Бүгін Астана қаласындағы республикалық «Әзірет Сұлтан» мешітінде қос бірдей қуанышты оқиға орын алды. Ашылу салтанатына ҚМДБ төрағасы, Бас мүфти Серікбай қажы Ораздың өзі келіп қатысқан Call Орталықтың іске қосылуы – Елорда жұртшылығы үшін ғана емес, еліміздің барлық тұрғындары үшін сүйінші жайт болғаны сөзсіз. Енді еліміздің кез келген тұрғыны өзін толғандырған діни мәселелер бойынша 33-30-30 нөміріне қоңырау шалып, толыққанды жауап ала алатын болады. Халық сұранысына орай, жауапты мамандар қазақ және орыс тілдерінде сұхбат жүргізетін болмақ.

Астана қаласының бас имамы Наурызбай қажы Тағанұлының бастамасымен іске қосылып отырған Call Орталықтың тәулік бойы үзіліссіз жұмыс жасауы үшін Елорда мешітттерінің 60 діни қызметкері жұмылдырылған. Білікті мамандардан жасақталған топ арнайы кесте бойы кезекшіліктерін атқарып, тәуліктің кез келген уақытында келіп түскен қоңырауға жауап беріп отырады.

Сондай-ақ, бүгіннен бастап Астана қаласындағы 10 мешітте «Діни ақпарат беру орталығы» да келушілерге өз есігін айқара ашып отыр. Халық сұранысын қанағаттандыру мақсатында іске қосылған бұл жоба түрлі түйткілді тақырыптар бойынша (неке, талақ, несие, мұрагерлік, т.б.) кеңес сұраған жандармен көзбе-көз кездесіп, сырт көздерден тыс сұхбаттасуға қолайлы болу үшін қосылып отыр.

Игі жобаның алдағы уақытта халық арасында кеңінен танылып, жемісті еңбек атқара беруіне тілектестігін білдірген Бас мүфти қос Орталыққа арнайы бас сұғып, жұмыс жайымен де танысып шықты. Тіпті, Call Орталыққа қоңырау соғып, кезекші маманның әзірлігін де пысықтап өтті.

Намаздың маңыздылығы:

Алла Тағала намаздың маңыздылығы жөнінде Құран Кәрімде былай деп, баян етеді:

قَدْ أَفْلَحَ مَن تَزَكَّىٰ وَذَكَرَ اسْمَ رَبِّهِ فَصَلَّىٰ

«Ал (күпірліктен, Аллаға серік қосудан, күнә атаулыдан, дүниеқұмарлықтан) арылған, шүбәсіз, азаптан құтылып, мұратына жетеді». Сондай-ақ Раббысының атын еске алып, намаз оқыған да құтылады» .

Ал Абдулла ибн Омар (р.а.) риуаят еткен хадисте Пайғамбарымыз (ﷺ) былай деген:

عَنْ‏ ‏ابْنِ عُمَرَ ‏رَضِيَ اللَّهُ عَنْهُمَا ‏قَالَ: قَالَ رَسُولُ اللَّهِ‏ ‏صَلَّى اللَّهُ عَلَيْهِ وَسَلَّمَ: "‏بُنِيَ الْإِسْلَامُ عَلَى خَمْسٍ: شَهَادَةِ أَنْ لَا إِلَهَ إِلَّا اللَّهُ وَ أَنَّ‏ ‏مُحَمَّدًا‏ ‏رَسُولُ اللَّهِ وَ إِقَامِ الصَّلَاةِ وَ إِيتَاءِ الزَّكَاةِ وَ الْحَجِّ وَ صَوْمِ رَمَضَانَ".

«Ислам бес негізге тұрғызылған: Алладан басқа құдайдың жоқтығына және Мұхаммадтың (ﷺ) Оның елшісі екендігіне куәлік етіп, иман келтіру, намаз оқу, зекет беру, қажылық жасау және рамазан айында ораза ұстау».

