Астана қаласындағы Республикалық Бас мешітте ІІ Халықаралық Құран жарысының салтанатты марапаттау рәсімі өтті.

Аталған халықаралық іс-шара Қазақстан Республикасының ұлттық мерекесі – Республика күніне және Қазақстан мұсылмандары діни басқармасының 35 жылдық мерейтойына арналды.

Марапаттау рәсіміне Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы, сондай-ақ мұсылман елдерінің елшілері, зиялы қауым өкілдері, өңірлерден келген имамдар мен қала тұрғындары қатысты.

Өз сөзінде Бас мүфти Наурызбай қажы Тағанұлы халықаралық жарыстың маңыздылығына тоқталып, қатысушыларға ризашылығын білдірді.

«Аллаға шүкір, Астана қаласында әлемнің әр бұрышынан, алыс та жақын шет елдерден келген тәжірибелі қариларымыз екі күн бойы Құранды жатқа оқудан сынға түсіп, керемет үлгі көрсетті.

Расында Құранның мағынасына терең бойлаған сайын жаның тыныштық тауып, жүрегің ерекше сезімге кенеледі. Құран оқыған сайын бойымызда сабырлық, байсалдылық, қарапайымдылық, кез-келген кісімен көркем мәміле жасай алатын жақсы мінез қалыптаса бастайды.

Құран оқылған жерге Алланың берекесі мен тыныштығы орнайды. Құран оқылған жер ерекше нұрға бөленеді. Екі күн бойы елордамызда оқылған Құран аяттары арқылы еліміз бен жеріміз нұрға бөленді деп үміттенемін. Алла соны нәсіп етсін», – деді Бас мүфти.

Бұдан кейін ҚМДБ Төрағасы ІІ халықаралық Құран жарысына қазылық жасаған қари-ұстаздар – Осман Шахин (Түркия), Насыр бин Сауд әл-Қасами (Сауд Арабиясы), Насрулла Искандаров (Қырғызстан), Махер Фарамауи (Мысыр Араб Республикасы) және әділқазылар алқасының төрағасы Ерсін Әміреге алғыс хат табыстады.

Әділқазылар алқасының шешімімен Құран жарысының жеңімпаздары төмендегідей:
І орын – $20 000 – Фахд ибн Мухаммад әш-Шәми (Сауд Арабиясы)
ІІ орын – $15 000 – Мерожиддини Ахмадзода Ахмад (Тәжікстан)
ІІІ орын – $10 000 – Шохан Уәлиев (Қазақстан)
IV орын – $5 000 – Салих Мухаммад Муса Тохами (Мысыр)
IV орын – $5 000 – Джалил Нуруддинов (Ресей)
Көрермен көзайымы жүлдесі – $3 000 - Ахмад Ашраф Уәлид Хамад (Палестина)

Сонымен қатар, жарысқа қатысып, жүлдегерлер қатарына енбеген қариларға 500 АҚШ долларынан ынталандыру сыйақысы берілді.

Айта кетейік, Құран жарысы мүфтияттың төл «Munara TV» телеарнасынан, «Муфтият ҚМДБ» YouTube арнасынан тікелей эфир арқылы көрсетілді.

Дереккөз: БАС МҮФТИ ІІ ХАЛЫҚАРАЛЫҚ ҚҰРАН ЖАРЫСЫНЫҢ ЖЕҢІМПАЗДАРЫН МАРАПАТТАДЫ , Muftyat.kz

Астана қаласындағы Республикалық Бас мешітте өткен ІІ Халықаралық Құран жарысы өз мәресіне жетті.

Халықаралық сайыста Палестина елінің өкілі ерекше дауысымен көрермен көзайымына айналды.

ҚМДБ Төрағасы, Бас мүфти Наурызбай қажы Тағанұлы Палестиналық қариға «Көрермен көзайымы» номинациясын табыстап, жамағат атынан 3000 АҚШ доллары көлемінде ақшалай марапат табыстады.

Бұл марапат – қаридың Құранды жүрекке жеткізе оқу шеберлігіне және көрермендердің ыстық ықыласына берілген жоғары баға болды.

Айта кетейік, ІІ Халықаралық Құран жарысына әлемнің 21 елінен келген үздік қарилар қатысып, екі күн бойы Құран оқу шеберліктерін паш етті.

Дереккөз: ПАЛЕСТИНАЛЫҚ ҚАРИ «КӨРЕРМЕН КӨЗАЙЫМЫ» НОМИНАЦИЯСЫМЕН МАРАПАТТАЛДЫ , Muftyat.kz

Астана қаласындағы Республикалық Бас мешітте Пайғамбарымыз Мұхаммедтің (оған Алланың салауаты мен сәлемі болсын) дүниеге келгеніне 1500 жыл толуына орай мәуліт жыры оқылды.

