Қазақстан мұсылмандары діни басқармасының Қостанай облысы бойынша өкіл имамы Бахытбек Нұрғабылұлы Тәжімбет сан қырлы азамат. Ол тек өз саласының білікті маманы ғана емес, руханиятқа да жаны жақын екендігін дәлелдеді.
Облыс орталығындағы жаңа мешіт пайдалануға берілгелі де қаншама игі істер атқарылды. Жұртшылыққа берері мол конференциялар және басқа да маңызды тақырыпта басқосулар жиі өткізіліп тұрады.
Міне, осы жайларды бұқаралық ақпарат құралдары қызметкерлерінің халыққа жеткізуде сіңіріп жатқан еңбектері де зор. Мұны бас имам жете түсінеді.
Үстіміздегі жылғы журналистер қауымының мерекесіне де айрықша назар аударды. Өңірдегі газет және телевидения саласында жемісті жұмыс істеп жатқан бір топ тілшілерді арнайы шақырып, оларға құрмет көрсетті.
Бахытбек Нұрғабылұлы әріптестерімізге Қазақстан мұсылмандары діни басқармасының Қостанай облысы бойынша өкілдігінің атынан Алғыс хаттарды салтанатты түрде тапсырып, сый-сияпат жасады.
-Журналист ағайындар мешіт пен оқырмандар арасындағы алтын көпір болып табылады. Біз алдағы уақытта да бұқаралық ақпарат құралдарымен тығыз байланыста жұмыс істей береміз, — дейді өкілдіктің жауапты қызметкері Қанат Орынтайұлы.
ҚМДБ-ның Қостанай облысы бойынша өкілдігінің баспасөз қызметі
Еліміз жыл сайын Құрбан айт мейрамын ұлан-асыр тойлап келеді. Бірақ биыл Тобыл жұртшылығы қасиетті Рамазан айынан кейін келетін Ораза айт мерекесін ерекше сән-салтанатпен атап өтті. Облыстық мешіттің ұйытқы болуымен Қостанайдағы «Махито» демалыс кешенінде ұйымдастырылған рухани шараға өңіріміздің барлық аудан-қаласы мен еліміздің бірқатар аймақтарынан арнайы келген қадірлі меймандардың қатары көп.
— Соңғы жылдары Қостанай аймағында руханият жағынан үлкен сілкіністер болды. Облыс орталығында сәні мен сәулеті жарасқан мешіт ашылып жатыр. Діни мерекелерді атап өтудің де артықшылықтары байқалады. Бұл да асыл дініміз бен ұлттық болмысымызды арттырудың бір көрінісі, — деген белгілі ұстаз, ҚМДБ шариғат және пәтуа бөлімінің бас маманы Сансызбай Құрбанұлы енді өңірде Тобыл өзенінің жағалауында дүйім жұрттың басын қосып, ұйымдастырып отырған Ораза айт мейрамы көпке үлгі боларлық әрі қызығарлық іс екенін жасырмады.
ҚМДБ Солтүстік Қазақстан, Ақтөбе, Ақмола облысы бойынша өкіл-имамдары да ұлық мерекеге ақжарды тілектерін білдіріп жатты. Ал есімдері Алашқа белгілі қос айтыскер ақын Айбек Қалиев пен Елордадан арнайы келген Серікзат Дүйсенғазин сөз сайыстырып, кестелі жырға сусап отырған көпшілікті бір серпілтіп тастағанын айта кетейік. Замандастар бүгінгідей рухани күннің артықшылығын, еліміздің діни тұрақтылыған айналып өткен жоқ. Дегенмен олардың әдемі әзілдеріне жұрт қиқу салып отырды. Әсіресе, Айбек ақынның Серікзатқа қарап, «Біздің өңірімізге келген бас имамдарды көп ұзатпай Астанаға алып кететін әдеттерің бар. Ендігі кезек Бахытбек Тәжімбетке жетіп жүрмесін» деп қағытып өтті. Қарсыласы да қарап қалған жоқ: «Біз имамадарыңызды іскер, көпке абыройлы болған соң алып кетіп жатырмыз» деді.
