Қостанайдағы маңызды кездесу

Қалың жұртшылыққа Қазақстан мұсылмандары діни басқармасының жанындағы «Мұнара» телеарнасының журналистері халыққа қалтқысыз қызмет көрсетіп келе жатқандығы белгілі.

Жуырда осы шығармашылық ұжымының Бас директоры Болат Көкенайұлы, бас продюсері Дәурен Құдайберген, бас режиссері Мүсілім Жұмағазыұлы, бас операторы Ербол Малыбайлар арнайы іс-сапармен Қостанай өңіріне келді.

Олар алдымен облыстық «Аймағанбет қажы Спанұлы» мешітіне атбасын бұрды. Бас имам Бектұрсын қажы Уәлиев қонақтарды жылы жүзбен қарсы алып, өңірдегі қалыптасқан діни ахуал туралы сұхбат берді. Сонымен қатар белгілі ғалым, тарих ғылымдарының докторы Аманжол Күзембай Тобыл-Торғай жерінен шыққан айтулы тұлғалар мен қайраткерлер жайлы кеңінен әңгімеледі. Жыр-термеші Абзал Алпыста өңірден шыққан қайраткерлер туралы терме шертті. Биылғы жылды «Ислам және отбасы құндылығы» аясында болғандықтан орыс тілінде ұстаз Ансаған Абдурахман әсерлі сұхбат берді.

Торғайлық ағайындармен қауышу

Елордалық тележурналистер сапарларын одан әрі қазақтың қаймағы бұзылмаған Торғайда жалғастырып, киелі орындарды аралады. Қаншама кейінгілерге тағылым болар рухани қазыналарды таспаға түсірді.

Есімдері еліміздің тарихында алтын әріптермен жазылған Алаш ардақтылары Ахмет Байтұрсынұлы мен Міржақып Дулатұлының кесенелеріне зиярат етіп, мұражай кешеніне саяхат жасады. Жангелдин аудандық «Оспан қожа әулие» мешітін аралап, Бас имам Айдос Серікұлынан сұхбат алды.

Содан кейін қонақтарды көршілес жатқан Амангелді аудандық «Сатыбалды ишан» бас имамы Нұрсұлтан Шамшиден күтіп алды. Ислам діні жолындағы атқарылып жатқан игі істер жайлы баяндады. Алқа мүшесі Балға Нұрғожин бар ғұмырын дінді насихаттауға арнаған ғұлама тұлға Сатыбалды ишан туралы әңгімеледі. Сондай-ақ, жүздесуде «Ислам және отбасы құндылығы» жылы аясында уағыз-насихат айтылды.

Арқалықтағы игі істер

Сапар барысында «Мұнара» телеарнасының қызметкерлері жылдан-жылға көркейіп келе жатқан Арқалық қаласындағы «Мухтасиб Әлмұхаммед» мешітінің тыныс-тіршілігімен танысты. Бас имам Нұрхан Асанұлы имандылық ордасының атауы жөнінде мағлұмат берді.

Арқалық шаһарындағы Дала өлкесі тарихы облыстық мұражайда журналистерге белгілі оюшы, қолөнер шебері, этнограф-тарихшы, қаланың құрметті азаматы Шөптібай Байділдин Торғай өңірінің тарихы жайлы сыр шертті. Содан кейін аталмыш мешіттің алқа мүшесі Марат Сұлтанбеков жұбайы аналар кеңесінің мүшесі Күлайхан Нұрғалиева шаңырағындағы арнайы түсірілімнің тәрбиелік мәні зор үлгілі отбасы жайлы ойын ортаға салды. Мұнда қазіргі таңдағы өзекті мәселе шаңырақтың беріктігі, салауатты өмір салтын ұстану жөнінде насихат айтылды.

Астанадан арнайы келген тележурналистердің сапарлары нәтижелі өтті. Олармен бірге облыстық «Аймағанбет қажы Спанұлы» мешітінің наиб имамы Абзал Сұлтанғалиұлы жүрді.

Қостанай облыстық мешітінің баспасөз қызметі

Қостанай ауданы бойынша "Мектепке жол" акциясын жалғасын ауылдарда тапты. Атап айтқанда қалаға іргелес жатқан Алтынсарин ауылында 30 балаға дмеушілік танытылып мектепке қажетті құрал жабдық сөмкесімен тарту етілді.