Алла Тағаланың ең сүйікті құлшылығы ол – намаз. Бұған Абдулла ибн Масғұттың (р.а.) басынан өткен мына бір оқиғасы дәлел болмақ.

عَنْ عَبْدِ اللّه بن مَسْعُودٍ رضي اللّه عنه قال: "سَأَلْتُ رَسُولَ اللّه صَلَّى اللّه عَلَيْهِ وَسلَّمَ: أَي الْعَمَلِ أَحَبُّ إلى اللّه؟ قال: "الصَّلاةُ عَلَى وَقْتِهَا". متفق عليه

Абдулла ибн Мсғуд (р.а.) былай деген: «Бірде мен Алла Елшісінен (ﷺ): «Алла Тағаланың ең сүйікті амалы қандай?»-деп сұрадым. Пайғамбарымыз (ﷺ): «Уақытында оқылған намаз»,-деп жауап берді» .

Намаз мүміннің және кәпірдің арасын ажырататұғын нәрсе. Бұл жөнінде Джәбир ибн Абдулла (р.а.) Алла Елшісінің (ﷺ) былай дегенін естіген:

عن جابر قال: سمعت النبي صلى الله عليه وسلم يقول: "بَيْنَ الرَّجُلِ وَبَيْنَ الشِّرْكِ وَالْكُفْرِ تَرْكُ الصَّلَاةِ" رواه مسلم.

«Расында, адамның және серік қосу мен күпірліктің арасын байланыстыратын нәрсе – намазды тәрк қылу» . Имам Әбу Ханифа мен оның шәкірттерінің, Куфалық ғалымдардың, имам Мәлік пен Суфян әс-Сәуридің, имам Шафиғидің шәкірті әл-Музанидің және т.б. көпшілік ғұламалардың көзқарасы бойынша немқұрайлық және жалқаулық себепті намаз оқымайтын адам кәпір болып есептелмейді. Олар бұл хадисте, намаздың парыздығын мүлде мойындамай, жоққа шығарған кісі жайлы айтылған деп, тұжырым жасаған.

Абдулла ибн Амр (р.а.) риуаят еткен хадисте Алла Елшісі (ﷺ) дүние тіршілігінде намазын сақтықпен уақытылы орындаған адамға, қиямет күні намаздың оған берер пайдасы өте орасан зор болатындығын былай деп жеткізген:

عَنْ عَبْدِ اللَّهِ بْنِ عَمْرٍو، عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ: "أَنَّهُ ذَكَرَ الصَّلاةَ يَوْمًا فَقَالَ: مَنْ حَافَظَ عَلَيْهَا كَانَتْ لَهُ نُورًا وَبُرْهَانًا وَنَجَاةً يَوْمَ الْقِيَامَةِ، وَمَنْ لَمْ يُحَافِظْ عَلَيْهَا لَمْ يَكُنْ لَهُ بُرْهَانٌ وَلا نُورٌ وَلا نَجَاةٌ، وَكَانَ يَوْمَ الْقِيَامَةِ مَعَ قَارُونَ وَهَامَانَ وَفِرْعَوْنَ وَأُبَيِّ بْنِ خَلَفٍ

«Бірде Алланың Елшісі (ﷺ) намаз жайлы сөз қозғап былай деген: «Кімде-кім, оны қадағалап орындайтын болса, онда ол оның жарық нұрына, жақтаушы куәгеріне және қиямет күніндегі құтқарушысына айналады. Ал кімде-кім, немқұрайлық танытып, оны орындамайтын болса, онда ол оның не жарық нұры да, не қорғаны да, не құтқарушысы да болмайды. Тіпті қиямет күні ол Перғауынмен, Хаманмен және Убай ибн Халафпен бірге болады» .

