Өскемен қаласында өткен «Болашаққа бағдар: рухани жаңғыру және Халифа Алтайдың ғылыми мұрасы» атты халықаралық конференцияда Қазақстан мұсылмандары діни басқармасының төрағасы, Бас мүфти Ержан қажы Малғажыұлы осылай мәлімдеді.

«Елбасы «Туған жерге туыңды тік» бағдарламасын және «Қазақстанның киелі жерлерінің географиясы» мен «Жаһандағы заманауи қазақстандық мәдениет» жобаларын қолға алатынын жеткізді. Ел дамуына серпін бергелі отырған ұлт көшбасшысы көтерген бұл жобаларды іске асыруға ҚМДБ да қызу атсалысады. Елбасы айтқан туған жерді көркейтуге, сондай-ақ, Ұлытау төріндегі жәдігерлер, Қожа Ахмет Ясауи мав­золейі, Тараздың ежелгі ескерткіштері, Бекет ата кесенесі, Алтайдағы көне қорымдар мен Жеті­судың және басқа да жерлер­дегі зиярат орындары кешенін жасауға ҚМДБ мамандары мен дін ғалымдары да қал-қадерінше өз үлестерін қосатын болады», – деп атап өтті Бас мүфти.

ҚМДБ баспасөз қызметі

Өткен сенбі күні Қазақстан мұсылмандары діни басқармасының төрағасы, Бас мүфти Ержан қажы Малғажыұлының жүлдесі үшін қазақ күресінен ересектер арасында 4 республикалық турниріне баратын жолдама сарапқа салынды.

Оған облыс көлеміндегі барлық қалалар мен аудандардан салмағы 74 келіден астын палуандары қатысып бақтарын сынады.

Күреске есімдері елімізге белгілі азаматтар облыстық мешіттің Бас имамы Бахытбек қажы Тәжімбет, Марат Жұрқабаев жетекшілік ететін «Социум & Я» қоғамдық бірлестігі, Жанболат Умбетов басқаратын облыстық дін істері басқармасы мен Нурикан Нұғырбековтің «Діни проблемаларын зерттеу орталығы» ұйытқы болуымен ұйымдастырылған осынау күрес жоғары деңгейде өтті.

Қатысушылар шеберліктің жарқын үлгісін танытты. Жарысты ұйымдастырушылар да, ұлттық спортымыз десе ішкен астарын жерге қоятын замандастарымыз да дән риза болысты.

Сонымен «Жүзден жүйрік, мыңнан тұлпар»-демекші, бірінші орынға Жангелдин ауданыны «Оспан қожа әулие» мешітінің өкілі Қасымханов Жұмахан жеңіп алды. Сонымен қатар екінші орынға арналған жүлдені Аалтынсарин ауданы «Алдиярұлы Жанұзақ» мешіті атынан қатысқан Таласов Берік иеленді. Үшінші орынға Жітіқара ауданы «Ержан Тәтішев» мешітінің жамағаты Ищанов Әділге тапсырылды.

ҚМДБ-ның Қостанай облысындағы
өкілдігінің баспасөз қызметі

Қостанай облыстық мешітінің ұйытқы болуымен Ілияс Омаров атындағы облыстық қазақ драма театрында II республикалық имамдар форумы аясында «Ислам және өркениет» деп аталатын семинар өткізілді.

Бұл жиынды Қазақстан мұсылмандары діни басқармасының Қостанай облысы бойынша өкіл имамы Бахытбек қажы Тәжімбет ашып, жуырда елордамыз Астанада Қазақстан Республикасының Президенті Нұрсұлтан Назарбаевтың дін істері және азаматтық қоғам министрі Нұрлан Ермекбаевты, Бас мүфти Ержан қажы Маямеров және бірқатар өкіл имамдарды қабылдағанына тоқталды.

Сонымен қатар, II республикалық имамдар форумы өткізілгендігін және онда қаншама дін қайраткерлеріне болашақта бағдар болатын құжаттар қабылданғанын да тілге тиек етті.

