Қасиетті Рамазан айында Арқалық қалалық «Мухтасиф Әлмұхаммед» мешітінің Бас имамы Балғабай Шайкемелов жергілікті педагогикалық университетте болды.

Ол аталмыш білімнің қара шаңырағында студенттермен кездесіп, “Имандылық, адамгершілік пен ізгіліктің тірегі” атты рухани кешке қатысты.

Жүздесу барысында маңызды тақырыпты қозғап, жиналғандарды Оразамен құттықтады. Жастар өздерінің көкейінде жүрген сауалдарына нақты жауап алды.

Қостанай облыстық мешітінің баспасөз қызметі

Рамазан – мұсылман қауымы үшін айрықша маңызға ие қасиетті кезең. Бұл ай адам баласын рухани кемелдікке, көркем мінезге тәрбиелейтін үлкен тәрбие мектебі болып табылады. Рамазан айында әрбір мұсылман өз-өзіне есеп беріп, жүрегін тазартуға, иманын күшейтуге ұмтылады.

Асыл дініміздегі ең ұлы құлшылықтардың бірі – ораза. Әлбетте, ораза тек таңнан кешке дейін ішіп-жеуден тыйылу емес, адам баласын рухани тұрғыда тәрбиелейтін үлкен мектеп. Сондықтан да оразаны «тәрбие мектебі» деп атау өте орынды.

Ең алдымен, ораза адамды сабырға үйретеді. Аштық пен шөлге төзу арқылы мұсылман өз нәпсісін тәрбиелей бастайды. Күнделікті өмірде кездесетін қиындықтарға төзімді болып, ашу-ызасын мейлінше тежеп, өзін-өзі ұстай білуге машықтанады. Құран Кәрімде Алла Тағала:

الَّذِينَ يُنفِقُونَ فِي السَّرَّاء وَالضَّرَّاء وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللّهُ يُحِبُّ الْمُحْسِنِينَ

«Тақуалар кеңшілікте де, таршылықта да Алланың жолына жұмсап тұратындар, ашу-ызасын баса алатындар, адамдарды кешіре білетіндер. Алла жақсылық жасаушыларды ұнатады» – (Әли Ғимран сүресі, 134-аят) деп баяндаған. Ардақты Пайғамбарымыз Мұхаммед (с.ғ.с) оразаны «қалқан» деп сипаттауы да бекер емес. Яғни ораза адамды әрқандай жамандық атаулыдан сақтайды. Міне, оразаның да басты мақсаты – Алладан қорқып, әрбір ісіне жауапкершілікпен қарауға тәрбиелеу. Осы тәрбие арқылы тақуалыққа жету. Құран Кәрімде:

يَا أَيُّهَا الَّذِينَ آمَنُواْ كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ

«Иә, мүміндер, өздеріңнен бұрынғыларға парыз етілгендей, сендерге де ораза парыз етілді. Бәлкім, сендер тақуа боларсыңдар», (Бақара сүресі, 183-аят) - делінген. Бұл аят оразаның басты мақсатын айқын көрсетеді. Яғни ораза бізді тақуалыққа, Алладан қорқып, әр ісімізді ойланып жасауға үйретеді.

Адам ораза кезінде жалғыз қалса да, Алланың көріп тұрғанын сезінеді. Бұл қасиет адамның күнделікті өмірінде де адал болуына жол ашады.

Хазіреті Әли ибн Әбу Талиб (р.ғ): «Көркем мінез үш қасиетпен келеді: арамнан аулақ болу, адалды талап ету және отбасына кеңпейілді болу», – деген екен. Дана халқымыз да өз ұрпағына ісіне адал болуды, біреудің ала жібін аттамауды насихат етіп келген. Адалдық – бұл жүректің тазалығы, өмірдің жарығы және сенімнің негізі. Адалдық тек жеке адамның қасиеті емес, бүкіл қоғамның гүлденуіне септігін тигізетін мінез. Егер әр адам өз ісінде адал болса, қоғамда сенім, татулық пен бейбітшілік арта бермек.

Нәпсіні тәрбиелеу – ішкі бақылау мен иманның күшеюі. Негізінде нәпсі тәрбиесі – бір сәттік әрекет емес, үздіксіз жүретін рухани күрес.