Омар (р.а.) халиф болған кезінде, өзінің барлық өкілдеріне қатысты үндеу хатын шығарып, былай деп, талап қойған болатын:

عَنْ نَافِع مَوْلَى عَبْدِ اللَّهِ بْنِ عُمَرَ، أَنَّ عُمَرَ بْنَ الْخَطَّاب، كَتَبَ إِلَى عُمَّالِهِ: "إِنَّ أَهَمَّ أَمْرِكُمْ عِنْدِي الصَّلَاةُ ، فَمَنْ حَفِظَهَا وَحَافَظَ عَلَيْهَا، حَفِظَ دِينَهُ، وَمَنْ ضَيَّعَهَا فَهُوَ لِمَا سِوَاهَا أَضْيَعُ

«Расында мен, сендердің ең маңызды міндеттерің – намаз деп есептеймін. Өйткені, намазына сақтық танытатын адам, Ислам дінінің басқа да біндеттеріне дәл солай сақтық танытады. Ал егер ол намазына селқостық танытатын болса, онда ол Илсамның басқа да міндеттерін оп-оңай бұзатын болады» .

Намаздың құндылығы:

Құран мен хадистерде намаздың көптеген сансыз құндылықтары баян етілген. Алла Тағала намаздың арсыздық пен жеккөрінішті нәрселерден тыятындығы жайлы былай деген:

إِنَّ الصَّلَاةَ تَنْهَىٰ عَنِ الْفَحْشَاءِ وَالْمُنكَرِ ۗ وَلَذِكْرُ اللَّهِ أَكْبَرُ ۗ

«Өйткені намаз – адам баласын арсыздықтан һәм жамандық атаулыдан (теріс қылықтардан) тыяды. Ал Алланы үнемі (жүрекпен тілмен һәм іс жүзінде) еске алу болса, құлшылықтың ең үлкені, ең зоры» .

Сонымен қатар намазды Раббысының разылығы үшін толық орындаған адамға, Алла Тағала Фердаус жұмағын нәсіп ететіндігін былай деп баян етеді:

وَالَّذِينَ هُمْ عَلَىٰ صَلَوَاتِهِمْ يُحَافِظُونَ أُولَٰئِكَ هُمُ الْوَارِثُونَ الَّذِينَ يَرِثُونَ الْفِرْدَوْسَ هُمْ فِيهَا خَالِدُونَ

«Намаздарын кемеліне жеткізе, үзбей әрі уақытылы оқиды. Міне солар нағыз мұрагерлер. Олар (пейіштің төрі) Фердаусқа мирасқор болады. Олар онда мәңгі-бақи мекендейді» .

Әбу Һурайра (р.а.) риуаят еткен хадисте, Алла Елшісі (ﷺ) бес уақыт намаздың өзі, жасаған күнәларымыздың каффараты болып есептелетіндігін былай деп жеткізген:

عَنْ أَبِي هُرَيْرَةَ رضي الله عنه، أَنَّ رَسُولَ اللّهِ صلى الله عليه وسلم كَانَ يَقُولُ: "الصَّلَوَاتُ الْخَمْسُ، وَالْجُمُعَةُ إِلَى الْجُمُعَةِ، وَرَمَضَانُ إِلَى رَمَضَانَ، مُكَفِّرَاتٌ مَا بَيْنَهُنَّ، إِذَا اجْتَنَبَ الْكَبَائِرَ". رواه مسلم

«Егер адам баласы үлкен күнәләрдан сақтанса, онда бес уақыт намадың, осы жұма мен келесі жұманың және бұл Рамазан айы мен келесі Рамазан айының арасында жасалған күнәләр кешіріледі» .