Сонымен қатар осы шара Жамбыл, Алтындала, Мәскеу ауылдарында да әр жыл сайын жалғасын тауып келеді.

Әрине бұл демеушілердің және халықтың арқасында халқымыздың тәрбиесі арқылы жасалып жатқан өнегелі іс.

Осынау сауапты іске атсалысқан барша жанашыр жандарға Алла Тағаланың нұры жауа берсін.

Қостанай облыстық мешітінің баспасөз қызметі

Қостанай қалалық «Жайлаубай ата» мешітінің ұжымы “Имани жаз” сауат ашу курсының екінші кезеңінде 31 шәкіртке тиянақты білім берді.

Жуырда оларға салтанатты түрде сертификат табыс етілді. Балаларды оқытқан ұстаздар Ақтан Төлтаев мен Әбілқасым Абдурахманұлы еңбегі ерекше аталып өтті. Сабақ барысында шәкірттерге барлық жағдайлар туғызылды.

Қостанай облыстық мешітінің баспасөз қызметі

Қазақстан мұсылмандары діни басқармасының төрағасы, Бас мүфти Наурызбай қажы Тағанұлының атынан екі кісіге берілген жолдамамен мүмкіндігі шектеулі Мейрам Қошқарбайұлы мен Виталий Тупикин Ұмра қажылыққа аттанған болатын.

Жуырда осы есімдері аталған азаматтармен қатар Рудный қаласының тұрғыны, мешіттің тұрақты жамағаты Ұрқия Захраддинқызы Ұмрадан аман-есен оралды. Оған мұндай сыйлықты Ораза айында жанашыр жандар тарту еткен еді.

Оларды Ахмет Байтұрсынов атындағы халықаралық әуежайда облыстық мешіттің имамдары, ұстаздар мен жамағат қарсы алып, Ұрқия Захраддинқызына гүл шоқтарын табыс етті. Жерлестеріміз қажылықтан алған әсерлерімен бөлісіп, Бас мүфти мен барша ағайынға алғыстарын білдірді.

Бұл киелі сапарды Діни басқармаға қарасты «Tawaf Travel» қажылық компаниясы жүзеге асырды.

Қостанай облыстық мешітінің баспасөз қызметі

Қазақстан мұсылмандары діни басқармасының тапсырмасымен барлық өңірлерде «Мектепке жол» акциясы ұйымдастырылып жатқаны белгілі. Бұл орайда Қостанай облысы бойынша өкілдігі мен «Зекет және қайырымдылық» қорының өкілі, наиб имамы Бақытжан қажы Икрамның айтуы бойынша Қостанай облысында 863 ұл мен қызға 9 298 793 тенгеге қайырымдылық көмек көрсетіліп, мектепке қажетті сөмке мен құрал-жабдықтар тапсырылды. Әрине, жаңа оқу жылы қарсаңында оларға ең ізгі тілектер айтылды. Ата-аналар қауымы акцияны ұйымдастырушылар мен демеушілерге шынайы алғысын білдірді.

Қостанай облыстық мешітінің баспасөз қызметі

Жақында Қостанай аудандық "Маңдай батыр" мешітінің бас имамы Дархан Сыздықов жергілікті ішкі істер бөлімінде тергеу орнында уақытша қамауда отырғандармен кездесу өткізді.

Онда отбасындағы құндылық пен сыйластық жөнінде айтылды.

Мүмкіндігінше шаңырақтағы ерлі-зайыптылардың арасындағы түсініспеушіліктен аулақ болу, жанұя мүшелерінің бір-біріне құрметпен қарау, туған-туысқандары мен айналасындағы адамдарға мейірімділік таныту хақында сөз болды.

Қостанай облыстық мешітінің баспасөз қызметі

Қостанай аудандық "Маңдай батыр" мешітінің ұжымы демеушілер мен жамағаттың қолдауымен "Мектепке жол" акциясын ұйымдастырды. Онда бастауыш және жоғары сыныптарда оқитын 50 балаға 500 мың теңгені құрайтын сөмке және оқуға қажетті құралдар табыс етілді.

