Уақып бұл – Алла разылығы үшін белгілі бір мүлікті қайырымдылық жолына арнау немесе бағыштау. Уақып – істелуі ұнамды болған және Аллаға жақындататын хайырлы іс. Құранда: «Ей, иман келтіргендер! Маңдай терлеріңмен тапқан малдарыңды және біздің сендер үшін жерден шығарғандарымызды Алла жолында сарп етіңдер!» (Бақара-267) деп, ескерткен. Және бір аятта: «Жақсы көрген нәрселеріңді Алла жолында жұмсамайынша жақсылыққа қол жеткізе алмайсыңдар. Не жұмсасаңдар да Алла оны сөзсіз біліп тұрады», (Әли Имран-92) деген.

Әбу Һурайрадан (р.ғ.) риуаят бойынша: «Алланың Елшісі (с.ғ.с) былай дейді: «Садақа Раббының ашуын басады және жаман өлімді қайтарады» (Тирмизи) деп, Алла жолында садақа берудің сауабын айтып өткен.

Саңлақ сахабалар өз дәуірінде бар мал-мүлік, жиған қаражатын халықтың игілігі жолында, Алланың разылығын алу мақсатында сарп ететін болған. Бұл қоғамдағы жарлы-жақыбай, кедей-кепшіктерді тұрмыс тауқыметінен құтқарса, уақып жасаушы жанды мол сауапқа кенелткен. Мәселен, Әнас ибн Мәликтің өгей әкесі Әбу Талха, Алла елшісінен жоғарыдағы аяттарды естіген бетте «Бейруха» есімді сүйікті бақшасын дереу Алла жолына бағыштап, уақып еткен.

Бірде Омар ибн Хаттаб (р.ғ) пайғамбарымызға келіп: «Уа, Алланың елшісі, мен Хайбар соғысында бір жерді өз меншігіме алдым, осы жер хақында маған қандай әмір бересің?», деп сұрайды. Сонда Пайғамбарымыз (с.ғ.с): «Егер қаласаң ол жерді уақып қыл да одан түскен пайданы садақа қылып отыр», деп кеңес береді. Омар (р.ғ) содан кейін ол жерді ешкімге сатылмайтын, мирасқа да қалмайтын қылып садақа етеді. Одан түскен пайданы мұқтаж жандарға, Алла жолындағы жақсылықтарға, жолаушыларға садақа қылып беріп отырды. Ал, ол істі мойнына алған яғни пайданы жинап отыратын кісінің сол кездегі жағдайға сәйкес ішіп жемі мен еңбегін де беріп отырды. Ислам ғұламалары Омардың (р.ғ) өз меншігіндегі жерін уақып қылуын «Ислам тарихындағы ең алғашқы уақып» деп санаған. (Абдулла ибн Абдурахман Әл Бәссәм, Таузихул ахкам мин Булуғил марам, 1-7, Мәктәбәтул Әсәди)

Ал, енді біздің бабаларымыз уақыпқа қалай амал жасады?

Қоғам қайраткері, жазушы, ақын, аса көрнекті ағартушы, жалынды көсемсөз шебері, айбарлы алты алаш үшін жанын қиған асыл арыстардың бірі Міржақып Дулатұлы бір өлеңінде:

Жарар еді ортада мешіт салсақ,

Қаза қылмай намазды барып тұрсақ,

Бір ғалымды фазыл заттан имам сайлап,

Байларымыз жиналып уақып қылсақ.

Барша түркі жұртының алтын бесігіне айналған, рухани астанамыз саналатын Түркістанда Ақсақ Темірдің, Қожа Ахмет Яссауиға арнап салғызған кесене-мешіті орасан зор мұра. Тарихи деректерден Ақсақ Темір осы кесене-мешітті уақып етіп салып, «уақыпнама» қалдырған.

Батыр да дана бабаларымыз өзге елде жүріп те халыққа пайдалы қыруар еңбек жасаған, арғысы Сұлтан Бейбарыс бабамыз Мысыр еліндегі салған мешіті болса, бергісі Құнанбай қажының Меккедегі уақып етіп салып кеткен тәкиесі – халқымыз үшін ардақты мекен болып саналады. Бүгінгі күні де елқамын ойлаған азаматтарымыз мешіт, медресе салып, халықтың ыстық ықыласына бөленуде.

