Қостанай облысына қарасты қала, аудан мешіттерінде Төтенше жағдайлар департаментінің қызметкерлері жамағатпен арнайы кездесу өткізіп, өрт қауіпсіздігі ережелерін түсіндірді.

Кездесу барысында мамандар тұрмыстық жағдайда өрттің жиі шығу себептеріне тоқталып, электр құралдарын пайдалану кезінде сақтық шараларын сақтау қажеттігін айтты. Сонымен қатар мешіттердің өзінде де өрт қауіпсіздігі талаптарының орындалуы, эвакуациялық жолдардың ашық болуы, өрт сөндіргіш құралдардың жарамдылығы жөнінде түсіндіру жұмыстары жүргізілді.

Жамағат тарапынан қойылған сұрақтарға мамандар нақты жауап беріп, ақпараттық жадынамалар таратты. Бұл алдын алу шаралары өңір мешіттерінде қауіпсіздік мәдениетін күшейтіп, кез келген төтенше жағдайдың алдын алуға бағытталған.

Қостанай қалалық “Жайлаубай ата” мешітінің ұстазы Аяулым Ермекқызының ұйытқы болуымен “Ана дауысы” атты семинар өткізілді.

Аталмыш семинардың мақсаты - ерекше балаларды тәрбиелеп жатқан аналарға қолдау көрсетіп, көкейде жүрген сауалдарына нақты да септігін тигізер жауап табу.

Жиында жамағат осындай балаларды білікті мамандармен кездестіріп, олардың ой салар пікірлерін тыңдады.

Семинар соңында аналарға гүл шоқтары ұсынылып, массажға тегін сертификаттар табыс етілді.

Қостанай облыстық мешітінің баспасөз қызметі

Қарабалық ауданының “Ғашура ана” мешітінің Бас имамы Есбол Айтмұханбекұлы Федоров ауданына келіп “Жаркөл”аудандық мешітінде құптаң намазының алдында “Білімнің маңыздылығы”жайында уағыз насихат айтып сұрақтарға жауап берді. Құптан намазынан кейін құрметті қонаққа және жамағатқа дастарқан жайылып ыңтымақ, бірлік жайында насихат айтылды. Жиын соңында алқа мүшесі Сәбит ақсақал бата берді. Жамағат рухани азық алып, дән риза болып тарқасты.

Қостанай облыстық мешітінің баспасөз қызметі

Қостанай қалалық «Жайлаубай ата» мешітінің ұйымдастыруымен рухани-танымдық бағыттағы маңызды кездесу өтті. Шараға арнайы шақырылған ақын Абылай Мауданов «Кітап оқитын ұлт» тақырыбында ақсақалдар мен жиналған қауымға тағылымды әңгіме өрбітті. Ол кітап оқудың адам санасын, ой-өрісін кеңейтудегі рөлін атап өтіп, жастар мен үлкендерге пайдалы бағыттарда кеңестерін жеткізді.

Жиынға облыстық кітапхананың мамандары да қатысып, тыңдаушылар назарына арнайы әзірленген кітап көрмесін ұсынды. Қатысушылар еліміздің тарихы, руханияты, әдебиеті туралы құнды еңбектермен танысып, кітапхана қоры жайында мәлімет алды.

Шара соңында сөз сөйлеген дін өкілдері мен ақсақалдар кітап оқуға шақырудың маңызын атап өтіп, қоғам дамуы ең алдымен сауаттылық пен білімге ұмтылудан басталатынын жеткізді.

«Ұлтымыз білімді болса – қоғамымыз түзеледі. Білімге ұмтылған елдің болашағы да жарқын» деген ортақ пікір айтылып, қатысушылар кездесуден рухани әсер алып тарқасты.

Қостанай облыстық мешітінің баспасөз қызметі

ҚМДБ-ның Қостанай облысы бойынша өкілдігінің ұйымдастыруымен жуырда облыстың Бас имамы Бектұрсын қажы Торғайбайұлы ас жүргізетін бір топ асабамен арнайы кездесу өткізді. Жиын қазіргі қоғамда өзекті мәселелердің бірі – ас беру рәсімдеріндегі орынсыз шығындарды азайту және өткен жылы қабылданған «Ысырапшылдықтың алдын алу» құжатының талаптарын түсіндіруге арналды.

Бас имам өз сөзінде:
— құжаттың қабылданғанына бір жыл болғанымен, кей өңірлерде талаптардың толық орындалмай жатқаны,
— ас беру мәдениетінде әлі де бәсекеге, даңғазаға ұмтылу, жөн-жосықсыз ысырап ету жағдайлары кездесетінін атап өтті.

Осы орайда, асабалардың қоғамға тікелей ықпал ететін топ екенін, сондықтан әрбірі халыққа дұрыс бағыт-бағдар беріп, артық шығыннан сақтандыруға атсалысуы қажет екенін айтты.