ҚМДБ Қостанай облысы бойынша өкіл имамы Бахытбек Тәжімбет елдің ыстық ықыласына бөленген екі ақынға демеушілер атынан қос арғымақ мінгізді. Өткен Рамазан айында облыстық мешітте пайғамбар хадистерін жатқа айтудан сайыс өткен екен. Бас имам аталған жарыстың жүлдеді орын иегерлерін марапатсыз қалдырған жоқ. Ал көмекке мұқтаж З.Нұрғалиеваның отбасына және ұлты басқа болса да, ана тілімізді кеңінен насихаттап жүрген И.Хусайыноваға сый-сияпаттар жасалды.
— Бүгінгі сыйлықтың зоры – үлкен қажылыққа жолдама. Демеушілер атынан алдағы Құрбан айт мерекесіне орай, қасиетті Мекке қаласына мешітіміздің жамағаты Қайрат Қалабайұлы баратын болады, — деді Б.Тәжімбет.
Аймағымыз бен көршілес облыстардан келген өнерпаздар, ҚР ІІМ Ш.Қабылбаев атындағы Қостанай Академияның тыңдаушылары қойған әскери ұрыс жаттығуларынан көрініс, өңіріміздегі Түрік этно-мәдени орталығы «Горцы Ахыска» ансамблінің кавказ биі мерекелік шараның көрігін қыздырып әкетті. Демалыс кешенінің бір бөлігінде «Социум және мен» қоғамдық бірлестігі түрлі ұлттық спорттық ойындардан жарыстар өткізгенін айта кету керек. Ал мереке соңында барша жамағатқа дастархан жайылып, дұға бағышталды.
Қыдырбек ҚИЫСХАНҰЛЫ
Суреттерді түсірген Бағдат АХМЕТБЕКОВ
Құран - адамзаттың екі дүниелік бақыты үшін шырақ етіп түсірген Алла Тағаланың қасиетті кітабы.
Жақында Қарабалық ауданының орталығындағы «Ғашура ана» мешітінде берекелі Рамазан айының құрметіне Құран Кәрімді жатқа оқудан сайыс өткізілді. Бұл сайыстың негізгі мақсаты - мешіт шәкірттерінің осы уақытқа дейінгі алған білімдерін шыңдау және енді үйренушілердің қасиетті кітапқа деген қызығушылығын ояту.
Талапкерлердің сауаттылығы мен діни білім деңгейіне қари Ихромудин Замиров және мешіт жамағаттары Байқал, Роза және Райхан қажылар әділ қазылық етті.
Жеңімпаздарға ақшалай сыйлық пен мақтау қағаздары табыс етілді. Бұл берері мол рухани шараға қатысушы шәкірттердің барлығы ынталандыру сыйлықтарына ие болды.
Марапаттау салтанатынан кейін жиналған жамағатқа арнайы ауыз ашар дастарханы жайылып, ас берілді.
«Ғашура ана» мешітінің бас имамы Төлеген қажы Арғынбайұлы жоғарыда аталған жарысты өткізуге демеушілік еткен Мәлік Молдахметовқа аудан мұсылмандары атынан шынайы алғысын білдірді.
ҚМДБ-ның Қостанай облысы бойынша өкілдігінің баспасөз қызметі
Құрметті Қостанайлықтар және қала қонақтары сіздерді ү.ж. 27 маусым сағат 10.30-да, Гашека көшесінің бойында Тәуелсіздіктің 25 жылдығы саябағында (КЖБИ ауданындағы Тобыл жағалауы) өтетін Ораза айт мейрамына арналған мерекелік рухани кешімізге шақырамыз.
Бұл, Ораза айтты атап өтудегі негізгі мақсат – Алла Тағаланы мадақтап, пайғамбарымыз Мұхаммадты (ﷺ) құрмет тұту, ел бірлігін насихаттап, жастарға имандылық қағидаттарын ұғындыру, қоғамымыздағы адамдарды Отан сүйгіштікке, бауырмалдылыққа, адамгершілікке, ата-ананы құрметтеуге және түрлі теріс пиғыл-қылықтардан ада болуға шақыру.
Осынау айтулы мейрамды атап өту арқылы, дәстүрлі Ислам дінінің негізі мен мән-маңызын тереңірек түсінуді Алла Тағала баршамызға да нәсіп етсін.
ҚМДБ-ның Қостанай облысындағы
өкілдігінің баспасөз қызметі
Рудный қаласының Қашар кентінде тұратын қазақ қызы Марина Аманова барша жүрегі нәзік жандарға тағылым боларлықтай игі іс атқарды.
