Үстіміздегі жылы Алаш ардақтысы, мемлекет және қоғам қайраткері Міржақып Дулатовтың 140 жылдық мерейтойы елімізде кеңінен аталып өтті. Оның кіндік қаны тамған Жангелдин ауданында қаншама есте қаларлық шаралар ұйымдастырылды. Облыс орталығында ұлы тұлғаға арналып, еңселі ескерткіш орнатылды.
Осынау айтулы датаға оның ұрпақтары да өздерінің қомақты үлестерін қосты. Соның бірі – іскер азамат, белгілі кәсіпкер Бақберген Қасымұлы Өтеулин Қостанай қаласындағы «Статус» мейрамханасында бабасының құрметіне ас берді.
Оған алыс-жақыннан туған-туысқандары, ақын-жазушылар, есімдері елге танымал зиялы қауым өкілдері қатысып, Міржақып Дулатұлының елі мен халқына сіңірген еңбегі жайлы тебірене әңгімеледі.
Жиында аса көрнекті ағартушының туған жиені Ерлан Сатыбалдиев, облыстық мәслихаттың төрағасы Сайлаубек Ещанов, Қазақстанның Еңбек Ері Сайран Бұқанов, Қостанай облысының құрметті азаматтары Кәкімжан Карбозов, Өмірзақ Ихтиляпов, Қазақстанның халық ақыны Әсия Беркенова, қаламгерлер Серікбай Оспанов, Ақылбек Шаяхмет және басқалар сөз сөйледі.
Қостанай облысының Бас имамы Бектұрсын қажы Уәлиев және қалалық «Жайлаубай ата» мешітінің Бас имамы Шоқан қажы Әмірханов артында өшпес із қалдырған даңқты тұлғаның рухына бағыштап Құран оқыды. Абыз ақсақал Жандарбек Сейітов бата берді.
Басқосуда бір топ азаматтарға Міржақып Дулатовтың 140 жылдығына арналған мерейтойлық төсбелгі салтанатты түрде табыс етілді.
Қостанай облыстық мешітінің баспасөз қызметі
Сайыс өткізілді
Науырзым аудандық «Түркебай ата» мешітінде жамағат арасында «40 - парыз» және «Кітап оқитын ұлт» атты маңызды тақырыптар бойынша сайыс өткізілді. Сондай-ақ имандылық ордасында «Әлеуметтік желіде көркем мінезді болу» жайында ұйымдастырылған уағыз-насихаттар да жиналғандарға үлкен әсер қалдырды.
Міржақып Дулатовқа арналды
Жақында Қарабалық аудандық мәдениет үйінде Алаш ардақтысы, мемлекет және қоғам қайраткері Міржақып Дулатовтың 140 жылдығына орай танымдық-тағылымдық жағы мол іс-шара өткізілді. Онда жиналған қауым бүкіл саналы ғұмырын еліміздің жарқын болашағына арнаған ұлы тұлғаның мағыналы ғұмыры мен артында қалдырған өшпес рухани мұрасы жайлы ұмытылмас мағлұмат алды.
Кітап – білім бұлағы
Жақсы кітап – жан азығы. Денисов аудандық кітапханасында өткізілген іс-шара барлық қатысушылардың көңілінен шығып, оларға үлкен ой салды. Мұнда №3 мектептің 8-9-сынып оқушыларына кітап оқитын қоғам және ұлттық құндылықтар жайында әңгіме қозғалды. Сондай-ақ кездесуде рухани байлықтың қайнар көзі болып табылатын кітаптың тигізер пайдасы мен артықшылығы жөнінде де айтылды.
Өзекті тақырыптар қозғалды
Әулиекөл аудандық "Әмит ишан" мешітінің қызметкерлері халықтың арасында жиі болып, жұртшылықтың ыстық ықыласына бөленуде. Мәселен, наиб имам Нұрсұлтан Есенәліұлы жергілікті мешітте "Дін мен дәстүр" тақырыбында тағылымды кездесу өткізді. Сондай-ақ ол аудандағы Сұлукөл, Құсмұрын және Аманқарағай елді мекендеріне барып, жамағатқа тәрбиелік мәні зор уағыз-насихат айтты.
