Таяуда Қостанай қалалық “Жайлаубай ата” мешітінің ұстазы Аяулым Ермекқызы әйел-қыздар жамағатына қазіргі қоғамда кеңінен етек алған еліміздегі маңызды мәселе "Ажырасу - Алла сүймейтін іс" тақырыбында семинар өткізді.

Осы маңызды басқосуда Бас имам Шоқан қажы Ғазизұлы мен ұстаз Аңсаған Абдуррахман өздерінің көкейінде жүрген ойларымен бөлісті.

Жиналғандарға ажырасудың зияны мен оның алдын-алу, шариғаттағы әйелдің алар орны мен ана ретіндегі жарқын келбеті жайлы айтылды.

Семинар соңында Аңсаған ұстаздың кітабы хадияға берілді.

Қостанай облыстық мешітінің баспасөз қызметі

Жақында Ұзынкөл аудандық «Құрман баба» мешітінде өзгелерге өнеге боларлық қайырымдылық акциясы ұйымдастырылды. Оған Бас имам Есенкелді қажы Әжімахантегі тікелей ұйытқы болды.

Бұл орайда «Moldeх» жауапкершілігі шектеулі серіктестігінің басшысы Динара Молдабаева мен «Жаңа Жол 369» қоғамдық бірлестігінің төрайымы Алмагүл Қайбжанованың ерекше қолдау көрсеткенін атап өткеніміз жөн.

Осы ұлтымыздың іскер қыздарының ұсынысымен 2850 үш күндік балапандар аудандағы ауылдарда ғұмыр кешіп жатқан көмекке мұқтаж отбасыларына таратылды.

Шаңырақ иелері өздеріне қайырымдылық жасаған демеушілер мен мешіт қызметкерлеріне шынайы алғысын білдірді.

Қостанай облыстық мешітінің баспасөз қызметі

Таяуда Қостанай қалалық “Жайлаубай ата” мешітінің ұжымы қайырымдылық шарасын ұйымдастырды.

Онда әлеуметтік жағынан аз қамтылған алты отбасыға 60 мың теңгені құрайтын көмек көрсетілді. Оларға күнделікті тұтынатын азық-түлік салынған пакеттер таратылды.

Осындай қолдауға зәру жандарды қуанышқа бөлейтін акциялар алдағы уақытта да жалғасын таба бермек.

Қостанай облыстық мешітінің баспасөз қызметі

Таяуда ҚМДБ-ның VI республикалық имамдар форумы болып өтті. Онда аса маңызды құжаттар қабылданды. Осы жиынға біздің өңірден де облыстың Бас имамы Бектұрсын қажы Торғайбайұлы бастаған бірқатар аудандар мен қалалардың имамдары қатысты.

Форум барысында Бас мүфти Наурызбай қажы Тағанұлы Әулиекөл аудандық «Әмит ишан» мешітінің Бас имамы Нұрбол Балахметовтың көп жылғы қажырлы еңбегін бағалап, діни басқарманың 35 жылдығына арналған мерейтойлық медальмен марапаттады.

Біз әріптесімізді марапатымен шын жүректен құттықтай отырып, оған алдағы уақытта да мықты денсаулық, жауапты қызметінде табыс тілейміз.

Қостанай облыстық мешітінің баспасөз қызметі

Астана қаласында Қазақстан мұсылмандары діни басқармасының ұйымдастыруымен «Құжаттандыру мен цифрлық сауаттылықтың тиімді тәсілдері» республикалық семинары өтті.

Аталған семинар жұмысына ҚМДБ Төрағасы, Бас мүфти Наурызбай қажы Тағанұлы, ҚР МАМ Дін істері комитетінің Дінтану сараптамасы басқармасының басшысы Нұрғали Қабылов және еліміздің барлық өңірінен келген дін қызметкерлері қатысты.

Басқосу барысында Бас мүфти мешіт қызметіндегі құжат жүргізудің маңыздылығына назар аударды.

«Мешіт жұмысы – имамның уағызы ғана емес, жүйелі жүргізілетін құжаттарымен де өлшенеді. Сол секілді мешіттің тіркеу құжаттары мемлекет бекіткен талапқа сай толық болуы қажет. Сонымен қатар мешіт қызметіндегі әрбір қағаз, бұйрық, есеп – уақыт талабына сай, нақты, таза әрі айқын болуы тиіс», – деді Бас мүфти.

Семинар барысында қатысушыларға құжат айналымы, есеп жүргізу тәртібі, цифрлық құралдарды пайдалану және ресми ісқағаздарды рәсімдеу бойынша әдістемелік нұсқаулар ұсынылды.