Сондай-ақ Әбу Һурайра (р.а.) риуаят еткен тағы басқа бір хадисте Алла Елшісі (ﷺ) күніне бес рет суға шомылған адам денесіндегі ластықтан қалай тазарылатын болса, күніне бес рет намаз оқитын адам да дәл солай, бойындағы күнәларынан арылатындығын былай деп жеткезгін:

عَنْ أَبِي هُرَيْرَةَ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ : "أَرَأَيْتُمْ لَوْ أَنَّ نَهْرًا بِبَابِ أَحَدِكُمْ يَغْتَسِلُ مِنْهُ كُلَّ يَوْمٍ خَمْسَ مَرَّاتٍ هَلْ يَبْقَى مِنْ دَرَنِهِ شَيْءٌ؟ قَالُوا: لَا يَبْقَى مِنْ دَرَنِهِ شَيْءٌ. قَالَ: فَذَلِكَ مَثَلُ الصَّلَوَاتِ الْخَمْسِ يَمْحُو اللَّهُ بِهِنَّ الْخَطَايَا"

«Егер адам күніне бес рет үйінің жанында ағып жатқан өзенге шомылса, бойында қандай да бір ластық қалар ма еді?» Сахабалары: «жоқ, ластығынан ешнәрсе қалмайды»,-деп жауаберді. Сонда Пайғамбарымыз (ﷺ): «Бес уақыт намаздың да мысалы дәл солай. Алла Тағала онымен күнәләрды кешіреді»,-деген .

Анас (р.а.) жеткізген риуаятта Пайғамбарымыз (ﷺ) намаз оқып жатқан адамның Жаратушы Иесімен сырласатынын ұқтырып, былай деген:

عَنْ أَنَسِ بْنِ مَالِكٍ، قَالَ: قَالَ النَّبِيُّ ﷺ :"إِنَّ أَحَدَكُمْ إِذَا صَلَّى يُنَاجِي رَبَّهُ"، متفق عليه

«Расында, егер сендердің біреулерің намаз оқып жатқан болса, онда ол Раббысымен сыбырлап сөйлесіп жатыр» .

Әбу Зар (р.а.) риуаят еткен хадисінде, намаз оқитын адамның бойынан күнәлары төгілетіндігін былай деп жеткізген: «Бірде Пайғамбарымыз (ﷺ) өзінің үйінен шықты. Күз мезгілі болған соң ағаштардың жапырақтары түсіп жатты. Ол (ﷺ) ағаштың екі шыбығын ұстай қалған кезде, олардың жапырақтары шашылып, жерге төгілді. Бұған қатысты Ол (ﷺ) назар аудартып былай деді: «Ей Әбу Зар (р.а.), қашан мұсылман адам намазын Алланың разылығы үшін оқыса, онда оның бойынан мына жапырақтар түскендей, күнәлары төгіледі» .

Намаз – бұл Пайғамбарымыздың (ﷺ) көзінің қарашығы, қуанышы және жарық нұры. Себебі Әнәс ибн Мәлік (р.а.) риуаят еткен хадисте Алланың Елшісі (ﷺ) намаздың құндылығы жөнінде былай деген:

عن أنس بن مالك رضي الله عنه قال: قال رسول الله صلى الله عليه وسلم: "جُعِلَتْ قُرَّةُ عَيْنِي فِي الصَّلَاةِ"

«Намаз – көзімнің қарашығы»

Мұсылмандардың басшысы Әбу Бәкірдің (р.а.) әдеттегі дағдысының бірі, намаз уақыты жақындаған кезде былай деп ескерту жасайтын

كَانَ أَبُو بَكْر رَضِيَ اللهُ عَنْهُ يَقُول إِذَا حَضَرَت الصَّلَاة : "قُومُوا إِلَى نَارِكُمْ اَلَّتِي أَوْقَدْتُمُوهَا فَأَطْفِئُوهَا"

«Тұрыңдар! Намаз оқумен (күнә жасау арқылы) өздеріңді өртеу үшін тұтатқан отты, өшіріңдер» .

Қостанай облыстық «Марал ишан» мешітінің наиб имамы Сыздықов Дархан Манарбекұлы

Алдын ала хабарланғандықтан болар, облыс орталығындағы «Мирас» мәдениет үйі үлкенді - кішілі қауымға лық толды. Олардың арасынан өмірдің біраз асуларынан асқан аталарымыз бен апаларымызды, жастарды көресіз.

