Тәуелсіздіктің 30 жылдығы қарсаңында Тобыл қаласы орталығындағы «Маңдай батыр» мешітінің Бас имамы Дархан Манарбекұлы және найб имам Азамат Серікбайұлы Қостанай ауданына қарасты Мәскеу және Озерный ауылдарында болды.

Олар сапар барысында селолық округ әкімдерімен кездесіп, елді-мекеннің тыныс-тіршілігімен танысты. Жергілікті халықпен дін, адалдық жөніндегі өзекті тақырыптарды қозғады.

Бұл жүздесулер өте әсерлі өтті. Жиналған жұртшылық білікті мамандардың дін насихаты жайлы ой-пікірлерін тыңдап, өздерінің көкейде жүрген сауалдарына жауап алды.

Дархан Сыздықов жаңа қызметке кіріскелі бері бірқатар қордаланып қалған жұмыстарды тындырды. Мешіттің ішіндегі бөлмелерді жөндеуге ерекше көңіл бөліп, имандылық пен ізгілік жайлы қаншама іс-шаралар өткізді.

Қостанай облыстық мешітінің баспасөз қызметі

Қостанай облысының Бас имамы Бахытбек қажы Тәжімбет Тәуелсіздігіміздің 30 жылдығы қарсаңында Ұзынкөл ауданында іс сапарда болды.

Алдымен ауданда ұйымдастырылған қазақша күрестен өткен жарыста бағын сынаған палуандарға сәт сапар тіледі. Осынау шеберлік пен бап сыналар сайысқа 80 жасөспірім қатысты. 

Жарыс болған жерде жеңімпаздар да топ жарады. Онда Нұрлан Әміреш Бас жүлдені жеңіп алып, түйе палуан атанды. Оған жүлдеге ақ қошқар табыс етілді.

Күрес қорытындысында бірінші, екінші және үшінші орынды иеленген жас палуандарға арнайы дайындалған медальдар тапсырылды. Барлық қатысушылар сый-сияпат пен құрметке бөленді.

Сапар барысында аса маңызды басқосулар мен кездесулердің ажарын кіргізіп, жиналған қауымды алдағы қазақ халқының өміріндегі айтулы мерекемен шын жүректен құттықтады.

Ұлы мерекенің құрметіне дастарқан жайылып, ас берілді. Онда да жеңімпаздардың атына жылы лебіздер айтылды.

Қостанай облыстық мешітінің баспасөз қызметі

Қостанай облыстық мешітінің найб имамы Бақытжан қажы Икрам жетекшілік ететін «Қайырымдылық және Зекет қоры» өткен қараша айында талмай жұмыс істеп, өңірде қолдауға мұқтаж жандарға көмек көрсетті.

Осы арада сөзіміз нақты болу үшін деректер мен дәйектерге сүйенелік. Мәселен, аймақ бойынша 90 адамға азық-түлік таратылды. Бұл мақсатқа 1 млион 810 теңге жұмсалды.

«Қолы ашықтың - жолы ашық» демекші, қор басшысы Бақытжан қажы демеушілер мен қаржылай көмек көрсеткен жүрегі жомарт жандарға айтар алғысы шексіз. Алла разы болып, істері алға баса берсін деген тілекте.

Қостанай облыстық мешітініңбаспасөз қызметі

Қостанай облыстық мешітінің «Әйел-қыздар секторы» ұстазы Халим Жансаяның ұйымдастыруымен «Құран хатым» дұғасы жасалды. Онда қатысушылар өздерінің жақындарына дұғадан бағыштады.

Сондай-ақ, киелі орындағы сауат ашу курсын тәмәмдаған шәкірттерге сертификат тапсырылды. Бұл олардың өміріндегі есте қаларлық сәттердің бірі екені даусыз.

Осы шарада ұстаз Жансая Салауатқызы Құран Кәрімнің қасиеті жайында уағыз-насихат айтып, оны жұртшылық ұйып тыңдады.

Кеш соңында шарға қатысушылар бір-біріне сыйлық ұсынып, дастархан басында тәтті шәй ішіп тарқады.

Қостанай облыстық мешітінің баспасөз қызметі

Өткен сенбіде Қостанай облысындағы Қарабалық ауданына қарасты Бөрлі ауылында намазхананың ашылу салтанаты болып өтті. Оған жергілікті халық көп жиналды.

Сонау 90-жылдардың басында бой көтеріп, бірнеше жыл жұмыс істеген киелі орын кешегі тоқырау кезеңінде жабылып қалған-ды. Бұл, әрине, жергілікті жұртшылықтың арқасына аяздай батты.

Содан бері біраз уақыт өтті. Халықтың ислам дініне деген ынта-ықыласы артты. Сөйтіп, олар имандылық ордасының қайтадан ашылуына бастама көтеріп, түрткі болды.

«Жұмыла көтерген жүк жеңіл» демекші, аудан басшыларының қолдауымен ауыл тұрғындары, жүрегі жомарт жандар, еліміздің түкпір-түкпірінде ғұмыр кешіп жатқан құтты қоныс тумалары атсалысып, қолға алған игілікті іс ойдағыдай жүзеге асырылды.

Айтулы шараға Қостанай облысының Бас имамы Бахытбек қажы Нұрғабылұлы қатысып, ауыл тұрғындарына жүректен шыққан шынайы лебізін білдірді. Сонымен қатар, аудан әкімі Руслан Халықов та жерлестерінің өміріндегі қуаныштарына ортақтасып, құттықтады.

Сонымен, 22 жылдан бері жабық тұрған намазхана есігін айқара ашты. Салтанаттың соңында ауылдың қадірменді ақсақалдары Ақатай қария мен Жақсылық қажы ақ баталарын берді.