Игі шара ІІ Халықаралық Құран жарысы аясында ұйымдастырылды. Мәуліт барысында Пайғамбарымызға салауаттар айтылып, Құран аяттары оқылды.

Мәуліт жырын ІІ Халықаралық Құран жарысының әділқазы мүшесі, Мысырлық қари Махер Фарамауи, Серік қари Ахмет, Жұманазар қари Садырханов, Мұртаза қари Балахмет оқыды. Мәуліт дұғасын Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы жасады.

«Уа, Жаратушымыз Алла Тағала! Өзіңнің ең сүйікті құлың, пайғамбарлардың мырзасы әрі соңғы мөрі, адамзаттың ардақ тұтар ұстазы, жер бетіне рақым етіп жіберілген Пайғамбарымыз Мұхаммед мұстафаның құрметіне оқыған мәулітімізді қабыл ет! Біздерді Пайғамбарды шынайы жақсы көрген, оның сүннетіне ерген, көркем мінезін үлгі тұтқан, насихаттарын орындайтын, тұлғасын шынайы құрметтей білетін, оған жиі салауат айтатын, қияметте шапағатына ие болатын үмбетінен болуды нәсіп еткейсің!

Уа, Аллам! Ибраһим пайғамбар мен оның отбасына рақым еткеніңдей, Мұхаммед пайғамбар мен оның отбасына рақым ете гөр! Сен аса мақтаулы, аса даңқтысың!

Уа, Аллам! Ибраһим пайғамбар мен оның отбасына береке бергеніңдей, Мұхаммед пайғамбар мен оның отбасына да береке бере гөр! Сен аса мақтаулы, аса даңқтысың!

Осы мәулітті оқыған, қатысқан жандардың әрқайсысына, отбасы, ошақ қастарына амандық бер! Елімізге, жерімізге, тәуелсіз мемлекетімізді мекен еткен әрбір шаңыраққа бақыт-берекеңді нәсіп ет!», – деп дұға жасады Бас мүфти Наурызбай қажы Тағанұлы.

Дереккөз: ПАЙҒАМБАРЫМЫЗДЫҢ (ﷺ) ДҮНИЕГЕ КЕЛУІНЕ 1500 ЖЫЛ ТОЛУЫНА ОРАЙ МӘУЛІТ ОҚЫЛДЫ , Muftyat.kz

Астана қаласындағы Республикалық Бас мешітте өтіп жатқан ІІ Халықаралық Құран жарысының екінші күні басталды.

Бүгінгі сайыста Алжир, Мысыр, Индонезия, Қырғызстан, Әзербайжан және Ресей елдерінен келген қарилар бақ сынауда.

Бүгін жарыс қорытындысы бойынша жеңімпаздар марапатталады.

Дереккөз: ХАЛЫҚАРАЛЫҚ ҚҰРАН ЖАРЫСЫНЫҢ ЕКІНШІ КҮНІ БАСТАЛДЫ , Muftyat.kz

Қостанай аудандық кітапханасының оқу залында «Шынайы иман – рухани келісімде» тақырыбында Рухани келісім күніне арналған іс-шара болып өтті.

Кездесуге студенттер мен түрлі салаларда қызмет атқаратын қонақтар қатысты. Басқосу өзара ашық пікірлесу форматында ұйымдастырылды.

Бұл іс-шарада «Маңдай батыр» мешітінің найб имамы Ерлан Өмірбекұлы және Тобыл қаласындағы жергілікті шіркеудің настоятелі Андрей Крутин жастарға рухани құндылықтардың, өзара түсіністік пен дін өкілдері арасындағы толеранттылықтың маңызы туралы айтып берді.

Әңгіме барысында сенім, руханият, діннің қазіргі қоғамдағы рөлі және жас ұрпақты құрмет пен бейбітшілікті нығайту рухында тәрбиелеу мәселелері бойынша қойылған сұрақтарға нақты жауаптар берілді.

Қостанай облыстық мешітінің баспасөз қызметі

Тобыл қаласындағы аудандық кітапхананың оқу залында танымдық-тәрбиелік мәні зор шара болып өтті. Ол «Рухани келісім – қоғам бірлігінің негізі» деп аталады.

Бұл дөңгелек үстелді Қостанай аудандық ішкі істер бөлімі мен Қостанай облыстық психологтар қауымдастығы ұйымдастырды. Оны Мырзабек Тойғанов жүргізіп отырды.