Кездесуде қозғалған негізгі ұсыныстар мен талаптар:

Қонақ асын мейрамхана, кафе сияқты орындарда беруді тоқтату, қарапайым үй жағдайында тек сырттан келген қонақтарға ғана ас берілуі керек.

Дастархан мәзірін жеңілдетіп, артық шығынға апаратын тағам түрлерін азайту: тек бауырсақ, кәмпит, печенье, шай және бір мезгілдік қарапайым ыстық тамақпен шектелу;

Ас барысында үш адамнан артық сөз сөйлетпеу, шараны ұзаққа созбай, шариғатқа сай ықшам түрде өткізу;

Ас берудің мәні – марқұмның рухына дұға оқып, тағылым айту екенін халыққа жиі түсіндіріп отыру.

Бас имам кездесуге жиналғандарға қоғам алдындағы жауапкершіліктерін еске сала отырып, әрқайсысын қарапайымдылық пен мәдениеттілікті насихаттауға, ысырапқа жол бермеуге шақырды. Сонымен бірге, құжаттың талаптарын орындау – тек мешіт қызметкерлерінің міндеті емес, бүкіл қоғамның ортақ мәселесі екенін атап өтті.

Кездесу соңында тараптар уағдаласып, алдағы уақытта түсіндіру жұмыстарын бірлесе жүргізуге келісім білдірді.

Қостанай облыстық мешітінің баспасөз қызметі

Қостанай облыстық Аймағанбет қажы Спанұлы мешітінің наиб имамы Азамат Мурзаканов жуырда Астана қаласына іссапармен барып, медреседе білім алып жатқан студенттермен арнайы кездесу өткізді. Басқосу жылы әрі ашық форматта өтіп, болашақ түлектердің діни саладағы жоспарлары жан-жақты талқыланды.

Кездесудің басты мақсаты – Қостанай облысына қарасты қала және аудан мешіттеріне жас мамандарды тарту, өңірдегі діни кадр тапшылығын жою және жастарды жауапты қызметке баулу. Қазіргі таңда Қостанай өңірінде имам, ұстаз қызметтеріне қажет мамандар саны артқандықтан, осы бағыттағы жүйелі жұмыстар жалғасып келеді.

Азамат Мурзаканов студенттерге аймақтағы діни қызметтің ерекшеліктері, мешіт жұмысының ұйымдастырылуы, жамағатпен жұмыс жүргізу әдістері және имамның қоғам алдындағы жауапкершілігі жайында кеңінен түсіндірді. Сонымен қатар, діни қызметтің тек құлшылық жүргізумен шектелмей, жас ұрпақты тәрбиелеу, ұлттық құндылықтарды насихаттау, қоғам бірлігін нығайту сияқты маңызды бағыттарды қамтитыны айтылды.

Сондай-ақ, түлектер үшін Қостанай облысында жас мамандарға жасалатын жағдайлар, қызметтік өсу мүмкіндіктері, тәжірибе алмасу, курстар мен семинарларға қатысу секілді қолдаулардың бар екені де атап өтілді.

Кездесу соңында студенттер өз сауалдарын қойып, өңірге барып қызмет етуде қызығушылық танытқандар да болды. Тараптар алдағы уақытта да өзара байланыс пен ынтымақтастықты жалғастыруға келісім білдірді.

Қостанай облыстық мешітінің баспасөз қызметі

Бүгін Алматы қаласында Қазақстан мұсылмандары діни басқармасы жанындағы Сарапшылар кеңесінің IX кезекті мәжілісі өтті. Жиынға ҚМДБ Төрағасы, Бас мүфти Наурызбай қажы Тағанұлы төрағалық етті.

Мәжіліс барысында Діни басқарманың 2025 жылы атқарған жұмыстары жөніндегі есеп ұсынылып, негізгі бағыттар бойынша баяндама жасалды. Сондай-ақ «Қазақстан мұсылмандарының ортақ құндылықтар тұғырнамасы» құжаты жан-жақты талқыланып, оның мазмұнын толықтыруға қатысты сарапшылардың ұсыныстары тыңдалды.

Кеңес отырысында діннің атын жамылып қате пәтуа беретіндерге, әлеуметтік желілерде дінді теріс танытып, қоғамда түсінбеушілік тудыратын ақпарат таратушыларға қатысты мәселелер талқыланды. Сарапшылар бұл бағытта ақпараттық түсіндіру жұмыстарын күшейту қажет екенін атап өтті.

Сонымен қатар отбасы институтының әлсіреуі мен ажырасу деңгейінің артуы да күн тәртібіндегі маңызды тақырыптардың бірі болды. Жиынға қатысушылар шариғат тұрғысынан шешім жолдарын, отбасылық құндылықтарды насихаттаудың тиімді тетіктерін және қоғамдағы түсіндіру жұмыстарын күшейту бағыттарын ұсынды.

Бас мүфти Наурызбай қажы Тағанұлы өз сөзінде Сарапшылар кеңесінің атқарып келе жатқан жұмыстарының маңызын атап өтіп: «Біз қоғамдағы діни ахуалды ғылыми негізде талдап, өзекті мәселелерге ұтымды шешімдер ұсынуымыз қажет. Бұл – Діни басқарманың басты міндеттерінің бірі», – деді.

