Қазақстан мұсылмандары діни басқармасының жоспарына сәйкес Қостанай облысына қарасты мешіттердің ұйымдастыруымен «Өткенге құрмет – тіріге міндет» атты тақырып аясында «QАМQOR-SНARAPAT» салттық қызмет көрсету орталығының қатысуымен зираттарда тазалық жұмыстары жүргізілді.

Өңірдегі мұсылман зираттарының айналасын тазарту - бізге жай ғана міндет емес, ізгі амал екендігі белгілі. Оны имандылықты жоғары қоятын азаматтар жете түсінгендіктен өздерінің лайықты үлестерін қосып келеді.

Осы сөзіміздің нақты айғағы ретінде жоғарыда аталған игі іске барлық мешіттердің қызметкерлері, ерікті жамағаттар, сондай-ақ жергілікті кәсіпкерлер де белсене атсалысты.

Қостанай облыстық мешітінің баспасөз қызметі

Жақында Қостанай қалалық “Жайлаубай ата” мешітінің Бас имамы Шоқан қажы Әмірханов имандылық ордасының жанындағы Қайырымдылық мекемесінде екі айлық білім беру курсын аяқтаған түлектерге сертификат тапсырды.

Адам баласына оқу жасқа қарамайды әрі кеш болмайды екен. Өйткені, бұл жолы маңызды құжат алғандардың қатарында 73 жастағы Қасым қарт, астаналық Айбол, көршілес Ақмола облысының Красивое ауылының тұрғыны Жанат есімді азаматтар өздерінің табандылығының арқасында мақсаттарына жетті.

Осынау түлектерге қазыналы қарттар бата беріп, алдағы уақытта асыл дінімізге аянбай қызмет ете беретініне нық сенім білдірді.

Қостанай облыстық мешітінің баспасөз қызметі

ҚМДБ Бас мүфти Наурызбай қажы Тағанұлының тапсырмасы аясында Қостанай облыстық мешіті Бейімбет Майлин ауданына қарасты Новольин, Валерьянка, Әйет, Набережный ауылдарындағы су тасқынынан зардап шеккен және көмекке мұқтаж жандарға қайырымдылық мақсатында қолдау көрсетті.

Онда 100 отбасыға 1 тонна картоп, 500 келі пияз, 300 келі сәбіз, 200 келі қырыққабат таратылды. Олар өз кезегінде демеушілік жасаған азаматтарға ризашылығын білдірді.

Осындай қиын кезде парасаттылықтың жарқын үлесін көрсеткен жүрегі жомарт бауырларымызға Алланың нұры жауа берсін!

Қостанай облыстық мешітінің баспасөз қызметі

Арқалық қаласында су тасқынынан зардап шеккен ағайындармен штаб мүшелерінің бірлескен арнайы жиыны болып өтті. Бұл штаб құрамында облыстың Бас имамы Бахытбек қажы Нұрғабылұлы, Қостанай қалалық "Жайлаубай ата" және «Марал ишан» мешіттерінің Бас имамдары Шоқан қажы Ғазизұлы мен Бектұрсын Торғайбайұлы да бар.

Елімізге танымал дін қайраткерлері аталған басқосуда табиғат апатын бастан өткерген отбасылармен бетпе-бет жүздесіп, сұхбаттасты. Оларды сабырға шақырып, мұқтаждықтарына ерекше көңіл бөлді.

Жергілікті ағайындарға рухани қолдау білдіріп, штаб мүшелері олармен қашанда бірге екендіктерін айтты. Кездесуге келгендер олардың тағылымды әңгімелерінен кейін өздерінің бойларына тың күш-қайрат біткендей сезінді.

Қостанай облыстық мешітінің баспасөз қызметі

Қасиетті Ораза айт мерекесіне орай Әулиекөл аудандық 'Әмит ишан" мешітінің ұжымы бірқатар қайырымдылық шаралар ұйымдастырды.

Мәселен, 18 мұқтаж отбасыға азық-түлік сатып алынды. Сонымен қатар 10 көмекке зәру жанұяға 3 қойдың еті таратылды. 50 балаға айттық қоржыны үлестірілді.

Сондай-ақ, Әулиекөл ауылының тұрғыны Әнуарбек Әділ Бағдатұлына мүгедектер арбасы табыс етілді. Жалпы аталған қайырымдылық шараларына 525000 теңге жұмсалды.