Ғұлама Хасан әл-Басри: «Нәпсінің жетегінде кеткен адам – өз қалауының құлы болғаны. Кімде кім нәпсі қалауына иелік етсе, нәпсісінің патшасына айналады» - деген. Адам сабыр сақтауды, ашуын тиюды, қалауын ақылға бағындыруды үйренген сайын жүрегі тазарады, ниеті түзеледі. Нәпсісін жеңе білген жан адалдыққа жақындап, жауапкершілікті терең сезінеді. Өйткені нәпсіні тәрбиелеу – өз-өзіңді танудың, кемелдікке ұмтылудың және Алла разылығына жетудің жолы.

Рамазан айында мұсылман баласы нәпсісін тізгіндей отырып, барлық дене мүшелерін де тәрбиелеуге ұмтылады. Өйткені оразаның шынайы сауабы – күнәдан тыйылып, көркем мінез қалыптастыруда. Ораза кезінде тілге, көзге, жүрекке ие болу – нағыз тәрбиенің көрінісі. Ауыз бекіткен жан жаман сөзден, өсектен, біреуді ренжітуден сақ болуы керек. Өйткені оразаның сауабын кетіретін де – осы жағымсыз әрекеттер. Енді осы дене мүшелерімізге қатысты бір тоқталып өтсем:

- Тіл тәрбиесі: оразада тілге ерекше жауапкершілік жүктеледі. Өтірік айту, жала жабу, дөрекі сөйлеу – оразаның сауабын кемітетін істер.

Мүмкіндігінше әдепті әрі салмақты сөйлеген жөн. Құранда Алла тағала:

يَا أَيُّهَا الَّذِينَ آمَنُوا اتَّقُوا اللَّهَ وَقُولُوا قَوْلاً سَدِيداً «Тура әрі орынды сөз сөйлеңдер» (Ахзаб сүресі, 70-аят) – деген.

Тіл – есеп берілетін аманат. Сол үшінде құранда:

«Ауызынан шыққан әрбір сөзін бақылап жазып отыратын періштелер бар» (Қаф сүресі, 18-аят) – деп ескертілген. Яғни, әр сөзіміз үшін қиямет күні жауап береміз. Бұл – тіл тәрбиесінің жауапкершілігін терең сезіндіреді. Тілді жамандықтан сақтау, өсек, ғайбаттан тыйылу және жақсы, пайдалы сөз сөйлеу – иманның кемелдігінің белгісі. Тілі түзелген адамның жүрегі де, қоғамы да түзеледі. Пайғамбарымыз (с.ғ.с.):

مَن لَمْ يَدَعْ قَوْلَ الزُّورِ والعَمَلَ به، فَلَيسَ لِلَّهِ حَاجَةٌ في أنْ يَدَعَ طَعَامَهُ وشَرَابَهُ

«Кімде-кім өтірік сөз бен жаман істі тастамаса, Алла Тағала оның ішіп-жеуден тыйылуына мұқтаж емес», - деген. Сондықтан оразада тіл тек жақсы сөзге, зікірге, дұғаға, пайдалы әңгімеге дағдылануы тиіс.

- Көз тәрбиесі: адам тәрбиесінің маңызды бір саласы – көз тәрбиесі. Көз жүректің айнасы, ал жүрек – иманның ордасы. Оразада харамға қараудан, арсыз көріністерден, қызғаныш пен жаман ой тудыратын нәрселерден көзді сақтау маңызды. Құран Кәрімде: قُل لِّلْمُؤْمِنِينَ يَغُضُّوا مِنْ أَبْصَارِهِمْ َ

«Мүмін ерлерге айт: көздерін (харамнан) төмен салсын», - деп бұйырылған. Бұл аят көздің де есепке тартылатынын ескертеді. Яғни, адам әрбір қараған нәрсесіне жауап береді. Себебі, харамға қарау жүректе жаман ойдың тууына, ал жаман ой күнәлі іске жетелейді. Сонымен бірге, иманның ләззатын сезінуге де тікелей әсер етеді. Бұл жайында Абдулла бин Масғұд (р.а.) риуаят

еткен хадисте: «Ақиқатында көз салып қарау – Ібілістің улы жебелерінің бірі. Кімде-кім Менен қорыққандықтан қарауын қойса, жүрегінде ләззатын сезінетін иманмен алмастырамын», (Табарани) – делінген. Шариғатымыз адам баласына тек сыртқы әдепке емес, ішкі тазалықты да үйретеді. Ал, бұл өз кезкгінде – оразаның рухани тазалығын арттырады. Көз тәрбиесі – нәпсіні тәрбиелеудің, ар-ұятты сақтаудың және қоғамды азғындықтан қорғаудың маңызды жолы. Көзін харамнан сақтаған жан жүрегін де күнәдан қорғайды. Ал, жүрегі таза адам – көркем мінездің иесі болмақ.

