Намазхандарға ауызашар берілді

Облыс орталығындағы «Жайлаубай ата» мешіті қызметкерлерінің ұйымдастыруымен өткен бейсенбінің кешінде 80 намазханға ауызашар берілді.

Оған жүрегі жомарт азамат Есбол демеушілік етті. Жиналғандар ризашылығын білдіріп, алғыстарын жаудырды.

Наиб имам жұртшылықты баурап алды

Жоғарыда аталған «Жайлаубай ата» мешіті ұжымының мұрындық болуымен жамағаттың басын қосып, «Роль мечети в жизни мусульманской уммы» тақырыбында мазмұнды жиын өткізілді.

Онда наиб имам Қазбек Көшеровтің жүргізген тағылымды уағыз-насихатын намазхандар ұйып тыңдады. Олар көп жайға қанығып, жоғары көңіл-күймен тарқасты.

Ұлттық тағамнан дәм татты

Қостанай қалалық «Жайлаубай ата» мешітінің бастамасымен қасиетті жұма күнгі намаздан соң жамағатқа арнайы дайындалған ұлттық тағам, шипалы сусын қымыз бен дәмі тіл үйірген ыстық палау таратылды.

Жайылған ақ дастарқан басында көптен кездеспеген намазхандар қуана қауышып, бір жасап қалды. Демеуші бауырларымызға Алланың нұры жауа берсін!

Қостанай облыстық мешітінің баспасөз қызметі