Тәуелсіздіктің арқасында Мұхаммед (оған Алланың игілігі мен сәлемі болсын) пайғамбарымыздың туған күні, яғни Мәуліт мерекесін атап өту қазақ елінде дәстүрге айналды. Соның бір жарқын айғағы ретінде Қостанай өңірінде де ол үстіміздегі жылы ойдағыдай ұйымдастырылды.

Осынау ұлы мейрам Қостанай шаһарында соңғы жылдары пайдалануға беріліп, көпшіліктің игілігіне айналған «Мирас» мәдениет үйінде өтті. Ерте хабарланғандықтан, оған үлкенді-кішілі қауым дер кезінде жиналды.

Бұл рухани Мәуліт кеші «Адамзаттың абзалы» деп аталды. Басқосуды осы аймаққа кеңінен танымал қазақтың дарынды жігіттері жүргізіп, барша жұртшылықтың көңілінен шықты.

Олар алдымен облыстың аудандары мен қалаларынан басқосқан мұсылман ағайындарға Мәуліт мерекесінің мәні мен маңызын жан-жақты түсіндірді. Содан кейін жылдағы қалыптасқан дәстүр бойынша Мәуліт шариф қасидасы оқылды. Оған аудандар мен қалалардың имамдары атсалысты.

Осы арада облыстық мешіттің наиб имамы Дархан Сыздық пен Марал ишан деп аталған қасиетті орынды ұзақ жылдар бойы басқарған дін қайраткері Ертай қажы Балахметтің қос ұлы Әлішер мен Мұртаза да тың ізденістерімен көпшілікті дән риза еткенін айтып өткеніміз абзал.

Аталған басқосуда қалалық мешіттің бас имамы Шоқан қажы Әмірханов әлгі Мәуліт шарифтен кейін батасын беріп, өзінің пайым-парасатымен ағайындарға үлкен ой салды.

Бұл күндері Айбек Қалиевті кім білмейді. Ол айтыс өнерінің мақтанышына айналған бауырымыз. Ол биыл да осы рухани кештің ажарын аша түсіп, мейрамға байланысты ой-толғаныстарын жыр жолдарымен жеткізді. Суырыпсалма өнерімен жерлестерінің жүректерін тебірентті.

Ұлы Мұхаммед Пайғамбарымыздың мәнді де мағыналы өміріне шолу жасап, жиналған қауымның алғысына бөленді.

Мінбеге көтерілген облыс әкімдігі дін істері жөніндегі басқармасының басшысы Жанболат Үмбетов барша жерлестерімізді ұлы мерекемен шын жүректен құттықтады. Қазіргі таңда өңірдегі ислам дінін насихаттау мақсатында атқарылып жатқан игі істерге де тоқталып өтті.

Өткен жылы Лисаков қаласында жаңадан пайдалануға берілген мешіт жайлы тілге тиек етті. Жалпы, облысқа Бахытбек Нұрғабылұлы Тәжімбет өкіл имам болып тағайындалғалы бері тындырылған жұмыстар барша әріптестеріне үлгі болып отырғандығын өзгелерге өнеге етті.

Сондай-ақ аталған кешке көршілес жатқан облыстардан да құрметті қонақтар шақырылды. Солардың бірі – Қазақстан мұсылмандары діни басқармасының Ақмола облысындағы өкіл имамы Қуаныш Жұмабайұлы.

Дін саласында терең білім алған азамат күллі қостанайлық ағайындарға ізгі тілегін білдіре келе, өткен тәуелсіздік алған 26 жылда асыл дініміздің өркендеп, халықтың имандылыққа бет бұруындағы ізгі жетістіктері жайлы әңгімеледі.