- Құлақ тәрбиесі: құлақ-та тәрбиені қажет етеді. Өсек, ғайбат, жалған сөз, бос әңгімелерді тыңдау – адамды рухани әлсіретеді. Оразада құлақты Құран тыңдауға, уағыз-насихатқа, пайдалы білімге бағыттау – үлкен сауап.

- Қол тәрбиесі: қол – амалдың айнасы. Оразада қолды харамға, қандай-да бір зұлымдыққа, біреуге зиян тигізуге емес, керісінше, жақсылыққа, көмекке, садақа беруге, адал еңбекке жұмсап, пайдалану қажет.

- Аяқ тәрбиесі: аяқ адамды жақсылыққа да, жамандыққа да апарады. Оразада аяқты күнә орындарынан аулақ ұстап, мешітке, ізгі амалға, жақсылық жасайтын орындарға бағыттау да – тәрбиенің бір көрінісі.

- Жүрек тәрбиесі: дене мүшелерінің тәрбиесі жүрекпен тығыз байланысты. Көреалмаушылық, кек, тәкаппарлық, ашу сияқты жаман қасиеттерден арылып, жүректі кешірімге, сабырға, шүкіршілікке, ықыласқа баулу – оразаның ең үлкен мақсаты. Алла Тағала адамға берілген нығметтер үшін жауапкершілік жүктеп, құранда былай дейді:

إِنَّ السَّمْعَ وَالْبَصَرَ وَالْفُؤَادَ كُلُّ أُولـئِكَ كَانَ عَنْهُ مَسْؤُولاً «Расында, құлақ, көз және жүрек – солардың барлығы үшін сұрау бар». (Исра сүресі, 36-аят).

Қадірлі оқырман қауым! Демек, ораза тек асқазанға ғана емес, барлық дене мүшелерімізге де қатысты екен. Кімде-кім оразасын тек аш жүрумен шектемей, мінезін де түзесе, ол адам Рамазан атты мектептен үлкен пайдамен шығады. Түсінген жан үшін ораза бұл – бір айлық құлшылық қана емес, өмір бойына жететін тәрбие көзі.

Ораза – тұтас тәрбие мектебі. Ол адамды сабырлы, әдепті, жауапкершілігі мол тұлға етіп қалыптастырады. Дене мүшелерін күнәдан тыю арқылы адам рухани биіктеп, Аллаға жақындай түседі. Нағыз ораза – бүкіл болмыспен ұсталған ораза деп айтар едім. Тоқсан ауыз сөздің тобықтай түйіні «Рамазан айы» – адамды рухани жетілдіретін, мінез-құлқын көркемдейтін, қоғамға пайдалы тұлға етіп тәрбиелейтін ұлы мектеп. Қасиетті айдан алған тәлім мен тәрбие жыл бойы өмірімізге жолбасшы болса, жеке адам да, тұтас қоғам да кемелдене түсері анық.

Рамазан айында жасаған амалдарымыз бен ізгі ниеттерімізді Алла Тағала қабыл етіп, сауапты істеріміз мол болғай! Тәуелсіздігіміздің тұғыры биік, мемлекетіміздің мерейі үстем, еліміздің болашағы баянды болғай! Әмин!

Қостанай облысының Бас имамы Бектұрсын Торғайбайұлы

Міне, жылдағы қалыптасқан дәстүр бойынша Рамазан айының алғашқы күні ауызашар беру басталды. Алдымен, бұл сауабы мол шараға облыстық «Аймағанбет қажы Спанұлы» мешітінің ұжымы ұйытқы болды.

Аталмыш мешіттегі ауызашарда облыстың Бас имамы Бектұрсын қажы Уәлиев сөз алып, асханада жиналған қауымды он екі айдың сұлтаны Рамазанмен құттықтады. Сондай-ақ, Оразаның мәні мен маңызына тоқталып, онда ұстанатын шарттар жөнінде айтты.