Уақыптың пайдасы мен хикметі:

- Дүние мүлкін Алла жолында уақып қылу Аллаға жақындатады. Мұсылман осы арқылы үлкен сауапқа ие болады және ол үшін бұдан асқан үлкен қайырлы іс болмайды.

- Уақып арқылы қайтыс болған мұсылманның сауабы үзілмей артынан барып тұрады. Негізінде бір мұсылман қайтыс болған кезде бүкіл іс әрекеттерінің сауабы үзіледі. Ал жасаған «уақып амалының» сауабы үзілмейді. Сол арқылы оның рухы қабірде нұрланатын болады. Қайтыс болған мұсылманның артынан салихалы ұрпағының дұғасы, пайдалы білімінің және қылған уақып амалының сауабы барып тұрады.

- Уақып мұсылмандардың қажетіне асады және осы арқылы Ислам дінінің дамуына өз үлесін қосады.

Қадірлі ағайын, қымбатты бауырлар! «Уақып» тақырыбы еліміз үшін, дініміз үшін өзекті мәселе. Қазіргі таңда ҚМДБ-ның тікелей қолдауымен «Уақып қоры» өз жұмысын бастап кетті. Қордың мақсаты дәстүрлі рухани құндылықтарды дамыту, діни ғимараттар мен әлеуметтік нысандар құрылысын бірлесіп салу, дін қызметкерлеріне қолдау көрсету, олардың біліктілігін арттыруға көмектесу. Сонымен қатар мұқтаж жандарға материалдық көмек көрсету болып табылады.

«Өзін ғана ойлаған, Жамандықтың белгісі.

Өзгені де ойлаған, Адамдықтың белгісі» - демекші, асыл дініміз Ислам әрдайым өзгелерге көмектесуге, қамкөңіл жандардың қамын жеуге үндейді. Сондықтан қолымыздан келгенше, дүние-мүлкімізден Алла жолында уақып етуді ұмытпайық. Құдай тағала кәсіптеріңізге береке беріп, адал табыс табуды нәсіп еткей!

Рудный қалалық «Нұр» мешітінің имамы Бектұрсын Уәлиев

Қостанай қалалық "Жайлаубай ата" мешітінің наиб имамдары Бақберсін Ізбасаров пен Ерлан Сыздықов облыс орталығындағы құрылыс және тұрмыстық қызмет көрсету колледждерінде болды.

Олар аталмыш қос білім ордаларында "Ырыс алды ынтымақ" - атты тақырыпта әсерлі кездесулер өткізді. Оған қатысушылар дін қызметкерлерінің ғибратты сөздерін мұқият тыңдап, ризашылықтарын білдірді.

Қостанай облыстық мешітінің баспасөз қызметі

Арқалық қалалық «Мухтасиб Әлмұхамед» мешітінің және қалалық «Жігер» стадионының басшысы Рүстем Шалабаевтың ұйымдастыруымен футболдан үш команда арасында жолдастық жарыс өтті.

Оған қалалық «Мухтасиб Әлмұхамед » мешітінің жамағаты және «Жігер» стадионының және «Халыққа қызмет көрсету» орталығының командалары қатысты.

Шаһардағы мешіттің Бас имам Нұрхан Бахтыбай ынтымақ, бірлік жайлы уағыз айта келіп, командаларға сәттілік тіледі. Ойынға тігілген жүлде қоры 200 000 мың теңге биыл имандылық ордасы жанынан салынғалы жатқан асхана құрылысына тапсырылды.

Қостанай облыстық мешітінің баспасөз қызметі

Қазақстан мұсылмандары діни басқармасының жанындағы «Зекет және қайырымдылық» қорының үстіміздегі жылғы жұмыс жоспарына сәйкес игі мақсаттағы бірқатар шараларды жүзеге асыруда.

Осы ретте Әулиекөл аудандық «Әмит ишан» мешітінің қызметкерлері «Күшіміз бірлікте» атты қайырымдылық акциясы өткізіліп, аудан тұрғындары мен шағын кәсіпкерлердің қолдауымен игі шара өткізді.

Аудан орталығындағы 12 көп балалы отбасына азық –түлік қржыны алынып, таратылды. Олар демеушілер мен шараны ұйымдастырушыларға шынайы алғысын білдірді.

Қостанай облыстық мешітінің баспасөз қызметі

Үстіміздегі жыл ҚМДБ-ның төрағасы, Бас мүфти Наурызбай қажы Тағанұлының бастамасымен «Ислам – ынтымақ және бірлік діні» болып бекітілді.