Содан кейін облыстық дін істері жөніндегі басқарманың басшысы Жанболат Үмбетов те мемлекет басшысының «Болашаққа бағдар: рухани жаңғыру» деп аталатын мақаласының мәні мен мазмұны жайлы әңгімеледі.

Мұнда есімдері өңір ғана емес, елімізге белгілі ғалымдар Ақылбек Шаяхмет, Қалқаман Жақып пен дін қайраткерлері Шоқан қажы Әмірханов, Бектұрсын Уәлиевтер «Дін мен дәстүр», «XXI ғасырдың үздік зияткер имамы», «Қазақ даласына Ислам дінінің енуі», «Ханафи мазхабы мен матруди сенім мектебі» деген тақырыптарда баяндама жасап, қаншама деректер мен дәйектерді келтірді.

Бұл маңызды семинарға дін саласында жүрген имамдар, елге сыйлы қажылар және бұқаралық ақпарат құралдарының өкілдері қатысты.

Қазақстан мұсылмандары діни басқармасының Қостанай облысы бойынша өкіл имамы Бахытбек Нұрғабылұлы жиынды қорытындылай келе, қазіргі таңда барша имамдардың алдына қойылып отырған жайларға да тоқталды.

Бүгінгі имам тек діни ілімді меңгерген маман ғана емес, сегіз қырлы бір сырлы, мәмілегер, мемлекетшіл және ұлтжанды, сөзге шешен, барша қауымды соңынан ерте білетін ұйымдастырушылық қабілеті мол азамат болуы тиіс екендігін де баса айтты.

ҚМДБ-ның Қостанай облысы бойынша өкілдігінің баспасөз қызметі

Қазақстан мұсылмандары діни басқармасы соңғы жылдары көптеген игі шараларға мұрындық болып келеді. Осындай есте қаларлық оқиғалардың бірі өткен сәуір айында Астана қаласында ұйымдастырылған «Ислам және өркениет» атты II имамдар форумы.

Аталмыш форумда негізінен екі құжат қабылданды. Олар: «Ханафи мәзһабы мен Матуриди сенім мектебі – Қазақстандағы Исламның дәстүрлі жолы» және «Үздік зияткер имам» тұжырымдамасы.

Болашақта діни қызметкерлерге қойылар талап та жоғары. Олар тек діни білім ғана алып қоймайды, сонымен қатар, зайырлы қоғам ілімдерін де оқып, үнемі өздерінің білімдерін жетілдіріп отыруға тиіс. Қазіргі имам ол – мәмілегер, әдепті, төзімді, шешен, кішіпейіл де мейірімді және қарапайым болғаны абзал.

Міне, осы маңызды мәселелер Арқалық қалалық «Мухтасиб Әлмұхаммед» атындағы мешітіндегі басқосуда әңгіме арқауына айналды. Онда бас имам Бектұрсын Торғайбайұлы жиналған қауымға алда тұрған міндеттер жайлы айтып берді.

ҚМДБ-ның Қостанай облысы бойынша өкілдігінің баспасөз қызметі

Қарабалық ауданындағы «Ғашура ана» мешіт ұжымы мен аудандық ардагерлер кеңесінің ұйымдастыруымен «Ел тілегі – Бейбітшілік» тақырыбында соғыс ардагерлері мен тыл еңбеккерлеріне мерекелік дастархан жайылып, оларға лайықты құрмет көрсетілді.

Аталмыш мешіттің бас имамы Т.Керімбаев пен ардагерлер кеңесінің төрағасы С.Кабулова сөз алып оларға ең ізгі тілектерін білдірді. Сондай – ақ осы басқосуда қазіргі жарқын өмір үшін жаулармен шайқас кезінде шейіт болған боздақтардың әруақтарына бағышталып, құран оқылды.

Мешітте зейнет жасындағылар арасында шахматтан сайыс өтті. Мұнда бірінші орынды Б. Қапаров екінші орынды Б. Жарасбаев, үшінші орынды К. Құрманаев иеленді. Жеңімпаздарға мақтау қағаздары мен ақшалай сыйлықтар табыс етілді.