Мәжіліс қорытындысы бойынша ұсыныстар жинақталып, алдағы жұмыс жоспарына енгізілетін болды.

Бүгін Алматы қаласында Қазақстан мұсылмандары діни басқармасы жанындағы Ислам ғылыми-зерттеу институтынан Сирек кітаптар мен қолжазбалар қоры ашылды.

Салтанатты ашылу рәсіміне ҚМДБ Төрағасы, Бас мүфти Наурызбай қажы Тағанұлы, Ғұламалар кеңесі мен Сарапшылар кеңесінің мүшелері, дін ғалымдары және зиялы қауым өкілдері қатысты.

Өз сөзінде Бас мүфти еліміздегі көптеген мешіттерде сақталған қолжазбалар мен сирек кітаптар қорының мол екенін атап өтіп, оларды бір орталыққа шоғырландыру, цифрландыру, ғылыми айналымға ендіру арқылы болашақ ұрпаққа жеткізудің маңызды екеніне тоқталды.

Институт директоры, филология ғылымдарының кандидаты Төрәлі Қыдыр орталық жұмысы туралы кеңірек баяндап, қазіргі таңда қорда 100-ден астам сирек кітап пен қолжазбаның сақтаулы екенін мәлімдеді. Олардың ішінде Ахмет Иасауидің «Диуани хикмет», Алтын Орда тұсында өмір сүрген Рабғұзидың «Қисас әл-әнбия» секілді құнды жазба жәдігерлермен бірге ислам ілімдеріне қатысты өзге де құнды еңбектердің бар екендігін атап өтті.

Сондай-ақ алдағы уақытта бұл қордағы материалдарды толық цифрландырып, интернеттегі ортақ базада қолжетімді ету, каталогтау және ғылыми сипаттамасын жасау жұмыстары жоспарланып отыр. Бұл – еліміздегі исламтану және қолжазбатану ғылымына қосылған сүбелі үлес болмақ.

Қазіргі таңда ел бойынша ҚМДБ-ға қарасты мешіттерде көптеген қолжазба мен сирек кітап бар екені анықталған. Болашақта олардың барлығын орталықтандыру, қалпына келтіру және ғылыми айналымға қосу бағытында кешенді жұмыстар жүргізілу жоспарланып отыр.

Бүгін Алматы қаласында Бас мүфти Наурызбай қажы Тағанұлының төрағалығымен Қазақстан мұсылмандары діни басқармасы жанындағы Ғұламалар кеңесінің 46-мәжілісі басталды.

ҚМДБ Төрағасы Наурызбай қажы Тағанұлы: «Кеңес құрылған күннен бастап, 45 мәжілісі өтті. Бүгінгі күнге дейін 60 концептуалды құжат пен ҚМДБ мәлімдемесі қабылданды. Шариғи, әлеуметтік, медецина, отбасы, неке бағытында және т.б. тақырыпта 167 пәтуа бекітілді. Нәтижесінде 5 томпәтуалар жинағы кітабы жарыққа шықты. Сондай-ақ Кеңес отырыстарында 18 кітап талқыланып, баспаға ұсынылды.

Өздеріңіз білесіздер, қыркүйек айында Түркі мемелекеттері ұйымына мүше елдердің Бас мүфтилер алқасы кезекті 6-шы мәжілісін Қырғызстан Республикасында өткізді. Біз сол жердегі мәжіліске 5 томдық пәтуалар жинағының қазақ және ағылшын тілінде әзірлеп, Дін басыларына сыйға бердік»,-деді Бас мүфти.

Мәжіліс барысында төмендегідей пәтуалар талқылану жоспарлануда:

1. Дипностальгия (Deep Nostalgia) үкімі
2. Даяшының қызметіне ақы төлеудің үкімі
3. Биотокпен емдеудің үкімі
4. Липосакция жасатудың үкімі
5. Фолловер санын ақыға арттырудың үкімі
6. BNPL (Buy Now, Pay Later) жүйесі арқылы мүлік сатып алу үкімі
7. Дипфейк (deepfake) үкімі

Сонымен қатар «Қазақстан мұсылмандарының ортақ құндылықтар тұғырнамасы» құжатын талқылау жоспарлануда.

Бас мүфти Наурызбай қажы Тағанұлының төрағалығымен Алматы қаласында өткен Ғұламалар кеңесінің 46-мәжілісінде бірқатар пәтуалар қабылданды.

Мәжіліс барысында
1. Дипностальгия (Deep Nostalgia) үкімі,
2. Биотокпен емдеудің үкімі,
3. Фолловер санын ақыға арттырудың үкімі,
4. BNPL (Buy Now, Pay Later) жүйесі арқылы мүлік сатып алу үкімі,
5. Дипфейк (deepfake) үкімі сынды құжаттардың мазмұны бекітілді.