Осынау Мәуліт мерекесіне арналған рухани кеш «Адамзаттың асыл тәжі» деп аталды. Оның тақырыбының өзінен мән-маңызы айқын көрініп тұрған жоқ па.

Кештің басында Қостанай облысы әкімінің орынбасары Марат Жүндібаев облыс әкімінің атынан баршаны Мәуліт мерекесімен шын жүректен құттықтап, онан соң Қазақстан мұсылмандары діни басқармасының «Шариғат және пәтуа» бөлімінің меңгерушісі Сансызбай Құрбанұлы барша қостанайлықтарға жылы лебізін білдіріп, ұлы Пайғамбарымыздың өмірінен нақты мысалдар келтіріп, асыраушысынан айрылған балаларға сыйлықты табыс етті. Сол кездегі бүлдіршіндердің жүзіндегі қуанышты тілмен айтып жеткізу қиын болар.

Жиында республикалық «Қарекет» қорының облыстағы филиалының өкілдігінен Шургалиев Қайрат есімді азаматқа пәтер кілті де осы мерекелік шарада табыс етілді. Сонымен қатара Зейнел әжейге «Құрметті қажы» алтын белгісі тағылды.

Ұзақ жылдар бойы Қамысты ауданында бас имам болып қызмет атқарған Қайып Әірғалиұлына «Умра қажылық» сапарына жолдама берілді.

Мұндай жиындар ән-күйсіз болмайтындығы көпшілікке аян. Бұл орайда арқалықтық, жыл сайын шеберлігі ұшталып келе жатқан жас дарын Дінмұхаммед Бектұрсынұлының орындағын „Алладан тілек„ және басқа да діни әндерін жұртшылық өте жылы қабылдады.

Жерлестеріміз „Сәби тілегі„ деп аталатын сахналық көріністен үлкен әсер алды. Терең толғанысқа түсіп, адамгершілік асыл қасиеттің тіршілікте ерекше орын алатындығына тағы да көздері жетті. Онда Ілияс Омаров атындағы облыстық қазақ драма театрының әртістері шынайы шеберліктерін көрсетті.

Айтыс десе делебесі қозбайтын қазақ жоқ. Үлкен сахнаға көкшетаулық Әлібек Серғалиев пен белгілі айтыс ақыны, талай додаларда топ жарған Айбек Қалиев сайысқа түсіп, үлкенді-кішілі қауымды өнерлерімен тәнті етті.

Көрнекті дін қайраткері, Қазақстан мұсылмандары діни басқармасының Қостанай облысындағы өкіл имамы Бахытбек Тәжімбет өзінің жүрекжарды лебізін айта келіп, облыстық мешітке жанашырлық танытып, демеушілік көрсетіп келе жатқан жүректері жомарт азаматтарға Алғыс хаттарды табыс етті.

Оразалы Жақсанов

Қостанай облысының Жітіқара аудандық «Ержан Тәтішев» мешітінде «2019 жыл Жастар жылы» аясында найб имам Руслан Жиенбаев студенттермен кездесу өткізді. Онда Жітіқара политехникалық колледжінің «Автокөлікке техникалық қызмет көрсету» мамандығы бойынша оқып жатқан бірінші курс шәкірттері болды.

Наиб имам дөңгелек үстел басында ислам дінінің қазіргі қоғамдағы маңыздылығы туралы сөз қозғап, мешіттің тарихы мен қазіргі таңда атқарып жатқан игі жұмыстары жайында айтып берді.

Сонымен қатар, діни жат ағымдардың қауіптілігі мен олардан сақтану жолдары туралы да баяндады.

Кездесу барысында студенттер наиб имамға өздерін толғандырып жүрген сауалдарын қойып, өз ойларын ортаға салды.

Мәнді де маңызды уағыз-насихаттан кейін студенттер мешітке бас сұғып, оның ішкі безендірілуіне айрықша назар аударып, мешіттің тыныс-тіршілігімен танысты.