ҚМДБ-ның «Өткенге құрмет – елге құрмет» деген үндеуіне сәйкес жоғарыда аталған мешіт қызметкерлерінің бастамасымен бұл игі шара биыл да жалғасын тапты. Жуырда жергілікті жамағат, мекеме қызметкерлері және жалпы жұртшылық ұйымшылдық танытып, зираттар тазалығы күнін ұйымдастырды.

Жиналған қауым дүниеден өткен ата-баба, ағайын-туыстары жерленген бейіттің маңайын тазалап, марқұмдардың рухына арнап құран оқыды.

ҚМДБ-ның Қостанай облысы бойынша өкілдігінің баспасөз қызметі

Апат айтып келмейтіндігі белгілі. Үстіміздегі жылғы су тасқынынан Қарасу, Әулиекөл және Науырзым ауданының бірқатар ауылдары зардап шекті.

Міне, осындай қиын кезде жерлестерімізге қол ұшын берген әрбір азаматтың парызы болып саналады. Сондықтан да, облыстағы қалалар мен аудандардың барлық мешіттері мен «Зекет» қоры зардап шеккен елді мекендерге көмек көрсету мақсатында «Қостанай асары» атты қайырымдылық акциясын ұйымдастырды.

Акция аясында өңірде 2 млн теңгенің заттары жиналды. Оның ішінде 610 мың теңгесі қаражаттай, қалғандары ең қажетті азық-түлік пен киім-кешектер.

Облыстың бас имамы Бахытбек қажы Тәжімбет және Қажылар қауымдастығы облыстық филиалының төрағасы Жақсылық қажы Ғайсин Қарасу ауданында болып, жиналған заттарды табыс етті. Су тасқынынан зардап шеккен тұрғындармен кездесіп, оларға жылы лебіздерін білдірді.

ҚМДБ-ның Қостанай облысы бойынша өкілдігінің баспасөз қызметі.

Ішкілікті харам қылған аяттар бірте-бірте түсіп, һижреттің үшiншi жылында ішімдікке тыйым салынады.

«Олар сенен iшкiлiк пен құмар ойнаудың үкiмiн сұрайды. Сен: «Оларда үлкен күнә және адамдарға пайда да бар, алайда оның күнәсi пайдасынан тым зор», – деп айт» («Бақара» сүресі, 219-аят). Осы аят түскеннен кейiн, мұсылмандардың көпшілігі iшкiлiктi тастады.

Абдуррахман ибн Ауф бiр күнi кешкi асында шарап iшiп, кейiн ақшам намазында имамдыққа өтеді. Намазда «Кәфирун» сүресiндегi «Сендер (кәпiрлер) құлшылық еткен нәрселерге құлшылық етпеймiн» – деген жерде iшiмдiктiң әсерiмен «Сендер (кәпiрлер) құлшылық еткен нәрселерге құлшылық етемiн» – деп, қате оқиды. «Кәфирун» сүресінде төрт жерде «етпеймiн» деген мағынаны білдіретін «лә» шылауын оқымай тастап кетеді. Осылайша аяттың мағынасы өзгеріп шыға келеді. Міне, осы оқиғадан кейін «Ей, мүминдер! Не айтып жатқандарыңды бiлмейiнше мас күйде намазға жақындамаңдар!» («Ниса»сүресі, 43-аят) деген ішкілікке қатысты келесі аят түседі. Бұл аяттың да ішкілікті мүлдем харам қылмағанын аңғарған бірқатар мұсылмандар осынау жаман әдеттен арыла алмай, ішімдік ішуді жалғастыра береді. Бірде мұһажирлер (Меккеден Мәдинаға көшіп келген мұсылмандар) мен ансарлардың (Мәдиналық мұсылмандар) арасында ішкіліктің қызуымен кикілжің туындайды. Кикілжіңнің арты ұрыс-төбелеске ұласады. Ертесiне мастығы тарап, есiн жинаған мұсылмандар iстеген iсiне опық жеп, өкiнеді. Осы оқиғадан кейiн Құранның ішкілікті толықтай харам қылған «Ей, мүминдер! Арақ, құмар ойнау, пұттарға табыну, оларға мал шалу және бал ашатын шыбықтар – шайтанның лас iстерi. Олардан сақтаныңдар. Сонда ғана Алланың азабынан құтыласыңдар. Негiзiнен, шайтан арақ және құмар ойын арқылы араларыңа алауыздық, әрi кек салып, Алланы еске алудан және намаздан қол үздіруді қалайды» («Маида» сүресі, 90-91-аят) деген аят түседі.