Дереккөз: Muftyat.kz

Астана қаласында өткен «Қазақ даласындағы дәстүрлі ислам құндылықтары» атты VI Республикалық имамдар форумына қатысқан дін қызметкерлері үшін Қазақстан мұсылмандары діни басқармасы арнайы семинар ұйымдастырды.

Семинар аясында Бас мүфти кеңесшісі Смайыл Сейітбеков Діни басқарманың құрылуы, қызмет бағыты мен құрылымдық ерекшеліктері жөнінде кеңінен баяндама жасады.

Сондай-ақ, Қазақстан Республикасы Президентінің жанындағы Мемлекеттік басқару академиясының Мемлекеттік саясаттың ұлттық мектебінің директоры, ҚМДБ Сарапшылар кеңесінің мүшесі Талғат Жақиянов еліміздегі діни ахуал, діни үдерістер мен қоғамдағы өзекті мәселелер туралы ақпараттармен бөлісті.

Игі шараның мақсаты – дін қызметкерлерінің білімін арттыру, басқарма қызметі туралы түсінігін кеңейту және діни ахуалға қатысты өзекті мәселелер бойынша тәжірибе алмасу.

Дереккөз: Muftyat.kz

Астана қаласында Қазақстан мұсылмандары діни басқармасының ұйымдастыруымен «Қазақ даласындағы дәстүрлі ислам құндылықтары» тақырыбында VI Республикалық имамдар форумы өтті.

Форум аясында қоғам үшін өзекті екі құжат қабылданды. Олар «Қазақ халқының дәстүрінде және Ислам дінінде отбасы құндылығы» тұғырнамасы; «Құдайы ас беруде ысырапқа жол бермеу (мәзірі мен тәртібі)» құжаты.

Аталған құжаттар отбасы институтының тәрбиелік маңызын айқындап, діни рәсімдердегі бірізділікті қалыптастыруды көздейді. Әсіресе, құдайы ас беру рәсімінде ысырап пен бәсекеге жол бермеу, дастарқан мәзірінің мазмұндық және мәндік жағына мән беру мәселелері кеңінен қамтылды.

Сондай-ақ, жиын соңында VI Республикалық имамдар форумының Үндеуі қабылданып, дін қызметкерлерінің рухани-ағартушылық қызметіне жол көрсететін маңызды тұжырымдар жария етілді.

Дереккөз: Muftyat.kz

Бүгін Астана қаласында Қазақстан мұсылмандары діни басқармасының ұйымдастыруымен «Қазақ даласындағы дәстүрлі ислам құндылықтары» VІ Республикалық имамдар форумы форумының үндеуі қабылданды. Үндеуді ҚМДБ «Дін мен дәстүр» бөлімінің меңгерушісі Нұрбек Әуесханұлы оқып берді.

«Біз, Қазақстан мұсылмандары діни басқармасының ұйымдастыруымен «Қазақ даласындағы дәстүрлі ислам құндылықтары» VІ Республикалық имамдар форумына қатысушы дін және қоғам қайраткерлері, зиялы қауым өкілдері, Ғұламалар кеңесінің мүшелері мен Облыс имамдары «Қазақ халқының рухани негізін қалаған дәстүрлі ислам құндылықтарын дәріптей отырып, ел ішіндегі діни тұрақтылық пен ұлттық бірегейлікті сақтау ісінде имамдардың жауапкершілігі мен рөлін арттыруды аса маңызды» деп санаймыз.

Осы форум аясында қоғамның рухани дамуына үлес қосатын екі маңызды құжат қабылданды:

«Қазақ халқының дәстүрінде және Ислам дінінде отбасы құндылығы» тұғырнамасы – отбасы институтының Исламдағы орны мен жауапкершілігін нақтылап, ата-ана мен ұрпақ арасындағы байланысты нығайтуды, иманды, тәрбиелі әрі білімді ұрпақ өсіруді басты мұрат еткен тұғырлы ұстаным.

Ал «Құдайы аста ысырапқа жол бермеу» құжаты – Құдайы ас беруде қарапайымдылықты сақтау, шариғат пен ұлттық дәстүр үйлесімін қалыптастыру, қоғамда көрініс беріп отырған ысырапшылдық пен бәсекелестіктің алдын алу бағытында жол көрсететін маңызды құжат.