Сонымен қатар Ілияс Омаров атындағы облыстық қазақ драма театрының дарынды әртістері «Айна ғұмыр» деп аталатын спектакльден үзінді қойды. Онда есімдері ел аузында жүрген өнер майталмандары Мейрам Жапаров, Ақдәмен Досанова, Зәмзәгүл Балтабаева, Айбол Шәкіржанов, Әлімхан Мырзахан және басқа да актерлер тапсырылған образдарды ойдағыдай сомдады.

Мұндай басқосулар ән-күйсіз өтпейтіндігі белгілі. Сонау Арқалық қаласынан арнайы келген мектеп оқушысы Дінмұхаммед Бектұрсынұлы және рудныйлық талантты қыздар әуелете ән шырқап, көпшілікке жоғары көңіл-күй сыйлады.

Содан кейін Қазақстан мұсылмандары діни басқармасының Қостанай облысындағы өкіл имамы Бахытбек Нұрғабылұлы сахнаға көтеріліп, қысқы ауа райының қолайсыздығына қарамастан жан-жақтан жиналған ағайындарға шынайы алғысын білдірді.

Мешіттің жұмысын тұрақты түрде көрсетіп келе жатқан өңірдегі «Қазақстан-Қостанай», «Алау» секілді телеарналардың ұжымына ризашылығын айта келіп, биылғы Мәуліттің тиісті деңгейде ұйымдастырылуына септігін тигізген барша азаматтарға алдағы уақытта да мықты денсаулық, отбасында бақыт, жауапты қызметтерінде табыс тіледі.

Арқалық және Көкшетау секілді шаһарлардан келіп, өздерінің ұлағатты сөздерімен көпшілікке ой салған Айбек Қалиұлы мен айтыс ақыны Тоба бауырымызға сый-сыяпат жасады.

Ал Ақмола облысының бас имамы Қуаныш Жұмабайұлына ежелден келе жатқан ұлттық салт-дәстүріміз бойынша иығына шапан жапты. Өңірдегі бірқатар аудандар мен қалалардың имамдарына белсенді қызметтері үшін Алғыс хаттарды табыс етті.

Өкіл имам Бахытбек Тәжімбет басқаратынмешіт ұжымы қайырымдылық мақсатында да қаншама жұмыстар атқарып келе жатқандығы жерлестерімізге аян. Ол осы жолы даоблыстық балалар үйіндегі 11 балаға мектептегі оқу барысында қолданылатын сөмкелерді көпшілік алдында тапсырды.

Мәуліт мерекесі қарсаңында дүниеге келген сәбилердің ата-аналарына бесік арбаларды да тапсырып, оларға да жүрекжарды лебізін жеткізді. Осындай игі мақсаттағы жұмыстар алдағы уақытта да жалғасын таба беретіндігін айтты.

Қостанайлық ағайындар жұртшылықтың жүрегіне имандылық нұрын сеуіп жүрген бас имам Бахытбек Нұрғабылұлының ақындық және әншілік өнеріне де көздері анық жетті.

Өйткені Қазақстанға белгілі дін қайраткері Арқалықтан келген әрі болашағынан үміт күттіретін Дінмұхаммед баламызбен бірге қосылып ән шырқады. Сөйтіп, ол сегіз қырлы, бір сырлы азамат екендігін тағы бір мәрте дәлелдеп, өңірдегі күллі әріптестеріне өнеге көрсетті. Имам тек дін саласын насихаттаушы ғана емес, рухани жан дүниесі бай маман болу керектігін паш етті.

Бұл рухани кештен мол тағылым алған Сайлаубай қажы Молдаш өзінің ризашылығын білдіре келіп, мұндай басқосулардың әрқашан да өскелең ұрпаққа ғибрат екендігін елдегі беделді басылым арқылы көпшілікке жеткізуімізді өтінді.

Танымдық жағы мол басқосудан кейін облыс орталығындағы «Ақ шаңырақ» мейрамханасында Мәуліт мерекесінің құрметіне дастарқан жайылып, ас берілді.