Халифа Осман ибн Аффаннан ғибратты оқиға

«Сендер, арақтан аулақ болыңдар! Арақ – барлық жаманшылықтың атасы. Ертеде бір тақуа адам өмір сүріпті. Күндердің бірінде ниеті бұзық бір әйел әлгі адамға көңілі ауады. Қол астындағы күңін жұмсап әлгі адамды үйіндегі бір ісіне көмекке шақырады. Ол кісі көмек беруге келісіп, әйелдің үйіне келеді. Келген замат әйел тақуа кісіні үйге кіргізеді де, күңіне айтып, үйді сыртынан бекітіп тастайды. Бастапқыда не болғанын түсінбей дағдарған тақуа кісі сәлден кейін мән-жайды түсіне бастайды. Сол кезде барып, үйдің ішінде бір сұлу әйелдің отырғанын, жанында кішкене бала мен бір құмыра арақ тұрғанын байқайды. Әлгі әйел оған: «Саған үш шарт қоямын. Менімен көңілдес боласың, бұған келіспесең мына баланы өлтіресің, ал бұған да келіспесең, мына тұрған арақты ішесің» – дейді. Әрі-бері ойланып, ешбір амал таппаған әлгі кісі ақыры бір кесе арақ ішіп құтылуды жөн көреді. Арақты ішкеннен кейін қыза бастайды да, әйелдің құйып берген тағы бір кесесін ішіп жібереді. Бірнеше кесе ішіп мас болған соң, нәпсісіне ие болмай, әйелмен зина жасайды. Сонан осының бәріне куә болған жас сәбиді де өлтіріп тынған екен». Осылайша хикаяны айтып бітірген халифа: «Иман болған жерде арақ, арақ болған жерде иман болмайды», – деген екен.

Алкогольдің медицинадағы көрінісі

Өкпесі қабынып ауырған 6 айлық баланың кеудесіне шешесі күніне 3 рет арақпен компресс жасап, ем қолданған. Компресті үшінші күні жасағанда, нәрестенің уланғаны байқалады. Сәби 17 сағаттай ауыр халде жатып, 4 тәуліктен кейін ғана есін жиған. Өкінішке қарай, ата-аналар көп жағдайда спирттік өнімдерді емдік мақсатпен жас балаларға қолдана береді. Оның салдары осындай болатынын ұмытпаған абзал.

***

Швейцариялық дәрігер анасының ақ сүтін еметін сәбидің дүйсенбі және бейсенбі күндері аяқ-қолы дірілдеп талып қала беретінін байқаған. Сол дертті емдеу барысында нәрестенің анасын тексеріп, оның аптасына екі рет, сәрсенбі және жексенбі күндері жұмысқа бармай демалатыны белгілі болады. Міне, дәл осы демалыс күндерінде әлгі әйел аздап шарап ұрттайтын көрінеді. Сөйтіп келесі күні ана қанындағы алкоголь сүт арқылы нәрестенің организміне өтіп, оны талма ауруға ұшыратқаны анықталады.

Ішімдіктен аулақ болудың қарапайым қағидалары

1. Дос таңдай біліңіз және ішімдікке жақын жандардан аулақ жүру;

2. Сізді ішімдік ішуге үгіттеген адамға қарсы уәж айта білу;

3. Ішімдік ішумен ғана өтетін мерекелік кештерден аулақ жүру;

4. Әрдайым пайдалы істермен шұғылдануды әдетке айналдырыңыз;

5. Денсаулығыңызды күтіп ұстаңыз. Ішкіліктің денсаулыққа бірден-бір дұшпан екені әрдайым қаперіңізде болсын;

6. Спортпен шұғылданып, салауатты өмір салтына жіті мән беріңіз

Қазаққа «арақ» сөзі қайдан келген болуы мүмкін?