Осынау сауапты іске атсалысқан барша жанашыр жандарға Алла Тағаланың нұры жауа берсін.

Қостанай облыстық мешітінің баспасөз қызметі

Қазақстан мұсылмандары діни басқармасының Қостанай облысындағы өкілдігі дін мен дәстүр аясында «Аймағанбет қажы Спанұлы» мешітінің жанындағы «Файзолла қари» оқу орталығының ұйымдастыруымен шәкірттерге сертификат табыс етті. Олар жазғы үш ай демалысты тиімді пайдаланып, уақыттарын босқа өткізбеді. Құран және тәджуидтен сабақ алды. Сөйтіп, қырыққа жуық бала құранға түсті.

Олардың ішінен 11 бала іріктелді. Осы талапкерлер қазір өңірдегі Қостанай ауданына қарасты Алтынсарин ауылында салынып жатқан қариларды даярлау медресесінің құрылысы аяқталғаннан соң оның алғашқы түлектері болады.

Осы балаларға құраннан дәріс беріп, әдеп пен имандылыққа баулыған білікті ұстаздар Мұртаза Балахмет пен Сұңғат Қызылбай екендігін ерекше атап өткен жөн.

Қостанай облыстық мешітінің баспасөз қызметі

ҚАЗАҚСТАН МҰСЫЛМАНДАРЫ ДІНИ БАСҚАРМАСЫның ҚОСТАНАЙ ОБЛЫСЫ БОЙЫНША ӨКІЛДІГІ, Құран Кәрімді жатқа және мәнерлеп оқудан іріктеу сайысын өткізді.

Жарыс басталмас бұрын Қостанай облысының Бас имамы Бектұрсын қажы Торғайбайұлы Құранның қадір қасиеті мен оны жаттаған пенденің ақыреттегі дәрежесі жайлы тағылымы мол сөз сөйледі. Барлық жарысқа қатысушыларға сәттілік тіледі.

Іріктеу байқауына өңірдегі аудандар мен қалалардан қырық талапкерлер қатысып, бақтарын сынады. Олар 30, 20, 10 парадан және мәнерлеп оқудан білімдерін көрсетті.

Әділқазылық еткен Мұртаза Балахмет, Әкімбек Асанов, Сұңғат Қызылбайлардың шешімі бойынша құранды жатқа оқудан жүлделі орындарға 30-шы парадан 1-ші орын Сұлтан Жасұланұлы иеленсе 2-ші орынды Ералы Алматұлы, 3-ші орынды Рустам Аманұлы қанағат тұтты. Құранның 20-шы парасынан 1-ші болып, Мұхиддин Имамуддинұлы, 2-ші Заманбек Бейсенбайұлы орынға ие болды. 10-шы парадан 1-ші орынға Айдын Талғатұлы, 2-ші Қасым Бекзатұлы алған болса 3-ші орынды Абдурахман Русланұлы жеңіп алды. Мәнерлеп оқудан Иманғали Сембіұлы бірінші орынды алған болса Жандос Қайырбекұлы мен Мұстафа Науанұлы әсем оқумен көзге түсті. Жүлдегерлерге арнайы сертификат және ақшалай сыйлықтар табыс етілді.

Аталмыш сайыста жеңімпаз атанған шәкірттер алдағы уақытта Талдықорған қаласында өтетін XIV республикалық құран байқауында Қостанай облысының намысын қорғайтын болады.

Қостанай облыстық мешітінің баспасөз қызметі

Діни проблемаларды зерттеу орталығының арнайы шақыруымен республикалық АТТ мүшесі, Ақтөбе қаласындағы «Ихсан» ҚБ орталығының теолог маманы Қостанайда болды.

Ол сапар барысында қала, аудан мешіттерінің әйел жамағаты мен ұстаздарының біліктілік деңгейін көтеру мақсатында облыстық «Аймағамбет қажы Спанұлы» мешітінде оқыту семинарын өткізді.

Өз саласының білгірі қатысушылар тарапынан қойылған сұрақтарға нақты жауап берді.

Қостанай облыстық мешітінің баспасөз қызметі