Оразалы Жақсанов

Жақында Қазақстан мұсылмандары діни басқармасының Қостанай облысындағы өкілдігіне қарайтын әйелдер және қыздар секторының ұйымдастыруымен Пайғамбарымыз Мұхаммедтің (оған Алланың игілігі мен сәлемі болсын) туған күні яғни Мәуліт мерекесіне орай тағылымды шара болып өтті.

Оны облыстық мешіттің ұстаздары Дайыр Рыскүл мен Қаңлыбаева Гүлдана және шәкірттер өздеріне тән шеберлікпен өткізді. Жиналған қауымның алдында облыстық мешіттің наиб имамы Сейіт Нұрқанов сөз сөйлеп, Мәуліт мерекесінің өзіндік ерекшелігі мен мән-мағынасы жайлы баяндады.

Сонымен қатар жиында мешіттің зерделі шәкірттері Ақгүл апа мен Айдана және Жанаттар қасиетті Құранды оқығанда, келген көпшілік ұйып тыңдап, көп жайды көңілдеріне тоқыды.

Баршаға мәлім, игі шараларда Мәуліт қиссасы және Пайғамбарымызға салауат айтылады. Оны мешіттің шәкірттер орындады. Сондай-ақ көпшілікке Қостанай мемлекеттік педагогикалық институтының студенттері орындайтын «Адамзаттың асыл тәжі» деп аталатын сахналық көрініс ұсынылды.

Әңгіменің орайы келгенде, болашағынан үлкен үміт күттіретін 4 сынып оқушысы, мешіттің қабілетті шәркірті Ділназ Наурыз «Мәуліт күні» деген жыр шумағын мәнерлеп оқып бергендігін айтып өткен лазым.

Кеш барысында қатысушыларға танымдық жағы мол викториналық сауалдар қойылып, сыйлықтар берілді.

ҚМДБ-ның Қостанай облысындағы өкілдігінің баспасөз қызметі

Жақында белгілі дін қайраткері, Денисов ауданы «Жұма» мешітінің имамы Ыбыраев Денисов ауылында орналасқан Кәсіптік-техникалық колледжде болды.

Ол осы білім ордасында қызмет атқарып жатқан барша ұстаздар мен студенттерді еліміздегі ұлы мереке тәуелсіздік күнімен шын жүректен құттықтады.

Мешіт көпшіліктің киелі орны. Сондықтан имандылық ордасын жөндеу жұмыстарына қолғабыс жасап жатқан осындағы кәсіптік шеберлер мен студенттерге Алғыс хатты салтанатты түрде тапсырды.

Жиналғандар имамның ұлағатты сөзінен көп тағылым алды. Мұндай игі мақсаттағы жүздесулер алдағы уақытта да жалғасын таба бермек.

ҚМДБ-ның Қостанай облысы бойынша өкілдігінің баспасөз қызметі

Қостанай облысы Қарабалық аудандық «Ғашура ана» мешітінде «Қызым саған айтам ...» деген тақырыпта дөңгелек үстел өткізіліп, оған ақ жаулықты аналар мен жас келіндер, діни сауат ашу курсында дәріс алып жүрген әйел жамағаты қатысты.

Сауат ашу курсының ұстазы Диана Қайырбекқызы осы іс – шараның маңыздылығы туралы айтса, ал өзге бауырларымыз көкейде жүрген көрікті ойларымен бөлісті. .

Бұл келелі мәжілістің қыз – келіншектерге берері мол екендігі даусыз. Өйткені, атамыз қазақ «Қызым келіннен, ұлым елімнен ғибрат алып өседі» деген жоқ па. Бұл орайда халқымыз көргенді ұл мен инабатты қыз тәрбиелеу жайын қашан да жоғары қойғандығын анық сезінесіз.

Бүгінгі бүлдіршін қыз ертең бойжетіп, бір үйдің босағасын аттап, келін атанары анық. Ал «келінді аяғынан» деп санайтын ұлтымыз әу бастан-ақ жаңа түскен келінге сын көзбен қараған.