ҚМДБ-ның Қостанай облысы бойынша өкілдігінің баспасөз қызметі

Жақында облыстық мешітте «Әйелдер-қыздар» секторының ұйымдастыруымен "Алла Тағаланың көркем есімдері" атты сайыс өткізілді.

Мұнда алдымен қасиетті Құраннан аят оқылып, содан кейін сайыстың шарттары таныстырылды. Сайыс 3 турдан құралды. Алғашқысы  көркем есімдерді арабша нұсқасын айтып шығу.

Екіншісі әділ қазылардың алдындағы парақшада 4 есімнің қазақша мағынасын айту. Үшіншісі Алланың екі көркем есімін тақтаға арабша жазу.

Міне, осы шарттарды толық орындағандарға әділ қазылар ақылдаса келе ұпай санын есептеп, жеңімпаздарды анықтады. Қатысушыларды марапаттап, оларға сыйлықтар табысталды. 

Оның қорытындысында 1 -ші орын алған Айым Рыскелдіқызына "Қасиетті Құран" кітабы тапсырылды.

2-ші орынды жеңіп алған Меруерт Тұрсынбекқызына "Құран" кітаптың қазақша аудармасы берілді.

3-ші орынды иегенген Жұмабай Жалғасұлы "Құдси Хадистер" кітабы ұсынылды.

Ал шараға қатысқан басқада үміткерлерге Алла Тағаланың көркем есімдері жазылған плакаттар сыйға тартылды.  

ҚМДБ-ның Қостанай облысы бойынша өкілдігінің баспасөз қызметі

Жуырда Науырзым ауданы орталығындағы «Жамбыл» орта мектебінің жоғары сынып оқушылары (8 – 11 – сыныптар) арасында тәрбиелік іс – шарасы өткізілді. Оны ұйымдастыруға аталмыш білім ордасы директорының тәрбие ісі жөніндегі орынбасары Ұлан Сағынаев, психолог маман Айкүміс Тасанова және аудандық «Түркебай» мешітінің наиб имамы Кенжеғара Әл- Фараби мұрындық болды.

Бұл жиын тәрбиеге тікелей қатысты болғандықтан ұстаздар оқушылардың мектеп қабырғасында өздерін қалай ұстауы, сөйлеу мәдениетін сақтаулары, күнделікті сабаққа дайындықтары, араларындағы достық-сыйластық қарым-қатынастары, мұғалімге деген құрмет, ата-ананы сыйлау этикалары жөнінде әңгімеледі.

Осынау іс-шараға арнайы шақырылған наиб имам Әл-Фараби де басқосқан оқушыларға ата-анаға, ұстазға, досқа деген құрмет, ізеттілік- инабаттылық туралы ұлағатты уағыз айтты.

Сондай-ақ тәрбиеге қатысты Құран аяттарында, Пайғамбарымыз Мұхаммедтің (оған Алланың игілгі мен сәлемі болсын) хадистеріне арқау болған ұлық сөздерге тоқтап, оқушылардың ұстаздарын сыйлауда, терең білім алуда, татулықтың, бірліктің, яғни, жалпы айтқанда имандылықтың қаншалықты маңызды екендігін жеткізді.

ҚМДБ-ның Қостанай облысы бойынша өкілдігінің баспасөз қызметі

Жуырда Арқалық қаласы №2 өртке қарсы мамандандырылған жасағы қалалық «Мухтасиб Әлмұхаммед» мешітінде «өрт қауіпсіздігі» бойынша оқу-жаттығулар өткізді.

Оқу-жаттығу барысында «Адамдарды қауіпсіз жерге көшіру және шартты өртті сөндіру» тақырыбында өртті-техникалық оқу-сабақтары жүргізілді.

Тактикалық жаттығу барысында өртті сөндіру, адамдарды құтқару тәсілдері пысықталып, қауіпсіздікті қамтамасыз ету мен шұғыл штабтың әрекеттері бақыланды. Арнайы оқу-жаттығуға 10 мамандандырылған жасақ қызметкерлері және екі өрт сөндіру техникасы қатысты.

