен құттықтап, мұқтаж жандардың көңіліне демеу боларлық жылы лебізін жеткізді.
Жалпы облыстағы мешіттерде қайырымдылық марафоны барысында 250 адамға азық-түлік тапсырылды. Осы мақсатқа 5 миллионға жуық қаржы жұмсалды. Рамазандағы сауапты іске өңірдегі кәсіпкерлер және басқа да жүрегі жомарт жандар демеушілік еткенін айтып өткеніміз лазым.
Қостанай облыстық мешітінің баспасөз қызметі
Облыс орталығындағы “Жайлаубай ата” мешітінде Рамазан айының алғашқы күні шаһар басшысы бастаған бір топ азаматтар ауызашар дастарқанын жайды.
Оған өңірге есімдері белгілі аға буын өкілдері, ақын-жазушылар шақырылды. Олардың ғибратты сөздерін жиналған жұртшылық ұйып тыңдады.
Арнайы дайындалған бейнефильм көпшілік назарына ұсынылды. Соңында ардақты ақсақал Серікбай Бисетаев бата берді.
Қостанай қалалық “Жайлаубай ата” мешітінің ұжымы қасиетті Рамазан айында қайырымдылық шараларын жалғастыруда. Көмекке мұқтаж бес отбасына азық-түлік берілді.
Осы мақсатқа 100 мың теңге жұмсалды. Оған жүрегі жомарт азаматтар демеушілік етті. Олардың жасаған игі істері өзгелерге үлгі болары хақ.
Жоғарыда аталған “Жайлаубай ата” мешітінің қызметкерлері өздерінен көмек сұраған кісілерге мүмкіндіктері келгенше қол ұшын беруде. Жуырда ғана баласын емдету үшін бір жанұяға 54 мың теңге көлемінде көмек көрсетілді. Оған мейірімді жандар өз үлестерін қосты.
Қостанай облыстық мешітінің баспасөз қызметі
Миләди
Хижри