Ал аталмыш мешіттің наиб имамы Әл-Фараби Кенжеғара жергілікті Өрт сөндіру бөлімінің сарбаздарымен кездесті. Жүздесу барысында "Жат ағымдардың алдын алу жолдары" жайында кеңінен әңгімеледі.
Қостанай облыстық мешітінің баспасөз қызметі
Арқалық қалалық «Мухтасиб Әлмұхаммед» мешітінің Бас имамы Нұрхан Асанұлы іс-сапармен Фурманов ауылына болды. Ол алдымен елді-мекендегі «Тәубе» намазханасына ат басын бұрып, оның қыс айларына дайындығымен танысты. Жамағатпен жүздесіп, олардың сұрақтарына нақты жауап берді. Содан кейін дін қайраткері жергілікті кітапханада 11 сынып оқушыларымен кездесіп, жастарға кітап оқудың маңызы мен тұлға болып қалыптасудағы тигізер пайдасы жөнінде уағыз- насихат айтты.
Сонымен қатар жасөспірімдерге «Дін мен дәстүр» кітабынан үзінділер оқытты. Белсенділік танытқан әрі үздік оқушыларға ақшалай сыйлықтар табыс етті.
Қостанай облыстық мешітінің баспасөз қызметі
Қостанай қаласындағы тамақтаны орындарында тексеріс жұмыстары жүргізілді. Бақылау-қадағалау шараларын «Халал Даму» мамандары Мейіржан Бауыржанұлы мен Алишер Балахмет орындады.
Тексеріс барысында кәсіпорындардың өндірістік аумақтары, тағам дайындау процестері, шикізат пен дайын өнімнің сақталу талаптары, жабдықтардың тазалығы және қызметкерлердің санитарлық-гигиеналық нормаларды сақтауы жан-жақты қаралды.
Сонымен қатар, халал стандарттарының талаптарына сәйкестігі, құжаттаманың дұрыс жүргізілуі, өнім жеткізушілердің сертификаттарының бар-жоғы да жіті тексерілді. Анықталған кемшіліктер бойынша кәсіпорын иелеріне түсіндіру жұмыстары жүргізіліп, талаптарды толық орындау үшін нақты ұсыныстар берілді. Кейбір нысандарға ескерту жасалып, олқылықтарды түзету үшін уақыт белгіленді.
«Қостанай Агро продукт», «Север ет», «Қарасу ет» қасапханаларында аудит жұмыстары жүргізілді. Бақылау-қадағалау шараларын «Халал Даму» директоры Айбек Асқарбекұлы мен Алишер Балахмет орындады.
Тексеру барысында қасапханалардың өндірістік алаңдары, малды қабылдау және сою процесі, қажетті құжаттамалардың жүргізілуі, сондай-ақ халал стандарттарының сақталу деңгейі жан-жақты қаралды. Әсіресе, малды сою әдістерінің талаптарға сай орындалуы, құрал-жабдықтардың тазалығы мен жеке қорғаныс киімдерінің дұрыстығы ерекше назарға алынды.
Сонымен қатар, шикізат пен дайын өнімнің сақталу температурасы, тасымалдау ережелері, ветеринарлық құжаттардың өзектілігі және өнімді таңбалау талаптары тексерілді. Аудит нәтижесінде анықталған кішігірім кемшіліктер бойынша кәсіпорын жауапты тұлғаларына түсіндіру жұмыстары жүргізіліп, оларды түзету бойынша нақты ұсыныстар берілді. Бірқатар нысандарға белгіленген мерзім ішінде олқылықтарды жою туралы ескертулер жасалды.