Сала мамандарының жаттығу-түсіндірмелерін мешіт имамы Бектұрсын Уәлиев өз қызметкерлерімен төтенше жағдайлар немесе өрт шыққан кезде қалай дұрыс әрекет жасау керектігін тыңдап, ғимараттағы қосымша көшіру есіктерінің әрқашан ашылып-жабылуы туралы да айтты.

Сонымен қатар ғимарат қызметкерлерінің жедел дұрыс шешім қабылдауы, іс-әрекет жасауға психологиялық тұрғыда дайындығы да ескерілді.

Мұндай оқу-жаттығуларды өткізіп тұру – тиісті сала қызметкерлері мен төтенше жағдайға тап болған ғимарат иелері үшін зор пайдасын келтірері сөзсіз.

Осы оқу-жаттығу кезіндегі іс-әрекетті қорытындылай келе оған өте жақсы деген баға берілді.

ҚМДБ-ның Қостанай облысы бойынша өкілдігінің баспасөз қызметі

Адамзаттың асыл тәжі болған сүйікті пайғамбарымыз Мұхаммед (оған Алланың игілігі мен сәлемі болсын) туған айы – «Мәуліт айы», мұсылман жамағаты үшін орны еркекше. Осындай мүбарак айда барша өңілерде Мәуліт ерекше атап өтіліп, Алла елшісіне салауаттар айтылады.

Осындай шара, қасиетті жұма күні Рудный қалалық «Нұр» мешітінде атап өтілді. Жиналған жамағатқа Рудный қалалық «Нұр» мешітінің бас имамы Азамат Серікбайұлы пайғамбарымыздың өмірінен уағыз айтты. Сонымен бірге салауат айтудың дәрежесін түсіндіріп өтті. Соңынан мешіт қызметкерлері Мәуліт қасидалары мен салауаттарын оқып, жамағатқа жетізі білді.

Жұма намазынан соң мерейлі Мәуліт айынын құрметіне ас әзірленіп жамағатқа ұсынылды.

ҚМДБ-ның Қостанай облысы бойынша өкілдігінің баспасөз қызметі

Жақында Елбасының тариxи сананы жаңғыртуға бастайтын "Ұлы даланың жеті қыры" атты бағдарламалық мақаласы жарық көрді. Толымды мақалада мемлекет басшысы халық көкейінде жүрген көптеген дүниелерді тілге тиек етті.

Өзім осы мақаланы ерекше ден қойып оқыдым. Содан кейін өз ойымды ортаға салғанды жөн көріп қолыма қалам алдым.

Ең алдымен Алланың нәсіп етуімен ата-бабаларымыздың аманат еткен ұланғайыр жерді, қасиетті қара шаңырағымызға бақ болып қонған тәуелсіздік тізгінін мықты ұстау. Оған сызат түсірмей, қайта оның іргетасының мықты болып беки түсуі үшін, егемен елдің әр азаматы өз үлесін қоса түсу.

Сондай-ақ алдыңғы қатарлы өркениетті елдермен терезе теңестіру. Ол үшін елдің ынтымақ-бірлігін нығайту және жас ұрпақты сапалы білім мен тағылымды тәрбиеге баулып, ғылымды игере білуге шынайы талпыныс жасау.

Бәсекелік қабілетті арттырудың жолы да – білімге құштарлықтан бастау алмақ. Шынымен де жас ұрпақтың бойына ұлттық құндылықтарды сіңіре отырып, жаһандық өзгерістерге бейім әрі патриоттық рухта тәрбиелеу қашанда өзекті.

Білім – адам баласының қоршаған ортаны танып-білуге, оны меңгеруге деген ұмтылысы. Асыл дініміз де оқып-үйренуді, ғылыммен айналысуды жоғары бағалайды және ғалымдардың дәрежесін биік тұғырға қояды.