Ол өзінің бір күнін "Мейірімді шаштараз" деп атап, қасиетті Рамазан айының құрметіне барлық келушілерге тегін қызмет көрсетті. Оның осы қайырымдылық жұмысына жерлестері дән риза болды.
Өзінің парасаттылығын танытып, имандылық қырынан көзге түскен Маринаға алдағы уақытта тек ғана сәттілік тілейміз.
ҚМДБ-ның Қостанай облысы бойынша өкілдігінің баспасөз қызметі
Таяуда Қостанай облысы өкілдігінің ұйымдастыруымен Қостанай ауданының «Маңдай батыр» мешітінде Қазақстан мұсылмандары діни басқармасының төрағасы, Бас мүфти Ержан қажы Малғажыұлы хазреттің атынан ауызашар берілді.
Осынау ауызашар рәсімінде облыс мешіттің найб имамы Бақытжан қажы қатысып, Рамазан айының ерекшелігі мен қадір-қасиеті жайында уағыз-насихат айтты. Аталмыш басқосуда осы қасиетті айда кімде-кім мүмкіндігінше жақсылық жасайтын болса, Алла Тағала тарапынан сауапқа молынан кенелетінін сөзге тиек етті.
Ауызашарға қатысқан жамағат муфти хазреттің атынан берілген ауызашарға шынайы ризашылықтарын білдірді. Оған жауапты да абыройлы қызметінде табыс, деніне саулық тіледі.
ҚМДБ-ның Қостанай облысындағы
өкілдігінің баспасөз қызметі
Қостанай облыстық мешітінде «Халал астың маңыздылығы» деп аталатын семинар болып өтті. Оған Қазақстан мұсылмандары діни басқармасының халал өнімдерін стандарттау және қажылық бөлімінің басшысы Бейбіт Мырзагелдиев «Халал даму» жауапкершілігі шектеулі серіктестігінің бас сарапшы маманы Алмагүл Әбілдинова және өңірдегі аудандар мен қалалардың имамдары, халалға байланысты мейрамханалары бар азаматтар мен қасапшылар қатысты.
Семинарды Қостанай облысының өкілі бас имам Бахытбек қажы Тәжімбет ашып, басқосудың мәні мен мақсатына тоқталды.
Содан кейін есімі елімізге кеңінен танымал Бейбіт Мырзагелдиев сөз сөйлеп, Бас мүфти Ержан қажы Малғажыұлы қазіргі таңда бүгін әңгіме арқауына айналып отырған халал жайына ерекше назар аударып отырғандығын тілге тиек етті. Сонымен қатар Қазақстан мұсылмандары діни басқармасының жанынан ашылған өзі басқаратын бөлімнің тыныс-тіршілігі жайлы жиналған жұртшылықты жан-жақты хабардар етті.
Бұл күндері «Халал даму» жауапкершілігі шектеулі серіктестігінің құрылтайшысы да аталған діни басқарма екендігін айта келіп, республикамыздың барлық өңірлерінде оның бөлімшелері де жұмыс істейтін болатындығын мәлімдеді.
Ал Қостанай өңірінде осы маңызды мәселемен айналысу облыстық мешіттің наиб имамы Сейіт Темірбекұлына үлкен сеніммен тапсырылып отырғандығын айтып өтті.
Сондай-ақ бұл жиында өз саласының білікті маманы, «Халал даму» жауапкершілігі шектеулі серіктестігінің бас сарапшысы Алмагүл Әбілдинова күн тәртібіндегі маңызды мәселе хақында өзінің ойын ортаға салып, еліміздегі осы бағытта атқарылып жатқан игі жұмыстарға шолу жасады.
Басқосуда өңірімізден арнайы келген азаматтар өздерін толғандырған сауалдарына нақты жауап алды.
ҚМДБ-ның Қостанай облысы бойынша өкілдігінің баспасөз қызметі
ҰБТ – алтын ұясынан ұзамаған бозбала мен бойжеткен үшін оңай сынақ емес. Сіздің болашағыңыздың бір кірпіші осы ұпаймен қаланады. Ендеше ҰБТ-ға бармас бұрын мына бес кеңеске назар салыңыз.