Осығын орай Қарабалық ауданы «Ғашура ана» мешітінің ұйымдастыруымен аудандық ардагерлер үйінде дөңгелек үстел өтті. Алғыс айту күніне арналған басқосуға ауданда мекендеп жатқан түрлі ұлт өкілдері қатысты.

Онда бауырлас халықтардың өкілдері қазақ халқына алғыстарын айтты. Ауданның Бас имамы Серік Темірбекұлы қазіргі таңдағы аса маңызды бірлік, ынтымақ жайында әңгімеледі. Жиналған қауымды елімізде дәстүрге айналған айтулы күнмен шын жүректен құттықтап, оларға деген шынайы тілегін жеткізді.

Ал ардагерлер кеңесінің төрайымы Сәния Сұлтанбекқызы өз кезегінде өлең жолдарын оқып, жүздесуді өткізуге ұйытқы болған азаматтарға алғыс айтты.

Қостанай облыстық мешітінің баспасөз қызметі

Таяуда Арқалық қалалық «Мухтасиб Әлмұхаммед» мешітінің бас имамы Нұрхан Асанұлы өрт қауіпсіздігі қызметкерлерімен кездесті. Ол әңгіме барысында деструктивті діни ағымдар жайында баяндады.

Жиынға қатысушылар дін қайраткеріне осындай өзекті мәселені көтергені үшін ризашылықтарын білдірді. Сөздің реті келгенде, шаһардағы № 4 МӨСБ бастығының орынбасары, аға лейтенант Нұрбол Дауылбаевтың да жүздесуді ұйымдастыруға ықпалын тигізгендігін атап өткен жөн.

Қостанай облыстық мешітінің баспасөз қызметі

Жітіқара аудандық «Ержан Тәтішев» мешітінің қызметкерлері Қазақстан мұсылмандары діни басқармасының жанындағы «Зекет және қайырымдылық» қорының үстіміздегі жылғы жұмыс жоспарына сәйкес игі мақсаттағы бірқатар шараларды жүзеге асырды.

Осы сөзіміздің айғағы ретінде «Күшіміз бірлікте» акциясы аясында көмекке мұқтаж жандарға қолдау көрсетілді. Мысалы, 8 адамға 230 келі азық - түлік үлестірілді.

Сонымен қатар бір қарт адамға мүгедек арбасы табыс етілді. Әрине, сол кездегі ол кісінің қуанышын тілмен айтып жеткізу қиын.

Қостанай облыстық мешітінің баспасөз қызметі

Жақында Сарыкөл аудандық тілдерді оқыту орталығының басшысы Болат Ғаниұлының ұйымдастыруымен тағылымы мол кездесу өткізілді. Жиын қатысушыларға үлкен әсер қалдырды.

Басқосуда мұсылманның мінез-құлқы және жат ағымдардан сақтандыру тақырыбы жан-жақты айтылды.

Сондай-ақ осы аудандық кітапхана бөлімінің жетекшісі Солдат Дүтпаевтың ұйытқы болуымен өткен жүздесудің де қатысушыларға танымдық жағынан берері мол болды.

Мұнда «Ислам – бейбітшілік діні» тақырыбы қозғалды. Руханият ордасына жиналған қауымның білім көкжиегі кеңейіп, көп жайды көңілдеріне түйді.

Қостанай облыстық мешітінің баспасөз қызметі

Қасиетті Ережеп айы Қостанай өңірінде ерекше шаралармен басталды. Қостсанай қалалық әкімдігінің өмірдің қиындығында қалған балаларды қолдау орталығында түрлі себептермен ата-аналарынан қараусыз қалған 28 бала тіршілік кешіп жатыр.

Осы балдырғандарды қуанышқа бөлеу мақсатында Қостанай облыстық мешітінің қайырымдылық қоры мен жамағаты «Қайырымды Жұма» жобасы аясында дастархан жайып, балаларға сыйлық тапсырды.

 Айта кетер жай, бұл игі іс-шара ақпан айының бірінші жұмасынан бастап қолға алынған болатын. Содан бері әр аптаның жұма күні жалғасын тауып келеді.

Алғашқы шара КСК ауданындағы «Пияла» кафесінде онан соң «Муслима» кафесінде жалғасын тауып балалардың жүзінде қуаныщ ұялауына себепші бола білді.

Қостанай облыстық мешітінің баспасөз қызметі