Ал отбасында тәлімді тәрбие алып, ибалылық пен инабаттылықты жанына серік еткен қыз бала барған жерінде бағы ашылып, сыйға бөленеді.

Үлкен кісілер әдетте қыз балаларына ұзатылар кезінде «Барған жеріңе тастай батып, судай сің» дейді. Демек, жаңа отбасына сіңісе алған келіннің ғана ауыл-аймаққа қадірі артады.

Әрине, өзге ортаға, яғни түскен жеріне бірден сіңісе қою кімге болса да, ауыр соғары анық. Ол отбасының әрбір мүшесімен – қайын ене, қайын ата, қайын жұртпен тіл табысып, бір мәмілеге келу – үлкен сын.

Бірақ даналық пен көрегендік дарыған, қасиетті бабаларымыз ұстанған әдеп – ғұрыптың арқасында отбасындағы сыйластықтың артуы үшін қолданылатын құндылықтар жеткілікті.

Бұған қосып айтар болсақ, халқымызда: «Келін еш уақытта өз ата-енесін атымен атаған емес, оларға „әке„, „ана» деп айтқан.

Құран кәрімде: «Қашан ата-ананың біреуі қартайса немесе екеуі де қартайса, оларға «Уф» деп айтпа» (Исра сүресі, 17/23) десе ал, Пайғамбарымыздың хадисінде (с.а.с.) : «Үлкендерге құрмет, кішілерге ізет көрсетіңдер»-деген.

Жалпы жоғарыда аталған кездесуде қозғалған жайлар бойжеткендер, яғни болашақ келіндерге де үлкен ой салды деген үміттеміз.

ҚМДБ-ның Қостанай облысындағы өкілдігінің баспасөз қызметі

Тәуелсіздің күніне орай Қазақстан мұсылмандары діни басқармасының Қостанай облысы бойынша өкілдігі атынан найб имам Икрам Бақытжан және Қажылар қауымдастығының төрағасы Ғайсин Жақсылық Қостанай облысы әкімдігі білім басқармасының «Қостанай балалар мен жасөспірімдер баспанасы» коммуналдық мемлекеттік мекемесінде болды.

Өз кезегінде мұндағы тәрбиеленушілер тәуелсіздік күніне орай дайындаған өнерлерімен бөлісті. Ал дін өкілдері тәрбиеленуші жасөспірімдерге тәттілер мен киім-кешек табыс етті.

Бұл шара тәрбие үйінің басшылы тарапынан қолдау тауып, мешіт ұжымының басшысы Бахытбек Нұрғабылұлына алғысын хатпен жеткізді.

«Алдағы уақытта болашағымыз болып табылатын балалар өзінің жанұясында тәрбие алса екен» деген тілек білдірді Жақсылық ата.

ҚМДБ-ның Қостанай облысындағы
өкілдігінің баспасөз қызметі

Хижри жыл санауы бойынша биылғы жылы 30 қараша күні Мұхаммед (оған Алланың игілігі мен сәлемі болсын) пайғамбардың дүниеге келген күні. Яғни Мәуліт. Осы айда көптеп Аллаға мадақ, пайғамбарға салауат айтқан өте орынды.

Сонымен қатар мүмкіндігі бар әрбір мұсылман айналасындағы көмекке мұқтаж жандарға шарапатын тигізіп, қолдан келгенше жақсылық жасауға ұмтылғаны абзал. Жалпы, қайырымдылық адамзат бойындағы ең ізгі қасиет болып табылады.

Бір қуаныштысы, арамызда ондай жүрегі жомарт кісілер баршылық. Мәселен, Айнаш Қуанышқызы Ақбаева жаны ізгілікке толы жан. Ол басқарып отырған «AINAMED» тіс емдеу орталығы осы Мәуліт айында барлық қызметтің түріне 15 пайыздық жеңілдік жасап отыр.