1. Үйден шыққанда айтылатын дұғаны ұмытпау.
«Бисмилләһ, тәуәккәлту ъаләллаһ, уә лә хаулә уә лә қууата иллә билләһ» («Алланың атымен, Аллаға тәуекел еттім. Алла Тағаланың күш-қуатынан асатын ешқандай күш-қуат жоқ»). Кімде-кім үйден шығарда осы сөздерді айтса, оған: «Сен тура жолдасың, құтылдың әрі қорғаулысың» деп айтылады. Сол кезде шайтан ол адамнан қашады да басқа шайтанға барып: «Сен тура жолдағы, құтылған әрі қорғалған адамға не істей аласың?» – деп айтады»
. Ғалымдар осы хадистегі «құтылу» сөзіне қатысты: «Ол адам екі дүниеде уайым салатын нәрсенің бәрінен құтылады» деген [1].
2. Ниетті түзеу.
«Әрбір амал ниетке байланысты..»
[2]. Яғни, адамның ниеті дұрыс болған сайын Аллаға ұнамды, Алланың жәрдемі жақын. ҰБТ балы саған не үшін керек? Біріншіден, білім талап ету – әрбір мұсылманға парыз етілген. Ол осы арқылы надандықтан құтылады, өзгелерге көмектеседі. Екіншіден, білімді, мықты болған, кәсібін кемел игерген мұсылман – әлсіз мұсылманға қарағанда Аллаға сүйіктірек. Егер ол сол меңгерген кәсібі арқылы Отанына, қоғамға, туған-туысына пайда келтірсе, тағы да Аллаға ұнамды болады. Төртіншіден, ата-ана баласымен мақтанғысы, оның жетістігін көргісі келеді. Оның жоғары балл жинап, жақсы мамандықтың оқуына түсуі – ата-анасын разы ететін істерден. Ал Алланың разылығы – ата-ананың разылығында. Ендеше, бауырым, сен де ниетіңді ізгілікке қарай баста!
3. Тәуекел ету. Құранда: «Кім Аллаға жүгініп, Оған ісін тапсырса (Тәуекел етсе), Ол оған жеткілікті. Ақиқатында, Алла – ісін соңына жеткізуші. Алла әрбір нәрсеге өлшем белгілеген» [3] делінген. Жеткілікті! Аллаға дұрыс тәуекел жасаған адамға басқа ешнәрсе қажет емес деген сөз. Дұрыс тәуекел екі ретпен жасалады: біріншісі – себептерін орындау, екіншісі – Аллаға тапсыру. Мәселен, сапар алдында мұздақтың болуынан хабардар болған жүргізуші, сапалы әрі жаңа дөңгелегіне емес, емтихан тапсырғалы отырған студент не оқушы біліміне яки ақшасына, танысына емес, бір Аллаға сенуі тиіс. Өйткені, кейде жаңа дөңгелекті көліктер апатқа ұшырайды, жақсы оқитын, ақшасы мен танысы көп оқушылар да төмен ұпай жинайды. Сонда оқушы, бар күшін салып дайындалып болғаннан кейін: «Я, Мейірімді де Құдіретті Алла! Міне, мен қолымнан келгенін жасадым, ары қарай ешнәрсеге күшім жетпейді. Тек сен қолдасаң, сен қаласаң ғана ісім оңға баспақ! Өзіңнен ғана жәрдем сұраймын!» деп нәтижені Аллаға тапсыруы тиіс. Ал Алла Тағала оған «Мен саған жеткіліктімін, ісіңді соңына жеткіземін» деп уәде беріп қойған. Күллі әлем қазыналарының, жүректердің, істердің иесі болған Аллаға тәуекел еткеннің уайымы болмайды.