Араб адам денесінен шығатын терге «арақ» дейді. Ал қазақта ішімдікке «арақ» делінеді. Екеуінің арасында тығыз байланыс болуға тиіс. Осы сәтте Алла елшісінің (с.а.у.) мына бір хадисі есіме түсті: «Мына дүниеде ішімдік ішкен адамға ана дүниеде тозақтықтардың денесінен шығатын ірің мен терін ішкіземін деген Алла Тағаланың уәдесі бар». Осы хадисте де терге «арақ» делінген. Демек, қазекем ұрпағына арақ ішудің ақыреттегі жазасын үнемі ескертіп отырған. Тіпті ішімдіктен жиренту үшін оған «арақ» деген. Яғни, тозақтықтардың іріңі мен тері (Қайрат Жолдыбайұлы).

Алла елшісі (с.а.у.) «Алла Тағала арақты iшкенді, сатқанды, сатып алғанды, дайындағанды, дайындауға тапсырыс бергенді, тасымалдаушыны лағынеттедi!» – деп, ішімдіктің түрлі күнәнің бастауы екендігін баяндайды. Міне, осы сәттен бастап сахабалардың ешбiрi де iшiмдiк iшпеген және ішімдік саудасымен айналыспаған.

Қадірменді бауырлар, бойымызды арақтан алыстатып, жүрегімізге иман нұрын құюға шақырамыз! Алла баршамызды тура жолғай салғай!

Қазақстан мұсылмандары діни басқармасының Қостанай облысындағы өкіл имамы Бахытбек қажы Тәжімбетпен сұхбат

Бүгінгі сұхбаттасым Бахытбек Нұрғабылұлы Тәжімбеттің облысымызға бас имам болып тағайындалғанына әлі көп уақыт өтпегенімен, талай іргелі істерге мұрындық болды.

Оның келісімен «Наурыз» шағын ауданындағы үлкен мешіт пайдалануға берілді. Өңірдегі барлық имандылық ордалары бір қалыпқа келіп, сауат ашу курсының жұмыстары жандандана түсті. Жаңа имамдар қызметке тағайындалды.

Басқа да тындырылған жұмыстар аз емес. Әсіресе, терроризм мен экстремизмнің алдын алу мақсатында жергілікті имамдарға талап күшейіп, олардың біліктілігіне деген жауапкершілік нығайды.

Жақында біз оған арнайы жолығып, өзін толғандырып жүрген ой-толғамдарын жазып алған едік. Соны төменде көпшілік назарына ұсынып отырмыз.

Елбасының нақты тапсырмасы

-Сіз жуырда мемлекет басшысының Қазақстан мұсылмандары діни басқармасының өкілдерімен кездескенін де жақсы білесіз. Онда еліміздің кез-келген азаматына ой салар пікірлер айтылды. Сөздің реті келгенде, қостанайлық ағайындарға да сол жайлы айтып берсеңіз.

-Иә, мемлекет басшысы Елордамыз Астанада көрнекті дін қайраткерлерімен жүздесті. Оған дін істері және азаматтық қоғам министрі Нұрлан Ермекбаев, Бас мүфти Ержан қажы Маямеров және бірқатар өкіл имамдар қатысты.

Бұл басқосуда Елбасы алдымен еліміздің халқының өмірінде діннің ерекше орын алатындығына тоқталды. Мемлекетіміздің өмірінде тұрақтылық қашан да айрықша маңызға ие екендігін баса айтты.

Сонымен қатар жүздесуде Президент Қазақстанның болашағы жарқын, ұлтымыз тату болып, еліміз зайырлы мемлекет ретінде одан әрі дамуға тиістілігіне, біз өзіміздің игі мақсатымызға қарсы шыққандарға көне алмайтындығымызға, бұл — мемлекеттік аппараттың ғана емес, барша Қазақстан халқының, оның болашағының мүддесі екендігіне де кеңінен тоқталды.