Осы ауызашарда дастархан жайған азаматтарға шынайы алғыс білдірілді. Соңында Құран оқылып, қадірменді ақсақал Мырзатай қажы бата берді.

Қостанай облыстық мешітінің баспасөз қызметі

Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы Астана қаласындағы Республикалық бас мешітте қасиетті Рамазан айының алғашқы тарауық намазына қатысып, жамағатқа уағыз айтты.

«Қадірменді жамағат! Бүгін мінекей қасиетті Рамазан айымен қауышып, Алла қаласа ең алғашқы тарауық намазымызды оқығалы тұрмыз. Ертең Алла қаласа Рамазанның алғашқы күнінің оразасын тұтамыз. Алла Тағала қасиетті Құранның «Бақара» сүресі, 185-аятында: «Рамазан айы сондай бір ай, ол айда адам баласына тура жол және (ақ пен қараны) айыратын дәлел түрінде Құран түсірілді. Сендерден кім рамазан айында болса, ораза ұстасын», – деп айтқан.

Осы аят қасиетті Рамазанда Құран түскеніне және де Рамазан айында ораза тұту парыз екеніне дәлел. Өйткені Алла Тағала: «Сендерден кім рамазан айында болса, ораза ұстасын», – деп айтты.

Рамазан сөзі «әр-Рамдә-у» сөзінен шығады. Бұл сөз өте ыстықтан күйдірілген тасқа қатысты қолданылады. Рамазанның бұлай деп аталуының негізгі екі себебі бар:

Бірінші: Бұл атау адамдардың тастар қатты қызатын ыстық кезде ораза ұстауын сипаттайды.

Екінші: Рамазанда ораза ұстау арқылы адамдардың күнәсі күйдіріліп, жоқ болып, кешірілетінін сипаттайды. Ыбырай Алтынсарин бабамыз «Мұсылманшылықтың тұтқасы» атты еңбегінде: «Әр жыл рамазан айында отыз күн руза тұту парыз. Рамазан деген сөз «күйдірген» деген мағынада. Яғни рамазан айында руза ұстағандардың күнәсі күйдіріледі», – деген» деді Бас мүфти.

Сондай-ақ ҚМДБ Төрағасы жамағатқа тарауық намазын өткізетін қариларды таныстырып, игі ниетін жеткізді және еліміздің игілігі үшін арнайы дұға жасады.

Қостанай өңірлік коммуникациялар қызметі орталығында айлардың сұлтаны қасиетті Рамазан айының қарсаңында брифинг болып өтті. Оған ҚМДБ-ның өңірдегі өкіл имамы Бектұрсын қажы Уәлиев, облыстық “Аймағанбет қажы Спанұлы” мешітінің найб имамы Азамат Мурзаканов, облыстық дін істері жөніндегі басқармасының бөлім бастығы Сапарғали Әбдиев және буқаралық ақпарат құралдарының журналистері қатысты.

Жүздесу қос тілде жүргізілді. Алдымен белгілі дін қайраткері Бектұрсын Торғайбайұлы сөз алып, Рамазаның қадыр-қасиеті, ұстанатын шарттары жайлы жан-жақты әңгімеледі.

Соңдай-ақ найб имам Азамат Серікбайұлы орыс тілінде Оразаға байланысты ой-пікірлерімен бөлісті. Брифингке қатысушылыр тарапынан койылған сұрақтарға жауап берілді.

Қостанай облыстық мешітінің баспасөз қызметі.

Қазақстан Республикасының Президенті Қасым-Жомарт Тоқаев қазақ елін күллі мұсылман қауымының сағына күтетін мерекесі Рамазан айымен құттықтады. Мемлекет басшысының құттықтауы Ақорданың ресми сайтында жарияланды.

«Құрметті отандастар! Сіздерді күллі мұсылман қауымы үшін қасиетті Рамазан айының басталуымен шын жүректен құттықтаймын!

Бұл – дүние жүзіндегі миллиардтаған жанды рухани тазаруға, жақынына жанашыр әрі қамқор болуға үндейтін мезгіл.

Ораза азаматтарды шыдамдылық пен төзімділікке шақырып, халқымыздың бойына қарапайымдылық, жауапкершілік және адалдық сынды асыл қасиеттерді сіңіреді.