Осынау қазақтың аяулы қызы «Келем деушілерге есігіміз айқара ашық»- дейді.

ҚМДБ-ның Қостанай облысындағы
өкілдігінің баспасөз қызметі

Бахытбек Нұрғабылұлы Тәжімбеттің Қазақстан мұсылмандары діни басқармасының Қостанай облысындағы өкіл имамы болып тағайындалғанына аса көп болмаса да жергілікті халықтың ерекше құрметіне бөленді.

Өзінің бойындағы асыл қасиеттерімен өңірдегі барша әріптестеріне үлгі-өнеге көрсетіп келеді. Оның адамгершілік, имандылыққа байланысты айтқан ұлағатты сөздерін үлкенді-кіші қауым әрдайым ұйып тыңдайды.

Өздеріңіз де байқаған боларсыздар, ол келгелі бері танымдық-тағылымдық жағы мол ғибратты кештерді жиі ұйымдастырып, барша жұртшылықтың ыстық ықыласына ие болды.

Еліміздегі ұлы мереке қарсаңында Бас имам үлкен қуанышқа кенелді. Қостанай облысының әкімі Архимед Мұхамбетов Бахытбек Нұрғабылұлын өңірге сіңірген адал еңбегі және Қазақстан Республикасының тәуелсіздік күні мейрамының құрметіне Құрмет грамотасымен марапаттады.

Біз дін қайраткерін осынау мәртебелі марапатымен шын жүректен құттықтаймыз. Оған алдағы уақытта да мықты денсаулық, отбасында бақыт тілейміз.

ҚМДБ-ның Қостанай облысындағы өкілдігінің баспасөз қызметі

Қазақстан егемендік алғалы бері өзге елдермен қарым-қатынас барынша нығайды. Жоғары оқу орындарының білікті мамандары да тәжірибе алмасып, болашақ жан-жақты кадрлардың толыққанды білім алуына қолдан келген жағдайдың бәрі де жасалуда.

Қазіргі таңда өңіріміздің маңдай алды оқу орындарының бірі — Қостанайдағы Құрылыс колледжі.

Аталмыш оқу орнының 2 курс студенттері жуырда Қостанай шаһарында бой көтергеніне 1 жыл болған киелі орынмен танысты.

Мешіттің наиб имамы Әлішер Ертайұлы қонақтарға парасат ордасына айналған мешіттің құрылыс туралы айтып, имандылыққа, адамгершілікке, қайырымдылыққа баулудағы жасалып жатқан жұмыстары жайлы жан-жақты әңгіме өрбітті.

Өз кезегінде студенттер көкейдегі сұрақтарына жауап алып, араб тілі бойынша дәріс алғысы келетіндері туралы ниеттерін білдірді.

ҚМДБ-ның Қостанай облысындағы
өкілдігінің баспасөз қызметі

Қазақстан мұсылмандары діни басқармасының Қостанай облысы бойынша өкілдігі қан тапсырып донор болу күнін өткізді. Бұл шара облыстық «Қан орталығы» мекемесі тарапынан қолдау тауып сауапты амалды бірігіп атқарды.

Аталмыш шара Қазақстан мұсылмандары діни басқармасының арнайы тапсырмасы аясында быйыл 2 рет өткізіліп отыр. Оған облыстық мешіт жамағаты қалалар мен аудандардың имамдары, ерікті намазхан азаматтар тарапынан қолдау тауып донор болды.

Әрине донор болуға әр адам ниетті болғанымен оған арнайы дайындық арқылы болғандықтан алдын-ала хабарландыру айтылып, дайындық арқылы жүзеге асты.

Осылайша 28 адамның әр қайсысы 450 грамнан қан тапсырды.

Өз кезегінде облыстық «Қан орталығы» ұжымы мұсылмандар тарапынан жасалған ұсыныстың әрдайым қолдау табылатынына ризашылығын білдірді.

ҚМДБ Қостанай облысы
өкілдігінің баспасөз қызметі