Жақында қасиетті Рамазан айының құрметіне облыстық «Аймағанбет қажы Спанұлы» мешітінің жанындағы Зекет және қайырымдылық қорының жетекшісі Бақытжан қажы Икрамның ұйытқы болуымен өзгелерге ғибрат боларлық игілікті шара жүзеге асырылды.

Арамызда ғұмыр кешіп жатқан шешен ұлтының өкілі Заур Итаев зекет берді. Бұл кәсіпкер 15 адамның әрқайсысына 100 мың теңгеден қаражат бөлді.

Осынау жүрегі жомарт жанның Ораза кезіндегі қайырымдылық садақасының сауабы өзіне Алладан еселеніп қайтуына тілектеспіз.

Қостанай облыстық мешітінің баспасөз қызметі

2025 жылғы 14 наурызда Қостанай қаласында лудоманияға қарсы күрес және заңсыз ойын бизнесінің алдын алу мәселелеріне арналған дөңгелек үстел өтті. Іс-шара «Адалдық алаңы» кеңсесінде, Тәуелсіздік көшесі 85 (филармония) мекенжайында өтті.

Талқылауға діни істер басқармасының өкілдері, Қостанай облысы бойынша Қазақстан мұсылмандары діни басқармасы, оның ішінде Аймағанбет қажы Спанұлы мешітінің ұстазы Нұрлан Сейдағалиев, Қостанай облысының орыс православ шіркеуі епархиясы, Қостанай облысындағы ЖОО өкілдері, Қоғамдық кеңес мүшелері, Қостанай облыстық психикалық денсаулық орталығының мамандары, психологтар және сарапшылар қатысты.

Іс-шараның негізгі мақсаты – Қазақстанда 2024–2026 жылдарға арналған лудоманияға қарсы күрес жөніндегі Кешенді жоспарды жүзеге асыру. Қатысушылар лудоманияның қоғам мен жеке тұлғаға әсерін, сондай-ақ бұл мәселені шешудің мүмкін болатын жолдарын талқылады. Ерекше назар интернет пен әлеуметтік желілер арқылы жүргізілетін заңсыз ойындарға азаматтардың қатысуын болдырмау шараларына аударылды.

Аймағанбет қажы Спанұлы мешітінің ұстазы Нұрлан Сейдағалиев діни ұйымдардың лудоманияға қарсы күрестегі рөлін атап өтіп, қоғамды рухани тәрбиелеудің маңыздылығын айтты. Ол діни қағидаттар лудоманиямен күресте маңызды құрал бола алатынын баса айтты.

Лудомания мәселесі мемлекеттік деңгейде де көтерілді — Президент Қ. К. Тоқаев 2024 жылғы 15 наурызда Ұлттық құрылтай отырысында бұл тақырыпқа назар аударды. Сондықтан дөңгелек үстел аясында жүргізілген жұмыс қоғамның денсаулығы мен моральдық жағдайы үшін маңызды болып табылады.

Қатысушылар лудоманиямен күресте ынтымақтастық пен күш-жігерді үйлестіруді жалғастыруға келісті, сондай-ақ заңсыз құмар ойындардан келетін зиянды азайту және олардың алдын алу бойынша нақты қадамдарды белгіледі.

Жуырда өзге ұлттың өкілі Константин Владимирович Қостанай аудандық "Маңдай батыр" мешітінде Ислам дінін қабылдады.

Оған наиб имам Ерлан Өмірбекұлы себепкер болып, бесін намазының алдында жамағат куәлік етті.

Қостанай облыстық мешітінің баспасөз қызметі

Қасиетті Рамазан айының рухани және тәрбиелік жағынан да берері мол. Әсіресе, мейірімділік пен ізгілікке айрықша көңіл бөлінеді.

Облыстық «Аймағанбет қажы Спанұлы» мешітінің жанындағы Бақытжан қажы Икрам басшылық ететін Зекет және қайырымдылық қорының қызметкерлері Ораза басталғалы бері қыруар жұмыстар атқарды.

Жуырда әлеуметтік жағынан аз қамтылған 16 отбасыға азық-түлік табыс етілді. Олар қайырымдылық шарасын ұйымдастырушыларға шынайы алғысын білдірді.

Қостанай облыстық мешітінің баспасөз қызметі

Жақында Қостанай облысының Бас имамы Бектұрсын Торғайбайұлы Қамысты ауданының 70 жылдығы және Қазақстан мұсылмандары діни басқармасының 35 жылдығына арналған тынымдық-тағылымдық жағы мол салауатты жиынға қатысты.

Сондай-ақ, аудан әкімі Ерлан Әлімбайұлымен кездесіп, жергілікті мешіттің қалыптасқан хал-ахуалын әңгімелеп, талқылады. Көршілес аудандардан келген әріптестерімен бірге орталық музейдегі құнды жәдігерлерді көзбен көріп, ауданның өткен тарихына назар аударды.