Біз, форумға қатысушылар, осы құжаттарда қамтылған мәселелерді ел ішінде кеңінен насихаттап, халық арасында шариғат пен салттың сабақтастығына негізделген бірізділік пен жауапкершілікті қалыптастыру негізінде төмендегі үндеуді қабылдаймыз:

Біріншіден, отбасы құндылығын сақтауда, асыл дініміз бен салт-дәстүрімізде көрсетілген ер мен әйелдің өзіне жүктелген міндеттері мен ұрпақ тәрбиесіне бағытталған жұмыстарды жүйелі түрде жүргізуге,

Екіншіден, Құдайы ас беруде ысырапқа жол бермеуге, дініміз бен дәстүрімізді ұштастыра отырып, қарапайымдылыққа мән беруге,

Үшіншіден, Қазақстан қоғамында дәстүрлі исламның орны мен құндылығын сақтау жолында ұлттық, рухани тұтастықтың тірегіне қызмет етуде белсенді болуға шақырамыз» делінген үндеуде.

Айта кетейік, форумаға Қазақстан Республикасының Мәдениет және ақпарат вице-министрі Қанат Жұмабайұлы, ҚМДБ Төрағасы, Бас мүфти Наурызбай қажы Тағанұлы, Ғұламалар және Сарапшылар кеңесінің мүшелері, медресе-колледж бен қарилар орталығының директорлары, сондай-ақ еліміздің әр аймағынан онлайн және офлайн форматта 1000-ға жуық имам қатысты.

Дереккөз: Muftyat.kz

Бүгін Астана қаласында Қазақстан мұсылмандары діни басқармасының ұйымдастыруымен «Қазақ даласындағы дәстүрлі ислам құндылықтары» VІ Республикалық имамдар форумында ҚМДБ Төрағасы, Бас мүфти Наурызбай қажы Тағанұлы баяндама жасады.

«Ислам – қоғамдық келісім мен татулықтың кепілі. «Мұсылман – мұсылманға бауыр» деген қағида қазақ даласында ұлт пен ұлысты бір шаңырақ астында ұйыстыруға қызмет етті. Имани бауырластықты басты ұстанымға айналдырған дана халқымыз, әрдайым бірлікті ту етіп ұстады.

Қазақ даласындағы дәстүрлі Ислам құндылықтары – ұлт руханиятының алтын қазығы. Бұл құндылықтар – тек өткеннің емес, бүгін мен болашақтың да темірқазығы. Ендеше, рухани мұрамызды жаңғыртып, дін мен дәстүрдің жарасымын сақтау – баршамыздың ортақ борышымыз» деді ҚМДБ Төрағасы.

Дереккөз: Muftyat.kz

Бүгін Астана қаласында Қазақстан мұсылмандары діни басқармасының ұйымдастыруымен «Қазақ даласындағы дәстүрлі ислам құндылықтары» VІ Республикалық имамдар форумына Мемлекет басшысы Қасым-Жомарт Кемелұлы арнайы құттықтау хатын жолдады. Президентттің құттықтау хатын Қазақстан Республикасының Мәдениет және ақпарат вице-министрі Қанат Жұмабайұлы оқып берді.

«Қадірлі қауым! Баршаңызды осы алқалы жиынның ашылуымен құттықтаймын!

Ислам – ұлтымыздың ұстыны, руханиятымыздың алтын діңгегі. Асыл дініміз ғасырлар бойы халқымыздың жан дүниесімен біте қайнасып, ұлттың ұйысуына арқау болып келеді. Дәстүрлі ислам құндылықтары – елімізде салтанат құрған ырысты ынтымақтың қайнар көзі.

Бүгінде конфессияаралық татулықтың Қазақстанға тән бірегей үлгісін бүкіл әлем мойындайды. Биыл Астанада өтетін Дүниежүзілік және дәстүрлі діндер лидерлерінің VIII съезі – осының айқын дәлелі.

Азаматтардың өзара сенімін нығайту және жауапкершілік, жанашырлық, әділдік сияқты қағидаттарды орнықтыру – қашанда басты міндет. Бұл ретте құрылғанына биыл 35 жыл толған Қазақстан мұсылмандары діни басқармасы маңызды рөл атқарады.

Имамдар қоғамдағы игі бастамаларды жүзеге асыруға белсене қатысып, жастарды жат діни ағымдардың ықпалынан қорғауға, отаншыл ұрпақ тәрбиелеуге табысты түрде атсалысып жүр.

Біз – озық ойлы ұлт болуға ұмтылған елміз. Қазақстанның әрбір тұрғыны Адал азаматқа тән қасиеттерді бойға сіңіру үшін төл құндылықтарымыз бен ата дінімізге арқа сүйеудің мән-маңызы зор.

Бүгінгі басқосуда ел бірлігін нығайта түсетін салмақты ойлар мен салиқалы пікірлер айтылады деп сенемін.

Форум жұмысына сәттілік тілеймін!» делінген Мемлекет басшысының құттықтау хатында.

Дереккөз: Muftyat.kz