Қостанай облыстық мешітінің баспасөз қызметі

Тәуелсіздігіміздің 30 жылдық мерекесіне де санаулы күндер қалды. Ол біздің мемлекетіміздің өмірінде ерекше орын алады.

Қостанай қалалық «Жайлаубай ата» мешітінің ұйымдастыруымен «Ихсан жылы» аясында облыстық деңгейде мешіт жамағаттарының ынтымақ-бірлігін нығайту, егемендігіміздің қадыр-қасиетін арттыру, оның мән-мағынасын өскелең ұрпақтың саналарына сіңіру мақсатында спорттің волейбол түрінен жарыс болып өтті.

Оның барысында жоғары шеберлік көрсетіп, көңілдегідей ойын өрнегін танытқан Лисаков қаласындағы «Әбдіхайым Саламатұлы» мешітінің командасы бірінші орынды жеңіп алды.

Ал, екінші орын Әулиекөл ауданындағы «Әмит ишан» мешітінің, үшінші орын Рудный қаласындағы «Нұр» мешітінің командаларына бұйырды.

Жарыс қорытындысы бойынша жүлдегелерге лайықты марапат жасалып, естелікке сыйлықтар табыс етілді.

Қостанай облыстық мешітінің баспасөз қызметі

Арқалық қаласындағы Бейімбет Майлин атындағы №3 орта білім беру мектебінде Ихсан ілімі тақырыбында қатысушылардың жадында ұзақ сақталарлықтай жүздесу ұйымдастырылды.

Онда қысқа мерзім ішінде жергілікті зиялы қауым мен руханиятты жоғары қоятын жұртшылықтың ықыласына бөленген ізденімпаз азамат, «Мухтасиб Әлмұхаммед» мешітінің бас имамы Нұрхан Асанұлы отаншылдық, шыншылдық пен шынайылық, барлық бақыт пен байлықтың қайнар көзі-еңбекқорлық жөнінде толғамды ой қозғады.

Мұндай кездесулердің халыққа тигізер ықпалы ерекше. Қазіргі уақытта Ихсан ілімінің маңызы да өте жоғары. Сондықтан жоғарыда әңгіме арқауына айналған мешіттің қызметкерлері осы бағыттағы жұмыстарын жалғастыра бермек.

Қостанай облыстық мешітінің баспасөз қызметі

Арқалық қаласындағы көп салалы колледжінде жастарға ой салар басқосу болып өтті. Қатысушылардың алған әсерлері өте мол.

Өңірге белгілі білім ордасында алғашқы және технологиялық дайындық пәні бағдарламасы негізінде студенттерге «Діни экстремизм мен терроризм-әлемге төнетін қаупі мен зардабы» туралы терең түсінік берілді.

Міне, осы маңызды тақырып хақында шаһардағы Мұхтасиб Әлмұхаммед» мешітінің бас имамы Нұрхан Асанұлы тебірене сөз сөйледі. Оның террорлық, ланкестік және діни экстремистік бағытта арандатуға жол бермеу жөніндегі пікірлері мен ой толғаныстарын колледж студенттері ерекше ынтамен тыңдады.

Мұндай кездесулер әрқашан да еліміздің болашағы болып табылатын жастарды теріс ағымдардан сақтандырып, олардың осы бағыттағы таным-түсініктерін тереңдете түсетіндіктері даусыз.

Қостанай облыстық мешітінің баспасөз қызметі

Қостанай қалалық «Жайлаубай ата» мешітінде дүйсенбінің кешінде сүннет ораза ұстаған жандарға Ихсан жылы құрметіне жамағатқа арнайы ауыз ашар берілді.

Жиын соңында арнайы шақырылған облыстық мешіттің найб имамы Мейіржан Бердіғожин көпшілікке маңызды тақырыпта уағыз айтты.

Жамағат оның ой-пікірлерін аса зерделікпен ұйып тыңдап, ризашылықтарын білдірді.

Қостанай облыстық мешітінің баспасөз қызметі

Еліміздегі ұлы мереке Тәуелсіздіктің 30 жылдығы қарсаңында Рудный қалалық «Нұр» мешіті қазақша күрестен «Тәңір берген - тәтті сый» атты сайыс өткізді.

Оған өңір бойынша 37 намазхан палуан яғни Лисаков, Қостанай, Тобыл, Рудный қалалары мен Әулиекөл, Майлин аудандары, Қашар кентінен азаматтар қатысып, бақтарын сынады.

Жарыс басында қала әкімінің орынбасары Азамат Қуандықұлы жұртшылықты мейраммен құттықтап, сәттілік тілесе, мешіт жамағатынан қадірменді Торғайбай ақсақал барша палуандарға ақ батасын берді.

Ал қаланың Бас имамы Бектұрсын Уәлиев ұйымдастырылып отырған сайыс жастарды Отансүйгіштікке, асыл дінімізді қастерлеп, салт-дәстүрімізді ардақтауға, сондай-ақ жамағат арасындағы ынтымақ-бірлікті арттыруға ықпал ететіндігіне тоқталды.

Сайыстың қорытындысы бойынша 80 келі салмақ бойынша 1-ші орынды Мәлік Бекқали иеленді. Ал Асхат Маратов өзінің шеберлігінің арқасында түйе палуан атанды.

Жеңімпаздарға арнайы марапаттар, қаржылай сый-сияпаттар тапсырылды. Сондай-ақ негізгі жүлделі алты орыннан басқа, қосымша «Көрермен көзайымы», «Ардагер палуан», «Жеңіске деген ынтасы үшін» номинациялары бойынша да сыйлықтар мен дипломдар берілді.

Сайыс мәреге жеткен соң палуандардың құрметіне мешітте арнайы дастархан жайылды.

Қостанай облыстық мешітінің баспасөз қызметі