Қостанай облыстық мешітінің баспасөз қызметі

Қазақстан мұсылмандары діни басқармасының төрағасы, Бас мүфти Наурызбай қажы Тағанұлының арнайы тапсырмасымен өңірімізге қарасты Арқалық қаласы, Жангелдин және Амангелді аудандарында су тасқынынан зардап шеккен отбасыларға "Зекет және қайырымдылық" қоры атынан азық-түлік және киім-кешекпен көмек көрсетілді

Ал Қостанай облысының Бас имамы Бахытбек қажы Тәжімбет осы апат болған аймақтарға барып, болған жайды өз көзімен көрді. Жергілікті бауырларымыздың хал-жағдайымен танысып, халықтан жиналған азық-түлік пен қажетті заттарды таратты.

Өңірдегі іскер азаматтар да лайықты үлестерін қосты. Мысалы, «Best Uno» және «Олжа агро» жауапкершілігі шектеулі серіктестіктерінің де басшылары да ұн және басқа да тұтынатын тауарлармен демеушілік жасады.

Қостанай облыстық мешітінің баспасөз қызметі

Ауыл шаруашылығының көрнекті өкілі, Қазақстанның Еңбек Ері Сайран Бұқановтың есімі тек Қостанай өңірі ғана емес, күллі елімізге белгілі. Өз саласының білгір маманы, зиялы азамат, адамгершілік қырларымен де көпке танымал.

Ол қасиетті Рамазан айының құрметіне қалалық «Жайлаубай ата» мешітінде облыс орталығындағы Ораза ұстаған қауымға дастарқан жайып, ауызашар берді.

Онда әруақтарға бағышталып, Құран оқылды. Қадірменді ақсақалдар ризашылығын білдіріп, бата жасады.

-Сайран Балкенұлының ғұмыры өзінен кейінгі інілері мен жастарға ғибрат. Ол біздің мешітке, Ислам дінімізге үлкен құрметпен қарайды. Бүгін беріліп отырған ауызашар соның жарқын айғағы. Ардақты ағамызға алдағы уақытта да мықты денсаулық, отбасына ырыс-береке, молшылық тілейміз,- дейді «Жайлаубай ата» мешітінің Бас имамы Шоқан қажы Әмірханов.

Қостанай облыстық мешітінің баспасөз қызметі

Федоров аудандық «Жиентай қажы» мешітінің Бас имамы Руслан Маратұлы Мәншүк Мәметова атындағы мектептің оқушыларымен кездесті.

Жүздесу барысында ол жастардың тәрбиесіне байланысты уағыз-насихат айтты. Мәселен, өскелең ұрпақты зиянды әдеттерден сақтандыру, оның ішінде құмар ойындарының тигізетін зардабына тоқталды.

Мектеп оқушылары өздерінің толғандыратын сұрақтарына нақты жауап алды.

Қостанай облыстық мешітінің баспасөз қызметі

Қасиетті Рамазан айы басталғалы бері өңірдегі мешіттерде қайырымдылық акциялары өткізіліп, Ораза ұстаған қауымға ауызашарлар беріліп жатқаны белгілі.

Жуырда Қарабалық аудандық «Ғашура ана» мешітінде де облысқа белгілі «Зерновая Индустрия» агрохолдингі мекемесінің ұжымы сауабы мол игі шара өткізді.

Алдымен, көмекке мұқтаж 30 отбасыға қайырымдылық көмек көрсетті. Кешке жамағатқа дастархан жайып, ауызашар берді. Жиналған жұртшылық оларға алғысын жаудырып, ақсақалдар бата жасады.

Қостанай облыстық мешітінің баспасөз қызметі

Қасиетті Рамазан айы кезінде Қостанай облысының Бас имамы Бахытбек қажы Нұрғабылұлы өңіріміздің бірқатар аудандарында іс-сапармен болды. Алдымен, көршілес Ұзынкөлдегі «Құрман баба» мешітіндегі іс-шараға қатысса, содан кейін ат басын Мендіқара ауданына бұрды.

Мұнда жергілікті «Қарамақы ата» мешітінің жамағатымен кездесті. Жүздесу барысында тағылымдық-тәрбиелік мәні зор «Сабырлылық-Оразаның құндылығы», «Түнгі құлшылықтардың сауаптылығы» тақырыптарын қозғады.

Жиналған қауым Бас имамның уағыз-насихаттарын ұйып тыңдап, кездесуден үлкен әсер алды.

Қостанай облыстық мешітінің баспасөз қызметі