Оразаның рухани құндылықтарын қазір әлемде болып жатқан күрделі ахуалды ескере отырып, кемел санамен қабылдау, оның түпкі мағынасын дұрыс түсіну – үлкен имандылықтың белгісі.

Бүгінде Қазақстан ауқымды өзгерістердің, түбегейлі жаңғырудың тарихи кезеңіне қадам басты. Жаңа халықтық Конституцияның жобасы республикалық референдумға шығарылды. Бұл өрлеу және әділеттілік даңғылына түскен мемлекетіміздің даму бағытын айқындайтын Негізгі Заң болмақ. Бас құжат мыңдаған жыл тарихы бар мемлекеттілігімізді одан әрі нығайтуға, еліміздегі саяси, азаматтық, экономикалық институттардың тиімділігін арттыруға және адам құқықтарын қорғау жүйесін жетілдіріп, күшейтуге жол ашады.

Біз дәстүрлі рухани-мәдени құндылықтарымызды қастерлей отырып, Құқық пен Заң үстемдігі, Тәртіп пен Тазалық, Әділдік пен Отаншылдық сияқты мызғымас қағидаттарды терең түсінетін әрі мүлтіксіз сақтайтын ұлттың жаңа болмысын қалыптастырып жатырмыз. Мұның бәрі қасиетті Рамазан айының мәңгілік ұлағатымен толық үндеседі.

Білімге, тазалыққа және жақсылыққа бастайтын өркениетті қоғамда Рамазан айы жаңа рухани мәнге ие болып, барша жұртқа шапағатын тигізетіні сөзсіз.

Қасиетті Рамазан құтты болсын, мұсылман жамағаты!» делінген Президент құттықтауында.

Рамазан – мұсылман жүрегін жаңартатын, ар-ұжданды оятатын қасиетті ай. Бұл айда адам тек аштық пен шөлге сабыр етіп қана қоймай, ішкі дүниесіне үңіледі, өз-өзіне есеп береді. Рамазан – адамның арын тазалап, адалдығын күшейтетін рухани мектеп.

Ар – адамның ішкі таразысы. Ол жақсылық пен жамандықтың аражігін ажырататын өлшем. Ал, адалдық – сол ардың іс жүзіндегі көрінісі. Егер ар таза болса, сөз де, іс те адал болады. Рамазан айы осы екі құндылықты жаңғыртып, жүрекке қайта оралтады.

Ораза – жария емес, жасырын ғибадат. Адамды ешкім бақылап тұрмаса да, ол тамақтан тыйылады. Бұл – Аллаға деген нағыз шынайы сенім мен адалдықтың белгісі. Жалғыз қалған сәтте де тәртіпті бұзбау – ардың тірі екенінің дәлелі. Сондықтан Рамазан – шынайылықтың айы. Қасиетті Құранда: لَعَلَّكُمْ تَتَّقُون «…бәлкім, тақуалыққа жетерсіңдер» (Бақара, 183-аят) деп айтылған. Тақуалық – арды сақтау, адалдықты ұстану. Рамазан адамды өтіріктен, өсектен, екіжүзділіктен, зұлымдықтан алыстатып, әділдік пен мейірімге жақындатады. Тіліне ие болған жан – арын қорғайды, нәпсісін жеңген – адалдығын нығайтады. «Әдептің басы – тілді бағу» демекші, сөз әдебіне мән беру мұсылманның басты сипатының бірі. Шәкәрімқажы: «Сөзіңді түзе – әдетіңе айналады, әдетің – мінезіңе айналады. Мінезің – сенің тағдырың», – деген сөзінде де үлкен мән-мағына бар.

Рамазанда жасалған әрбір игі іс – ардың тазалығын көрсетеді. Кешірімді болу, садақа беру, ата-анаға құрмет, мұқтаж жандарға қамқорлық – бәрі де адал жүректің жемісі. Рамазан – бір айлық құлшылық қана емес, жыл бойы жалғасатын көркем мінез тәрбиесінің бастауы. Егер Рамазаннан кейін де адам өтіріктен тыйылып, әділдікті ту етсе, адал еңбекті қадірлесе – онда бұл ай өз жемісін бергені.