-Баршаға мәлім, жуырда Елбасының: «Болашаққа бағдар: рухани жаңғыру» деп аталатын жұртшылықты серпілткен мақаласы жарық көрді. Қазіргі таңда бүкіл елімізде осы көптен күткен жайға байланысты қалың жұртшылық өздерінің пікірін білдіріп жатыр. Осы жайға байланысты өзіңіздің де ой-толғамдарыңыз бар шығар?

-Мемлекет басшысының осы мақаласында халқымызды толғандырып жүрген көптеген жайлар жан-жақты айтылған.

Оның әрбір тұжырымы жүрегі елім, халқым деп соғатын азаматты бей-жай қалдырмайтындығы даусыз. Өткен тәуелсіздік алған ширек ғасырда экономика саласында қаншама асуларды алып, биіктерді бағындырдық. Қазір біз әлем жұртшылығы санасатын мемлекеттердің қатарындамыз.

Енді тіліміз, дінімізді ата-бабамыздан келе жатқан салт-дәстүрімізді барынша жандандыратын шақ туды. Әсіресе, ұлттық кодымызды сақтап қалу жолында бәріміз де бір кісідей жұмылуымыз керек. Мұны кез-келген мұсылман ағайын жете ұғады деген сенімдемін.

Атамыз қазақ «Туған жерге туыңды тік» дегеніндей кімге де болсын оның туып өсіп, кіндік қаны тамған жері ерекше ыстық. Сондықтан аталған мақалада Президентіміз айтып өткендей, туған жерге нағыз жанашырлық танытатын, бойымыздағы патриоттық сезімімізді көрсететін кез келген секілді.

Сонымен қатар 2025 жылдан бастап әліпбиге көшкелі отырмыз. Мұны да мемлекет басшысы нықтап айтты. Одан қорқып - үркетіндей ештеңесі жоқ. Тарихтан мәлім, бір кездері біз осы әліпбиді қолдандық, бірақ кейін сол кездегі солақай саясаттың кесірінен тоқтап, қазіргі кирилицаға көшкен едік.

Қысқасы, бұл мақалада айтылғандардың бәрі де ұлттың мүддесін көздейді. Енді бәріміз де жұдырықтай жұмылып, ертеңгі ұрпағымыз айтып жүретіндей жұмыс істейтін кез келді.

Қостанай менің ыстық мекеніме айналды

-Сіз еліміздің Оңтүстік өңірлерінде болып, шет елде терең білім алған азаматсыз. Қостанайға келіп, осы өңірдің бір азаматына айналдыңыз. Өзіңіздің парасатыңыздың жоғары екендігін дәлелдедіңіз. Келгелі бері көрген- түйгендеріңізбен бөліссеңіз.

-Иә, қазақтың жері бәрімізге де ортақ. Қостанайға келгеніме де көп өткен жоқ. Өзімнің жастайымнан талшыбықты ат қылып мініп-өскен әрі кіндік қаным тамған туған жерімдей болып кетті.

Бұл ең алдымен мақсат пен мүдденің бірлігі. Жергілікті халықтың үлкен-кішісі ұлтымызға тән бауырлық қасиеттерін көрсетіп, құшақ жая қарсы алды.

Қазір өзіммен келген ата-анам да әбден үйренді. Олар да өз қатарларымен тонның ішкі бауындай араласып кетті. Бұл өңір бұрыннан маған таныс еді. Шоқан Уәлиханов, Ыбырай Алтынсарин, Ахмет Байтұрсынов, Міржақып Дулатов, Ілияс Омаров секілді ірі тұлғалар шыққан киелі жерде кім білмейді?!

- Өткен жылдары имамдар арасында ротация болып, олардың арасында жұмыс орны ауыстырылды. Бұл мәселе жөнінде не айтасыз?