Сапар барысында Қамыстыдағы ақсақалдар алқасы кеңесінің мүшелерімен де жүздесті. Сонымен қатар өнерпаздар дайындаған концерттік бағдарламаны тамашалады. Жұртшылықты Қасиетті Рамазан айы және алдағы дәстүрге айналған Наурыз мерекесімен шын жүректен құттықтады.

Кешкі ауызашарда Бас имам уағыз-насихат айтты. Оның ұлағатты да ой салар сөздерін жамағат ұйып тыңдады.

Қостанай облыстық мешітінің баспасөз қызметі

Қасиетті Рамазан айында қайырымдылық акцияларын өткізуге айрықша назар аударылуда. Соның бір жарқын көрінісі ретінде Қостанай облыстық «Аймағанбет қажы Спанұлы» мешіті жанындағы Бақытжан Икрам басқаратын Зекет және қайырымдылық қорының қызметкерлері есте қаларлықтай шара ұйымдастырды.

Осы ізгілік мақсатқа арналған жиында наиб имам Әлішер Балахмет кәмелетке толмаған бейімдеу орталығында тәрбиеленіп жатқан балаларды Оразамен құттықтады. Оларға арнайы дастархан жайылып, ыстық тамақ беріліп, тәттілер таратылды.

Қостанай облыстық мешітінің баспасөз қызметі

Қостанай аудандық «Маңдай батыр» мешітінің қызметкерлері Рамазан айы басталғаннан бері талай ұлағатты жиындар ұйымдастырып, халықтың тарапынан ыстық ықыласқа бөленуде.

Мәселен, ұстаз Гүлдананың жетекшілігімен Оразаның құрметіне әйелдер жамағаты Құран Кәрімді күнделікті бір парадан хатым жасап, өздерінің Ислам дініне деген құлшыныстарын танытуда.

Бас имам Дархан Сыздықов осынау Ораза барысында басқа да танымдық жағы мол шаралардың тиісті деңгейде өткізілуін тұрақты назарда ұстауда.

Қостанай облыстық мешітінің баспасөз қызметі

Қостанай қалалық “Жайлаубай ата” мешітінің үжымы әлеуметтік жағдайы төмен 15 отбасыға қайырымдылық көмек көрсетті. Оларға күнделікті тұтынатын азық-түлік табыс етілді.

Бас имам Шоқан қажы Әмірхановтың айтуына қарағанда, қасиетті Рамазан айының соңына дейін көп балалы және басқа да қолдауға зәру 90 отбасы қамқорлыққа алынады.

Қостанай облыстық мешітінің баспасөз қызметі

Облыстың Бас имамы Бектұрсын қажы Торғайбайұлы Қостанай жоғары педагогикалық колледжінің 2 курстағы бастауыш сынып мұғалімі мамандығы бойынша білім алып жатқан жастармен кездесіп, ақпараттық түсіндіру насихатын жүргізді. Кездесу мақсаты – жастар арасында жат ағымдардың зияны турасында жан-жақты түсінік беру.

Сонымен қатар қоғамда белең алған қатыгездік, мейірімсіздік сияқты жағдайлардың алдын алу үшін ихсан ілімі, рухани тәрбие негіздерін студенттерге баяндап берді. Біздің әр ісімізді Алла үнемі көріп-бақылаушы деген сенімнің аса қажеттілігін ұғындырды.

Қазақтың ұлттық құндылығы – салт-дәстүрде, мәдениеті мен ата дініміз Исламда екенін түсіндірді. Жан-жақты білімді, рухани кемел адам ғана түрлі жат ағымдардың жетегінде адаспайды, әркімнің соңына ілесіп кетпейді дей келе ұлттық тәрбие хақында да тұщымды ой қозғады. Насихат соңында халқымыздың салт-дәстүрлері жайлы сауалдарға нақты жауап берген студенттерге танымдық-тағылымдық жағы мол «Рухани діңгек», «Рамазанға қатысты 200 сұрақ», «Төртеу түгел болса» деп аталатын кітаптарды сыйға тартты.

Облыс орталығын жыл он екі ай айнадай жарқыратып таза ұстау оңай емес. Оған жұмысшылар қауымы жауынды-шашынды, қарлы-боранды күндері уақытпен санаспай өздерінің лайықты үлестерін қосып келеді.

Міне, қарапайым еңбек адамдарын қадірлеп, ілтипат көрсетуді Қостанай қалалық “Жайлаубай ата” мешітінің ұжымы басты парызымыз деп есептейді. Осы сөзіміздің нақты дәлелі ретінде олар таяуда қала тазалығын сақтауға тікелей атсалысып жүрген жұмысшыларға арнайы барып, құрмет көрсетті.

Оларды Рамазан айымен құттықтап, 120 мың теңгенің азық-түлігін табыс етті.

Қостанай облыстық мешітінің баспасөз қызметі