Оған қаланың іскер азаматтары, қоғамдық пікір көшбасшылары, діни бірлестіктердің жетекшілері, Ш. Қабылбаев атындағы Қостанай заң академиясының ғалымдары, ақсақалдар кеңесінің мүшелері және басқа да ұйымдар мен бұқаралық ақпарат құралдарының өкілдері қатысты.

Осы кездесуде Қостанай ауданының Маңдай батыр мешіті наиб имамы Ерлан Өмірбекұлы "Рухани бірлік пен келісім Исламның негізгі құндылықтары" туралы айтып өтті.

Соңында Қостанай ауданы әкімінің орынбасары Диар Есмағанбетов қоғамдық өмірге белсене атсалысып жүрген азаматтарды марапаттады.

Қостанай облыстық мешітінің баспасөз қызметі

Астана қаласындағы Республикалық Бас мешітте өтіп жатқан ІІ Халықаралық Құран жарысының алғашқы күні өз мәресіне жетті.

Республика күні мен Қазақстан мұсылмандары діни басқармасының 35 жылдық мерейтойына арналған бұл рухани додаға 21 елден 22 қари қатысуда.

Бірінші күнгі сайыста 16 қари бақ сынап, халықаралық әділқазылар алқасының бағалауынан өтті. Құран оқыған қарилар қатарында Иордания, Өзбекстан, Малайзия, Бахрейн, Шешенстан, Қазақстан, Иран, Татарстан, Түркия, Палестина, Пәкістан, Марокко, БАӘ, Сауд Арабиясы және Тәжікстаннан келген қатысушылар бар.

Жарыстың ресми ашылуында ҚМДБ Төрағасы, Бас мүфти Наурызбай қажы Тағанұлы баяндама жасап, Құранның қоғамдағы рухани рөліне және Мемлекет басшысы Қасым-Жомарт Тоқаевтың Құранға құрмет көрсетуге қатысты халықаралық үндеуіне тоқталды.

Сондай-ақ, Қазақстан Республикасы Парламенті Сенатының Төрағасы Мәулен Әшімбаев халықаралық жарысқа қатысушыларға арнайы құттықтау хатын жолдады. Құттықтау сөзді Сенат депутаты Дархан Қыдырәлі оқып берді.

Қасиетті Құранды дәріптеу мақсатында ұйымдастырылған байқау ҚМДБ-ның «Munara TV» телеарнасынан және «Мүфтият ҚМДБ» YouTube арнасынан тікелей эфирде көрсетілді. 9 сағат 11 минутқа созылған YouTube-тағы эфирді 46112 көрермен тамашалады.

Тікелей эфир көрермендері бойынша алғашқы бестікте Қазақстан, Өзбекстан, Ресей, Түркия және Қырғызстан елдері көш бастады.

Дереккөз: ХАЛЫҚАРАЛЫҚ ҚҰРАН ЖАРЫСЫНЫҢ БІРІНШІ КҮНІ МӘРЕСІНЕ ЖЕТТІ , Muftyat.kz

Астана қаласында Республика күні мен Қазақстан мұсылмандары діни басқармасының 35 жылдығына орай ұйымдастырылған ІІ халықаралық Құран жарысы өтуде.

Іс-шара барысында Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы құттықтау сөз сөйлеп, Құранның қоғам мен отбасындағы орны туралы айтты.

«Біз жыл басында дін қызметкерлері үшін 2025 жылды діни салада «Ислам және отбасы құндылығы» жылы деп жарияладық. Бүгінгі халықаралық Құран жарысы осы жыл аясында атқарылған ең ауқымды жұмыстың бірегейі болмақ. Өйткені Құран аяттарын іске асырған пенде отбасына қамқор болады. Бала-шағасына дұрыс тәрбие береді. Ақ некемен алған жұбайына Алланың берген аманаты деп қарайды», – деді Бас мүфти.

Бас мүфти сөз соңында жарысқа қатысушы қариларға сәттілік тіледі.

Дереккөз: БАС МҮФТИ: «ҚҰРАН АЯТТАРЫН ІСКЕ АСЫРҒАН ПЕНДЕ ОТБАСЫНА ҚАМҚОР БОЛАДЫ» , Muftyat.kz

Астана қаласында Республика күні мен Қазақстан мұсылмандары діни басқармасының 35 жылдық мерейтойына орай ұйымдастырылған ІІ Халықаралық Құран байқауының ашылуына орай Қазақстан Республикасы Парламенті Сенатының Төрағасы Мәулен Әшімбаев құттықтау хатын жолдады.