-Бұл Қазақстан мұсылмандары діни басқармасының бекіткен ережесінің бір тармағы және уақыт талабы. Бұл тек Қостнайда ғана емес республика көлемінде жасалып жатқан жұмыс. Әрине, оларды бір жерден екінші жерге жібермес бұрын, олардың тәжірибесі, білімділігі, отбасының жайы ескерілді.

Өйткені, бір орында ұзақ отырған адам ізденуден қалады. Сондықтан мұндай ауысудың өзіндік артықшылықтары да бар. Жаңа ауданға немесе қалаға барған адам тек алға қарай талпынады. Жергілікті жұртшылықпен қоян-қолтық араласып, өз қызметіне барынша жауапкершілікпен қарайды. Мұны өмірден де көріп жүрміз.

-Бірқатар азаматтарға сенім артып, лауазымын көтердіңіз. Солар жөнінде де қысқаша тоқтала өтсеңіз?

-Бұл сөзіңіздің жаны бар. Біз қызмет бабымен өсіргенде оның халық алдындағы беделіне, көп жылғы тәжірибесіне ерекше назар аударамыз. Мысалы, Рудный қаласының бұрынғы бас имамы Сейіт Нұрқановты облыстық мешітке найб имам болып тағайындалды.

Ол Жамбыл облысы Мерке ауданындағы медресені бітірген. Көп жайды өз көзімен көріп, әбден шыңдалған азамат. Көптің алдында қысылмай сөйлейтін шешендік өнері де бар. Біз мұндай азаматтарға қашан да қолдау көрсетеміз.

Жалпы өңірде мұндай қолынан іс келетін әрі дін жолында өзін көрсеткен жігіттер баршылық. Қажет кезінде олардың арасынан да кейбіреулеріне сенім артуға әбден болады.

-«Зекет» қоры жөнінде бірер сөз айтсаңыз?

-Өздеріңіз де білетін шығарсыздар, осыдан біраз жыл бұрын барлық аймақтарда «Зекет» қорының өкілдіктері ашылды. Біздің мешіттің жанашыры әрі облысқа танымал ақсақалымыз Жақсылық Ғайсин осы қорға жауапты болып бекітілді.

Ұзақ жылдар бойы мемлекеттік қызметте болып, халықтың құрметіне бөленген абыз ағамыз жұмысты бірден дөңгелетіп алып кетті. Соның нәтижесінде іскер адамдардың қолдауымен біраз қаражат жиналып, облыстағы молдаларға жалақы ретінде берілді. Өйткені, ол жерлерің мешіттерінде түсім шамалы.

-Жақында Елбасымен кездесуде де имамдардың діни сауаттылықты нығайтуда оларға жүктелетін міндеттер жайлы да айтылды. Әсіресе, олардың бойындағы патриоттық сезімге айрықша көңіл бөлінетіндігі хақында да сөз болды.

-Дұрыс айтасыз, қазіргі имамдардың деңгейі мен қарым - қабілетін тәуелсіздік алған алғашқы жылдардағымен мүлдем салыстыруға болмайды. Айырмашылығы жер мен көктей. Өйткені, мемлекет басшысының қолдауымен қаншама жастарымыз шет елдерде білім алды.

Сондай-ақ Алматыдағы «Нұр-Мүбарак» Египет ислам мәдениеті университеті, республика көлеміндегі діни медреселері және имамдардың біліктілігін арттыру институты секілді білім ордалары баршылық.

Мысалы бұл күндері біздің өңірден 24 студент аталмыш жоғары оқу орнында, ал 19 шәкірт еліміздегі медреселерде білім алуда. «Жақсының жақсылығын айт нұры тасысын» демекші менің наиб имамдарым Дархан Сыздықов пен Әлішер Балахмет әңгімеге арқау болған университетті үздік бітірген түлектер.

Қазір екеуі де есімдерін ел таныған дін қайраткерлері. Облыстық мешіттің жұмысын жандандыруға өздерінің қомақты үлестерін қосып жатқандықтары баршаны қуантады.