4. Тестілеуді Алланың атымен бастау. «Бисмилләһир-рахманир-рахим» (Аса Қамқор, ерекше Мейірімді Алланың атымен) деген сөзбен басталған іс берекелі болады. Алла Тағала да Құранда Өз аяттарын осы сөзбен бастайды және Мұхаммед Пайғамар да (оған Алланың игілігі мен сәлемі болсын) істерін Алланың атымен бастаған. Сондай-ақ, тестілеу барысында сабырлы қалыпты сақтап, уақытты күзетіп, асығыстыққа берілмеген дұрыс. Қазақ халқының «асыққан – шайтанның ісі» деген сөзі қасиетті хадис мәтіндерімен астасып жатыр. Алла Елшісі (оған Алланың игілігі мен сәлемі болсын):
«Сабыр – Алладан, асығу – шайтаннан»
, деген [4]. Оқушы Алланың Мейірімді, Естуші, Көруші, Әділ, Білуші екенін ұмытпасын. Сен Оған дұға жасадың ба, Оған ғана тәуекел еттің бе, онда Алла Тағаланың сен үшін қайырлы нәрсе нәсіп ететіндігіне сен. Өзіңе ғана жақсылық тілеп, басқаларға теріс ниетті болудан сақтан. Керісінше, сыныптастарың, аудиторияластарың үшін де дұға жаса. Сонда ұтасың! Өйткені, хадисте:«Мұсылманның мұсылманға жасаған дұғасы қабыл болады. Мұсылман бауыры үшін тілек айтқанда, періштелер «Әумин, Алла саған да бауырың үшін сұрағанды берсін»
деп айтады [5]. Қандай керемет! Сен адам үшін дұға етсең, сен үшін періште дұға етеді!
5. Тағдырға разы болу. Қандай да біркелеңсіздік, сәтсіздік болса да бар иманыңды жинап, бұйырғанға разы болуғатырыс. «Бұйырған кетпейді, қуған жетпейді». Өйткені, сен басқа жаратылыстан емес, әлемдердің Раббысынан сұрадың, Оған әлдеқашан ісіңді тапсырып қойғансың. Демек, болған істе сен үшін үлкен қайыр бар. Алайда, сен оны білмейсің. Керісінше, қиындықтың артынан келетін жақсылықты күт. Сондай-ақ, Алла Елшісі (оған Алланың игілігі мен сәлемі болсын):
«Сендердің біреулерің қандайда бір қиындыққа тап болғанда, егер де мен бұлайістемегенде, бұл нәрсе болмас еді» демесін, «Бәрі де Алланың қалауымен» десін. Өйткені, «егер» шайтанға есік ашады»
, [6] деген. Олай болса, «Құдайсыз қурайдың да сынбайтынын» ұмытпағайсың, бауырым!
[1]Әбу Дәуд
[2] Бұхари, Муслим
[3] Талақ» сүресі, 3-аят
[4] Байхақи, Абу Яғла
[5] Муслим
[6] Муслим
Міне үстіміздегі жылдың оразасы да аяқталуға жақындап қалды. Облыс орталығындағы зәулім мешітте демеушілердің қолдауымен күніне 500-ден астам ораза ұстаушыларға ауызашар берілуде.
Мұндай игілікті шара облысымыздың көптеген мешіттерінде жүзеге асырылуда. Жалпы, облыс көлемінде күніне шамамен 2350-ге жуық халыққа дастарқан жайылып, жүрегі жомарт азаматтар олардың шынайы алғысын алуда.
Әрине, бұл тек ас ішіп, аяқ босату емес. Әрбір ауызашар рәсімінде имамдар уағыз айтса, Қалқаман Жақып, Ақылбек Шаяхмет секілді елге танымал тұлғалар дін мен дәстүрді дәріптейтін ұлағатты да әсерлі әңгімелерімен көпшіліктің ілтипатына бөленуде.
Сонымен қатар, мешітіміздің жас мамандары Әлішер Балахмет пен Тимур Туребаевтар өздерінің ой-өрістерінің кеңдігін көрсетіп, оразаға қатысты түрлі викториналық сұрақтармен жамағаттың көңілінен шығуда.
Сондай-ақ гір тастарын көтеруден, планкада тұрудан және басқа да спорт түрлерінен тағылымдық жағы мол шаралар да өткізіліп келеді.
Бұл берері мол басқосуларда қазіргі кезде мұсылмандардың үйлену тойы, баланың ақиқасы мен шілдеханасын өткізуге белсене атсалысып жүрген Азамат пен Талғат секілді асабалар сөз маржанын төгіп, ауызашарлардың көркін барынша аша түсуде.