Рамазан – адалдық айнасы болса, ораза – адамның шынайылығын, ішкі тазалығын сынайтын құлшылық. Адалдық – кәміл иманның жемісі. Рамазан айы адамды адал еңбекке, таза табысқа, әділ қарым-қатынасқа үндейді.

عَنْ عَبْدِ اللهِ بْنِ مَسْعُودٍ رَضِيَ اللهُ عَنْهُ قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: «طَلَبُ كَسْبِ الْحَلاَلِ فَرِيضَةٌ بَعْدَ الْفَرِيضَةِ». رَوَاهُ الْبَيْهَقِيُّ.

Абдулла ибн Масғұдтан (р.ғ) жеткен риуаятта Алланың Елшісі (с.ғ.с): «Адал жолмен кәсіп іздену парыздан кейінгі парыз», – деген.

Еңбек – адам өмірінің тірегі, еңбекті – тек нәпақа табу емес, адамның арын сақтап, қоғамға пайдасын тигізетін іс деп түсінуімз керек.

Хәкім Абай атамыз: «Еңбек етсең ерінбей, тояды қарның тіленбей» деп, адал еңбектің адамды ешкімге тәуелсіз ететінін айтады. Тіленбей өмір сүру – адамның намысы мен абыройын қорғайды.

Маңдай термен келген рыздықтың берекесі бар. Сонымен қатар, ойшыл: «Тамағы тоқтық, жұмысы жоқтық – аздырар адам баласын» деп ескертеді. Бос жүрген адам нәпсінің жетегінде кетеді, жалқаулыққа, пайдасыз іске бейім болады. Еңбек – нәпсіні тәрбиелейтін құрал. «....Сен де бір кірпіш дүниеге, Кетігін тап та, бар қалан» - деген өсиеті де әрқайсымызға бағытталған. Әркім қоғамда өз орнын тауып, адал еңбегімен елге қызмет етуі керек.

Рамазан оразасы – адал ғұмыр кешудің, рухани жаңғырудың және кемелдікке ұмтылудың сара жолы. Бұл ай – жүректі жұмсартып, сананы сергітіп, адамды өз болмысымен табыстыратын ерекше мүмкіндік. Рамазанның тағылымын өмірімізге серік етсек, ғұмырымыз да мәнді, амалдарымыз да берекелі болмақ. Кемелдік – тек біліммен немесе байлықпен өлшенбейді. Шынайы кемелдік – мінездің көркемдігі, ниеттің тазалығы, амалдың адалдығы. Рамазан осы үш негізді бекемдей түседі. Кемелдік – мінсіз болу емес, өз қателігін түсініп, түзелуге талпыну, әр күн сайын жақсырақ болуға ұмтылу. Рамазан – осы талпыныстың ең көркем көрінісі.

Ораза – нәпсіні тәрбиелеудің үлкен мектебі. Күнделікті өмірде байқалмайтын әлсіздіктер осы айда айқын көрінеді. Ашыққанда ашуға берілмеу, шөлдегенде сабыр сақтау, ренжігенде кешірім жасау – рухани кемелдікке бастар қадамдар. Рамазан – нәпсіні тәрбиелеп, жүрек пен тілді тазартады. Егер адам ораза ұстап жүріп, боқтап-сөгіп, ғайбат айтып, өтірік сөйлесе, онда оразаның рухани жемісі азаяды.

Алла Тағала қасиетті Құранда:

يَا أَيُّهَا الَّذِينَ آمَنُوا اتَّقُوا اللَّهَ وَقُولُوا قَوْلا سَدِيدًا «Уа, иман келтіргендер! Алладан қорқыңдар және түзу сөз сөйлеңдер», – деген (Ахзаб сүресі, 70-аят). Тілі таза адамның оразасы да көркем болады. Ауыз бекіткен адамның ойында «Осы ісім оразамды бұзбай ма?» деген сұрақ тұрады. Тіпті ораза ұстаған кісі біреуді ренжітіп алудан сақтанып, сауаптан құр калмауға үнемі көңіл бөледі. Ардақты Пайғамбарымыз (с.ғ.с):

مَن لَم يَدَعْ قَوْلَ الزُّورِ والعمَلَ بهِ، فليسَ للهِ حاجةٌ في أنْ يَدَعَ طعامَهُ وشرابَهُ

«Кімде - кім ораза болып жаман сөзден және оған амал етуден тиылмаса Алла оның тамақтан және судан тиылғанын қажет етпейді»-деген.