-Бақытбек қажы, көкейде жүрген сауал өте көп еді. Оның бәрін бір сұхбатта қамту да мүмкін емес. Дегенмен, сіз алда келе жатқан қасиетті Рамазан айына дайындық және оны өткізу жөніндегі пікіріңізбен бөліссеңіз.

-Иә, Рамазан айының мұсылмандардың өмірінде алатын орны ерекше. Бір қуантарлығы оның қадір-қасиетін түсініп, өңірімізде ораза ұстаушылардың қатары жылдан-жылға артып келеді. Оның ішінде жастар да жеткілікті.

Себебі, халық ораза ұстаудың адам ағзасына тигізер пайдасын жете ұғынған. Былтыр жылғы Рамазан айы өңірімізде өте жоғары деңгейде өтті. Отыз күн бойы мешіт жанынан арнайы орын бөлініп, «Жұмыла көтерген жүк жеңіл» демекші, әкімдерден бастап, барша іскер азаматтар ауыз ашар берді. Сөйтіп, халықтың алғысына бөленді.

Биыл да осындай игі істер жалғасын табады деген сеніміміз мол. Қазір осы бағытта жұмыс істеп жатырмыз. Өз басым Рамазан айында ораза ұстаушылар саны көбейіп, дүкендерде арақ-шарап ішімдіктер сатылмаса деген ұсыныс бар.

Әңгімелескен Оразалы Жақсанов

«ҚАЗАҚСТАН МҰСЫЛМАНДАРЫ ДІНИ БАСҚАРМАСЫ» РЕСПУБЛИКАЛЫҚ ИСЛАМИ ДІНИ БІРЛЕСТІГІНІҢ ӘБУ ХАНИФА МЕДРЕСЕ КОЛЛЕДЖІ

2017-2018 оқу жылына Алматы қаласы, Медеу ауданында орналасқан Техникалық және кәсіптік білім беру беру мақсатында ашылған колледжге оқуға түсемін дейтін талапкерлердің өтініштерін қабылдау 20 маусымнан бастап 20 тамыз аралығында жүзеге асырылады.

Қазіргі таңда оқуға түскісі келетін талпкерлерге дайындық курсы жүріп жатыр. Келіп оқимын деушілерге есік ашық.

Мемлекеттік лицензиясы: № KZ79LAA00007509

Мамандығы: 0112000 - ИСЛАМТАНУ

Біліктілік: 0112013 - «ИМАМ-ХАТИБ»

Оқу түрі: күндізгі

Оқу мерзімі – 2 жыл 10 ай

Бітірушілерге мемлекеттік үлгідегі диплом беріледі.

Медресе оқу ғимаратында кітапхана, компьютер сыныбы, лекциялық аудиториялар, асхана, жатақхана және басқа да материалдық базасымен толық қамтамасыз етілген. Медреседе жоғары тәжрибелі исламтанушы мамандармен бірге медресе қабырғасында бірнеше жылдық іс-тәжрибесі бар оқытушылар дәріс береді. Олардың ішінде шетелден шақырылған арнайы мамандар да бар.

Медресе шәкірттері емтихан нәтижесі бойынша қабылданады.

Колледж студенттері емтихан нәтижесі бойынша қабылданады.

Талапкерлер төмендегі құжаттарды тапсыруы қажет:

— Колледж директоры атына өтініш.

— Жергілікті имамдардың берген ұсынысы.

— Орта білімі туралы аттестат

— 086 үлгідегі дәрігерлік анықтама

— 063 үлгідегі дәрігерлік анықтама

— Психодиспансерден анықтама

— Наркодиспансерден анықтама

— Көлемі 3х4 сурет (6 дана)

— Жеке куәліктің көшірмесі.

— Әскери билеті немесе әскерге шақыру туралы куәлігі.

— Тұрғылықты жерден анықтама.

— Сотталмағандығы жөнінде анықтама.

— Конверт.

— Құжаттарды тігуге арналған іс-парағы.

Мекен жайымыз: Алматы қаласы, Медеу ауданы, Пушкин көшсі, 12.
Байланыс тел:

8 (727) 397 – 62 – 99
+7 702 305 04 35
+7 707 551 55 05