Сонымен бірге, Федоров ауданындағы «Жиентай қажы» мешітінде Рамазан айының құрметіне жамағат арасында волейболдан жарыс өткізілсе. Әулиекөл ауданындағы «Әмит ишан» мешіті «Ораза айында ішімдік сатпау» акциясын ұйымдастырды. Бұл игі бастамаға аудандағы 10 дүкен қолдау көрсетті. Әрине, бұл да түсінген кісіге салауатты өмір салтын ұстануға бастайтын ізгі амалдың бастауы.
Жалпы, әрбір ауызашарларға қатысқан жерлестеріміз өздерінің дән ризашылықтарын білдіріп жатқаны бәрімізді де қуантады.
ҚМДБ-ның Қостанай облысындағы
өкілдігінің баспасөз қызметі
Дініміздің негізгі әмірін бізге Алла Тағала Құранның мына аятында былай деп әмір етеді:
وَمَا أُمِرُوا إِلَّا لِيَعْبُدُوا اللَّهَ مُخْلِصِينَ لَهُ الدِّينَ حُنَفَاءَ
«Ал олар, ханиф болған /Алладан басқа құдай жоқ деп иман келтірген/ түрде Оған діндерін /серік қосудан/ тазартып құлшылық етуден басқаға бұйырылмаған еді» (Бәйинә» сүресі, 5-аят). Қарапайым халық шынайы ниетің қабыл болсын деп жатады. Өйткені шынайы болмаған нәрсе, Алла Тағаланың алдында қабыл емес. Пайғамбарымыз (ﷺ) да өзінің мүбәрәк хадис шәрифтерінің бірінде ықылас пен шынайылық турасында былай деген екен:
عَنْ أَبِي رُقَيَّةَ تَمِيمٍ بْنِ أَوْسٍ الدَّارِيِّ رَضِيَ اللهُ عَنْهُ قَالَ :أَنَّ رَسُولِ اللَّهِ صَلَّى اللَّهُ عَلَيْهِ وَسَلَّمَ ، أَنَّهُ قَالَ: "الدِّينُ النَّصِيحَةُ " ، قُلْنَا : لِمَنْ يَا رَسُولَ اللَّهِ ؟ قَالَ : " لِلَّهِ ، وَلِكِتَابِهِ ، وَلِرَسُولِهِ ، وَلأَئِمَّةِ الْمُسْلِمِينَ وَعَامَّتِهِمْ".
Абу Руқайя Тамим ибн Аус ад-Дари (р.а.) Пайғамбарымыздың (ﷺ) былай деп айтқанын риуаят етті: «Дін дегеніміз – адалдық». Біз: «Кімге қатысты, Ей Алланың Елшісі?» - деп сұрағанда, Ол (ﷺ) былай деп жауап берді: «Аллаға, оның кітабына (Құранға), Пайғамбарына (ﷺ), мұсылмандардың басшысына, және жалпы барлық мұсылмандарға қатысты» (Муслим, 55).
Яғни, адам баласы Аллаға иман келтірген кезде шынайы иман келтіруі, жіберген елшіні шынайы қабылдауы. Құранды оқып, үйреніп, онымен амал жасауы, мұсылмандардың басшысына адалдықпен қызмет етуі және жалпы мұсылмандарға қатысты кез-келген нәрседе шынайылық танытуы қажет.
Алла Тағала қасиетті құранның көптеген аятында құлшылықты бір ғана Алла үшін жасауды әмір етіп, дұшпандардың қысастығы мен қастандығына, зұлымдығы мен түрлі айла-шараларына қарамастан пейілге сызат түсірместен бәрібір шынайы болуға шақырады. Ғафир сүресінде:
فَادْعُوا اللَّهَ مُخْلِصِينَ لَهُ الدِّينَ وَلَوْ كَرِهَ الْكَافِرُونَ
«Кәпірлер жақтырмаса да, сендер ғибадаттарыңды шын жүректен Алла үшін жасап, Оған дұға етіңдер» (Ғафир сүресі, 14-аят) делінсе, тағы бір аятта:
وَيُطْعِمُونَ الطَّعَامَ عَلَىٰ حُبِّهِ مِسْكِينًا وَيَتِيمًا وَأَسِيرًا (8) إِنَّمَا نُطْعِمُكُمْ لِوَجْهِ اللَّهِ لَا نُرِيدُ مِنكُمْ جَزَاءً وَلَا شُكُورًا
«Өздері мұқтаж бола тұра, тек Алланың ғана разылығына қол жеткізу үшін кембағалдарға, жетімдер мен тұтқындарға ішіп-жегізеді. Біз сендерге тек қана Алла разылығы үшін береміз. Сендерден ақы сұрамақ түгілі алғыс алуды да күтпейміз» (Инсан сүресі, 8-9-аяттар) деу арқылы ықыласты болудың өлшемін білдіреді. Ықылыс – жүректің ісі. Алла Тағала адамның жүрегіне қарап, амалына сауап жазады. Абу Һурайрадан (р.а.) жеткен хадисте Пайғамбарымыз (ﷺ) былай деп айтқан екен:
عَنْ أَبِي هُرَيْرَةَ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: إِنَّ اللَّهَ لا يَنْظُرُ إِلَى أَجْسَادِكُمْ وَ لَا إِلَى صُوَرِكُمْ وَلَكِنْ يَنْظُرُ إِلَى قُلُوبِكُمْ وَأَعْمَالِكُمْ
«Расында, Алла Тағала сендердің дене-пішіндеріңе, сыртқы кескін келбеттеріңе қарамайды, алайда Ол, сендердің жүректеріңе және амалдарыңа қарайды».