Рамазан – жеке адамның ғана емес, тұтас қоғамның рухани жаңғыруына ықпал ететін берекелі ай.

Бұл айда әр мұсылман өзін түзетуге, жүрегін тазартуға, мінезін көркемдеуге ұмтылады. Ал, адам түзелсе – қоғам да түзеледі. Сондықтан Рамазан – адал қоғам қалыптастырудың берекелі мүмкіндігі. Алла тағала Құранда:

إِنَّ اللَّهَ يَأْمُرُ بِالْعَدْلِ وَالْإِحْسَانِ وَإِيتَاءِ ذِي الْقُرْبَى وَيَنْهَى عَنِ الْفَحْشَاءِ وَالْمُنكَرِ وَالْبَغْيِ يَعِظُكُمْ لَعَلَّكُمْ تَذَكَّرُونَ

«Расында, Алла әділдікті, ихсанды және туған-туысқа қол ұшын беріп қарайласуды бұйырады. Сонымен қатар арсыздықтан, жамандық атаулыдан және зұлымдықтан мүлдем тыяды. Ойланып-толғансын, ғибрат алсын деп Алла Тағала сендерге осылайша насихат айтып, жол сілтейді», – делінген (Нахл сүресі, 90-аят).

Ораза ұстаған жан, үнемі Алланың бақылауында екенін сезінеді. Ішкі бақылау күшейген сайын сыртқы тәртіп те орнығады. Заңнан бұрын ардан ұялу – адал қоғамның негізі. Жауапкершілікті сезінген қоғам мүшесі әрқандай жамандық атаулыдан тыйыла бастайды. Ал, мұндай адам қоғамға зиян емес, пайда әкеледі. Адал еңбек, әділ сауда, таза қарым-қатынас – бәрі-бәрі осы «ораза» атты құлшылық тәрбиесімен нығая түседі. Әрине, адал қоғам бір күнде құрылмайды. Бірақ, Рамазан – соған бастар кемелдік жолы. Егер әр адам осы айда үйренген адалдықты, көркем мінезді өмірлік қағидасына айналдырса, қоғам да мейірімді де берекелі болмақ.

Жаратушы Раббымыз баршамызды қасиетті айдың берекесіне бөлеп, оразамызды қабыл етіп, игі амалдарымызды сауаптан жазсын. Рухани кемелдікке жеткізіп, шынайы адалдыққа жетелесін. Әмин!

Бектұрсын Торғайбайұлы Қостанай облысының Бас имамы

Ақпан айының 19 күні оразаның алғашқы күні;

Наурыздың 16-17-не қараған түн «Қадір түні»;

Пітір садақа жан басына 735 теңге;

20-шы наурыз – «Ораза айт» мерекесі

Қостанай аудандық «Маңдай батыр» мешітінде қасиетті Рамазан айына дайындық және оны ұйымшылдықпен өткізуге байланысты жиын болып өтті. Оған ауылдық мешіттер мен намазханалардың имамдары мен дін қызметкерлері қатысты.

Басқосуда Бас имам Дархан қажы Манарбекұлы сөз алып, Қазақстан мұсылмандары діни басқармасы тарапынан Рамазанға қатысты берілген тапсырмаларды мүлтіксіз орындау, әсіресе қайырымдылық, уағыз-насихат мақсатындағы жұмыстарды барынша жандандыру жайлы тілге тиек етті.

Жиында намазхана қызметкерлері өз ойларын ортаға салып, атқарылар міндеттерді пысықтады.

Қостанай облыстық мешітінің баспасөз қызметі

Қалалық “Жайлаубай ата” мешітінің ұйымдастыруымен жас шәкірттерге он екі айдың сұлтаны Рамазан айының қарсаңында “Қош келдің Рамазан!” атты тақырыпта есте қаларлық шара ұйымдастырылды. Оның барысында дастарқанға тәтті тағамдар қойылды. Сондай-ақ, пайдалы білім сабағы өткізілді.

Осынау басқосуға найб имам Қазбек Көшеров ұйытқы болды. Мұндай өскелең ұрпаққа тәлім-тәрбиелік жағы жоғары кездесулер алдағы уақытта да жалғасын таба бермек.

Қостанай облыстық мешітінің баспасөз қызметі