Адам баласының қоғамдық ортадағы дәрежесі осы – білім деңгейіне қарай анықталады. Бір сөзбен айтқанда, білім алу, сауатты болу – дініміздің ең басты талабы.

Атадан балаға қалған құнды қазына, мәдени мол мұрамызды сақтап, оны әлі де дамыта түсу. Дүйім жұртқа әйгілі болған тарихи орындарды дәріптеу. Еліміздiң мәдени мұрасын зерделеп, қалпына келтiруге және тиiмдi пайдалану жұмыстарын iске асыру. Яғни Ұлы даланың көне ұлттық өнеріміздің төл тарихын жаңғырту.

«Ел үмітін ер ақтар, ер атағын ел сақтар» демекші, батыр, қаһармандарымыз бен ұлы ойшылдарымызды, қиын-қыстау кезеңдерде ел басқарған тұлғаларымыздың ерен еңбектерін жас ұрпақтың бойына жақынырақ таныта білу. «Еңбек етсең еленерсің, еңбегіңе кенелерсің. Есің жиып, етек жауып, елге жетіп теңелерсің» -дегендей адал еңбек етудің маңыздылығын ұғындыру қажет.

Сондай-ақ шойын темірді қамырша иіп, өнеркәсібін дамытқан, желдей ескен асауларды ең алғаш қолға үйретіп, оны ұлттық салауаттылық мәдениет пен шаруашылық пайдасына асырған да біздің бабаларымыз емес пе.

Бабадан қалған кең байтақ жеріміздің табиғат байлығы мен әсем-көркемдігі де көзтартар кереметтер. Міне, осындай ғаламат дүниелерді халқымызға нәсіп еткен Жаратушы Хақ тағалаға сансыз шүкірлер болсын.

Елбасы өзінің айтулы мақаласында – ұлттың рухани санасына жаңа серпіліс беріп, осы құндылықтарымызды дәріптей білуіміз керектігіне жан-жақты тоқталды.

Ұлттық санасы жаңғырып, төл тарихын түгендеп, дәстүрлі діні мен ділін дәріптеген азаматтың еңсесі қашанда биік болмақ.

Бабалар аманатына адал болып, Тәуелсіздіктің тұғырын төмендетпей, ел ынтымағының одан әрі нығаюына өз үлесімізді қоса білейік!

Өмірдің талай тар жол, тайғақ кешуінен өткен Өр халқымыздың намысы биік, жігері мықты, арманы асқақ болуын бір Алла өзі нәсіп еткей!

Бектұрсын Торғайбайұлы, Арқалық қалалық «Мухтасиб Әлмұхаммед» мешітінің бас имамы

«Отан - отбасынан басталады» демекші, Отанды сүю отбасынан бастау алатыны сөзсіз. Отбасы мен мектеп ынтымақтастығының берік іргетасын қалау мақсатында және Елбасы Нұрсұлтан Назарбаевтың «Рухани жаңғыру» бағдарламасы, ҚМДБ-ның Бас мүфтиі Серікбай қажы Ораз жариялаған «Ислам және Отбасы » жылы аясында №1 Ұзынкөл орта мектебінің салтанатты залында ұмытылмас шара өтті.

«Мейірімді жүрек» атты мерекелік бағдарламаға «Балықты» мешітінің бас имамы Есенкелді қажы Сақтағанұлы, мектеп басшысы Қайрат Хайдарұлы, ұстаздар, қамқоршы ата-аналар қауымы мен балалар қатысты.

Аталмыш шарада бас имам қамқоршыларға жүрекжарды тілегін білдіріп, өнерлі балаларға алдағы өмірлеріне тек сәттілік тілей насихатын айтты.

Сонымен қатар, мектеп басшысы Қайрат Әлиев қамқоршыларды алғыс хатпен марапаттап, «Әкелер кеңесі» атынан кеңес мүшесі В.Янин ата-аналарға алғысын жаудырды.

ҚМДБ-ның Қостанай облысы бойынша өкілдігінің баспасөз қызметі