Сондықтан да Пайғамбарымыз (ﷺ) Муаз ибн Жәбәлға (р.а.):
أَخْلِصِ العَمَلَ يُجْزِيكَ مِنْهُ قَلِيلٌ
«Өміріңде аз амал етсең де, ықылысты болсаң жеткілікті»,-деген. Ал басқа бір хадисінде «Амалдарыңызда әрқашан ықылысты болыңдар, өйткені Алла амалдардың тек қана шынайы болғанын қабылдайды»,-деп, ықылысқа ерекше мән берген.
Шынайы ықылыс жайында хазіреті Әли (р.а.) де былай деген екен: «Амалдың аздығын емес, қабыл болуын ойла».
Шынайылыққа байланысты Пайғамбарымыздың (ﷺ) сахабасы Шәдәд (р.а.) мына бір оқиғаны баяндайды: «Бір кісі исламды қабылдап, кейін хижрет жасайды. Пайғамбарымыз (ﷺ) оны сахабаларының біріне аманаттап тапсырады. Күндердің бір күнінде шайқаста түскен олжадан өзіне тиген үлесін көріп таңғалған ол Пайғамбарымызға (ﷺ): «Мен саған дүние үшін емес, мына жерімнен (кеңірдегін нұсқап) оқ қадалып шейіт болайын, сөйтіп жәннатқа барайын деп мойынсындым»,- дейді. Сонда Пайғамбарымыз (ﷺ) байсалды қалпын бұзбастан: «Егер осы айтқаның рас болса, ниетіңе шынайы болсаң, Алла Тағала сені жалғаншы етпей мұратыңа жеткізер»,- дейді. Көп уақыт өтпей бір шайқастан кейін әлгі кісі шәһид болады. Кеңірдегіне жебе қадалған өлі денесі Алла Елшісінің (ﷺ) алдына әкелінеді. Пайғамбарымыз (ﷺ): «Ол тура сөйлепті. Алла да оны растады»,- деп, оны шапанымен кебіндеп, жаназасын өзі шығарады және «Алла Тағалам, сенің бұл құлың сен үшін һижрет жасады және шәһид болды. Мен бұған куәмін»,- деп, дұға жасаған екен.
Иә, мақсатқа жетудің басты шарттарының бірі – ниеттегі шынайылық. Ниетіміз шынайы болса, Алла Тағала ниетімізге қарай береді. Алла Елшісіне (ﷺ) ерген алғашқы ислам қаһармандары Аллаға, Пайғамбарымызға (ﷺ) және исламның бұйрықтарына шынайы беріліп, бас игендіктері үшін аз мүмкіншіліктеріне қарамастан Алла олрды жетістікке жеткізіп, адам баласының ең мәртебелісі етті.
Шынайылықтың бұл дүниедегі пайдасы – адамдар арасындағы қатынастарда сенімділіктің негізі, Алла мен құл арасындағы байланыстың шынайы көрсеткіші мен ақыретте азаптан құтылудың басты шарасы.
Рахым Серік Темірбекұлы
Лисаков қалалық «Әс-Сәләм»
мешітінің бас имамы
Миләди
Хижри