Сенат Төрағасының құттықтауын көпшілікке ҚР Парламенті Сенатының депутаты Дархан Қыдырәлі оқып берді.

«Құрметті Құран жарысына қатысушылар!

Баршаңызды ІІ Халықаралық Құран жарысының ашылуымен шын жүректен құттықтаймын!

Қазақстан мұсылмандары діни басқармасы мен Сауд Арабиясы Корольдігі Ислам істері және уағыз-насихат министрлігінің ұйытқы болуымен ұйымдастырылған бұл игілікті іс-шара ізгілік пен имандылықты дәріптеу жолында айрықша мәнге ие.

Қазақ – ежелден дінге және рухани құндылықтарға ерекше құрметпен қараған халық.

Қазіргі таңда да Мемлекет басшысы Қасым-Жомарт Кемелұлы Тоқаевтың тапсырмасымен елімізде қоғамдық келісімді нығайтуға үнемі баса мән беріліп келеді.

Осындай жүйелі қадамдардың нәтижесінде Қазақстан дүние жүзіне өркениетаралық және дінаралық диалог алаңы ретінде танылды. Тұрақты түрде өткізіліп келе жатқан Әлемдік және дәстүрлі діндер көшбасшыларының съезі соның жарқын көрінісі. Бұл Съезд Қазақстанның әлемде діни толеранттылық, бейбітшілік және өзара құрмет қағидаттарын насихаттауға қосқан сүбелі үлесі екені анық.

Бүгінгі Құран жарысын сол халықаралық форумның нақты нәтижелерінің бірі деп қабылдаймыз.

Дәстүрлі діни құндылықтарды жаңғыртуды көздейтін мұндай бастамалар адамзаттың ырыс-ынтымағын арттырып, елдер мен өркениеттер арасындағы бірлікті және мәдени қарым-қатынасты нығайтуға оң септігін тигізеді деп сенеміз.

Осы ретте қасиетті Құранды жаттап, білімге құштарлықтың озық үлгісін көрсетіп жүрген барлық қатысушыға сәттілік тілеймін!

Ізгілік жолында жаңа жетістіктерге жете беріңіздер!»,- делінген Сенат Төрағасы Мәулен Әшімбаевтың құттықтау хатында.

Дереккөз: СЕНАТ ТӨРАҒАСЫ ІІ ХАЛЫҚАРАЛЫҚ ҚҰРАН ЖАРЫСЫНЫҢ АШЫЛУЫМЕН ҚҰТТЫҚТАДЫ , Muftyat.kz

Бүгін Астана қаласындағы Республикалық Бас мешітте ІІ Халықаралық құран байқауы басталды. Рухани шара ұлттық мереке - Республика күні мен Қазақстан мұсылмандары діни басқармасының 35 жылдық мерейтойына орай ұйымдастырылып отыр.

Қасиетті Құран аяттарын оқумен ашылған салтанатты рәсімде Бас мүфти Наурызбай қажы Тағанұлы арнайы дұға жасады.

«Оқылған қасиетті Құранның сауабын ардақты Пайғамбарымыз Мұхаммед Мұстафаның ғазиз рухына және Қазақ даласынан өткен барша ата-бабаларымыз бен ғұлама-ғалымдарымызға, асыл дініміздің жаршысы болған әулиелеріміздің рухына бағыштадық. Отанымыздың, тәуелсіз еліміздің жолында шейіт болған барша асыл бабаларымыздың рухтарына бағыштадық!

Уа, Алла Тағала! Марқұмдарымызды мейіріміңе бөлеп, рухтарын шат қылып, ардақты Пайғамбарымыздың шапағатын нәсіп етіп, жандарын жаннаттық ете гөр!», – деді Бас мүфти Наурызбай қажы Тағанұлы.

Салтанатты ашылу барысында қазақ жеріне Ислам дінінің таралу тарихына арналған бейнеролик көрсетіліп, көрермендер назарына ұсынылды.

Халықаралық деңгейдегі бұл сайысқа әлемнің 21 елінен 22 қари қатысып отыр. Байқау екі күнге жалғасады.

Айта кетейік, Құран жарысы «Munara TV» телеарнасынан және «Муфтият ҚМДБ» YouTube арнасынан тікелей эфирде көрсетілуде.

Дереккөз: АСТАНАДА ІІ ХАЛЫҚАРАЛЫҚ ҚҰРАН БАЙҚАУЫ БАСТАЛДЫ , Muftyat.kz