Қостанай облысындағы «Beef Export» және «Terra» қасапханаларында жоспарлы аудит жұмыстары жүргізілді. Тексеру барысында өндірістік аймақтардың тазалығы, малды қабылдау және сою процесінің талапқа сай орындалуы, құжаттамалардың дұрыстығы мен халал стандарттарының сақталу деңгейі жан-жақты қаралды. Аудит жұмыстарын «Халал Даму» директоры Айбек Асқарбекұлы мен жергілікті өкіл Алишер Балахмет орындады.
Сонымен қатар, жауапты мамандар қызметкерлердің арнайы дайындық деңгейін, құрал-жабдықтардың санитарлық жағдайын және өнімнің қадағалау тізбегін тексеріп, бірқатар ұсыныстар мен ескертпелер берді. Алынған нәтижелер бойынша кәсіпорындарға талаптарды толық орындау және халыққа адал өнім ұсыну бағытында тиісті шаралар ұсынылды.
Көзі қарақты оқырманның есінде болар, Атыраудағы Ұлттық құрылтайда Мемлекет басшысы жаппай кітап оқитын ұлтқа айналудың маңызына ерекше тоқталған болатын. Бұл орайда Қазақстан мұсылмандары діни басқармасы тарапынан да атқарылып жатқан жұмыстар аз емес.
Жақында Қостанай облыстық «Аймағанбет қажы Спанұлы» мешітінің кітапханасында «Кітап оқу мәдениетін қалыптастыру» деген тақырыпта көпшілікке ой саларлық жиын болып өтті.
Онда Бас имам Бектұрсын қажы Уәлиев жалпы кітап оқудың мәні мен артықшылығына, парасатты азамат болып қалыптасуда тигізетін ықпалы жайлы кеңінен баяндады. Президенттің көтеріп отырған мәселесі халықтың көкейіндегісін дөп басып, қолдау тапқандығын, жалпы кітап оқу адам баласының ойлау жүйесін қалыптастыруда ерекше орын алатындығын тілге тиек етті.
Өзге қызметкерлер де сөз алып, кітап оқудың орасан пайдасын мысалға келтіре отырып, кімді болсын рухани жағынан байытып, ой-өрісін дамыта түсетіндігін айтты.
Қостанай облыстық мешітінің баспасөз қызметі
Қостанай облысы, Аймағамбетов қажы Салықұлы мешітінде Қажылық-2026 маусымына қатысты маңызды мәліметтер жамағатқа жеткізілді.
Кездесу барысында:
Алла Тағала ниет еткен әрбір мұсылманға Қажылық жолын жеңіл етсін!
Жуырда Науырзым ауданындағы Дәмді ауылында халықпен кездесу ұйымдастырылды. Онда ұлттық құндылықтар мен салт-дәстүріміз туралы насихаттар айтылды.
Сондай-ақ, жергілікті орта мектептегі оқушылармен өткізілген жүздесу барысында оларға сабақтан тыс кездері мешітке келіп, дін қайраткерлерінен дәрістер алу жөнінде де сөз болды.
Басқосуда білім ордасының шәкірттері тарапынан қойылған барлық сауалдарға нақты жауап берілді.
Қостанай облыстық мешітінің баспасөз қызметі
Қостанай облысына қарасты қала, аудан мешіттерінде Төтенше жағдайлар департаментінің қызметкерлері жамағатпен арнайы кездесу өткізіп, өрт қауіпсіздігі ережелерін түсіндірді.
Кездесу барысында мамандар тұрмыстық жағдайда өрттің жиі шығу себептеріне тоқталып, электр құралдарын пайдалану кезінде сақтық шараларын сақтау қажеттігін айтты. Сонымен қатар мешіттердің өзінде де өрт қауіпсіздігі талаптарының орындалуы, эвакуациялық жолдардың ашық болуы, өрт сөндіргіш құралдардың жарамдылығы жөнінде түсіндіру жұмыстары жүргізілді.
Жамағат тарапынан қойылған сұрақтарға мамандар нақты жауап беріп, ақпараттық жадынамалар таратты. Бұл алдын алу шаралары өңір мешіттерінде қауіпсіздік мәдениетін күшейтіп, кез келген төтенше жағдайдың алдын алуға бағытталған.
Миләди
Хижри
