Қазақстан мұсылмандары діни басқармасының ұстанған негізгі бағыттарының бірі - оқу-ағарту саласы екендігі белгілі. Сондықтан оны жүзеге асыруда өңірдің имамдары да өздерінің лайықты үлестерін қосуда.

Бұл орайда тәжірибе алмасудың жөні бөлек. Жуырда Федоров аудандық «Жиентай қажы» мешітінің Бас имамы Руслан Маратұлы Қарабалық ауданынды болды.

Ол сапар барысында жергілікті Жастар ресурстық орталығында «Діни ағымдардың зардабы», «Ұрпақ тәрбиесі», Агротехникалық колледжінде «Құмар ойынның зардабы», «Суицид ұрпақ дерті», аудандық «Ғашура ана» мешітінде «Ғайбаттың зардабы» деген маңызды тақырыптарда насихат айтты.

Қостанай облыстық мешітінің баспасөз қызметі

Жітіқара аудандық «Ержан Тәтішев» мешітінде ерлер жамағаты арасында «Менің сүйікті Пайғамбарым» атты рухани- танымдық сайыс болып өтті.

Жарысқа қатысушылар 5 топқа бөлініп, алдын-ала арнайы дайындалған сұрақтарға билет арқылы жауап берді. Сайыс соңында жүлдегер командаларға құрмет көрсетілді.

Онда І орынға ұялы телефон, ІІ орынға 20 000 теңге, ІІІ орынға 10 000 теңге табыс етілді.

Қостанай облыстық мешітінің баспасөз қызметі

Қостанай облысының Бас имамы Бақытбек қажы Нұрғабылұлы арнайы іс-сапармен Рудный қаласына келді. Ол жергілікті «Нұр» мешітінде болып, имандылық ордасының жертөле қабатында салынып жатқан асхана құрылысымен танысты.

Содан кейін қаладағы аға буын өкілдері және мешіт қызметкерлерімен кездесіп, «Үлкенге құрмет - кішіге ізет» мәселесі қозғалған семинарға қатысты. Басқосуда мешіттің жанашыр қарияларын өткен қарттар күнімен құттықтап, сый-сияпат жасады.

Сондай-ақ, қазіргі таңдағы өзекті «Зират пен зиярат» тақырыбына байланысты мешіт ұжымы және ақсақалдар алқасымен дөңгелек үстел өткізді. Дін қайраткері онда өз ойын ортаға салып, пікір бөлісті. Қатысушылар сауалдарына нақты жауап алды. Абыз ақсақалдар бата берді.

Бас имам сапарының соңында мешіт маңындағы сауда дүңгіршегіндегі діни кітаптарды сараптаудан өткізді. Иесіне дәстүрлі дінімізді дәріптейтін имам Ағзам Абу Ханифа мазхабының аясындағы кітаптар ғана сатылуға тиіс екендігін, оның бағасын шарықтатпай, жұртшылыққа қол жетімді болуын ескертті.

Қостанай облыстық мешітінің баспасөз қызметі

Қостанай облысының Бас имамы Бахытбек қажы Тәжімбет арнайы іс-сапармен Қостанай ауданында болды. Ол алдымен, Тобыл қаласындағы «Маңдай батыр» мешітіне атбасын бұрып, киелі орындағы құрылыс және жұмыс жайымен танысты.

Содан кейін аталмыш ауданға қарасты Алтынсарин ауылындағы «Әлжан» мешітіне келіп, жүргізіліп жатқан құрылыстың барысын көзбен көріп, жергілікті ақсақалдармен кездесті.

Бұл имандылық ордасы осы жылдағы Тәуелсіздік мерекесі қарсаңында пайдалануға берілмек. Соған орай Бас имам облыстық мешіттің жанындағы Зекет және қайырымдылық қорының атынан ашылатын асханаға қажетті орындықтар мен басқа да керекті жабдықтар берілетіндігін тілге тиек етті.

Қостанай облыстық мешітінің баспасөз қызметі

Денисов аудандық «Жұма» мешітінде Мәуліт қасидалары оқылды. Сондай-ақ, жиналған жамағатқа Мұхаммед Пайғамбарымыздың мағыналы ғұмыры жөнінде уағыз айтылды.

Жұма намазынан кейін мереке құрметіне дастархан жайылып, кейінгі жастарға ғибрат боларлық пікірлер мен ойлар айтылды.

Қостанай облыстық мешітінің баспасөз қызметі

Жуырда Қостанай қалалық «Жайлаубай ата» мешітінде Мәуліт мерекесінің құрметіне 30 отбасыға қайырымдылық жасалды.

Олардың әрқайсысына 2 қаптан картоп, 8 келіден ет таратылды. Имандылық ордасының шарапатына бөленген шаңырақ иелері Шоқан қажы Әмірханов басқаратын мешіт қызметкерлері мен демеушілерге дән ризашылықтарын білдірді.

Жаны жомарт азаматтардың Мәуліт айындағы игі ниеттері мен тілектерін Алла тағала қабыл етсін.

Қостанай облыстық мешітінің баспасөз қызметі

Қостанай облысы Бейімбет Майлин ауданы Тобыл кентіндегі «Ажар» мешітінің 10 жылдығына орай жамағаттар арасында футболдан жарыс өткізілді.

Бұл сайысқа өңіріміздегі Қостанай, Рудный қалаларынан, Әйет пен Тобылдан 4 команда қатысып, бақтарын сынады.

Ойынның қорытындысы бойынша жеңімпаздар анықталды. Мәселен, 1 орынды Тобыл кентінің, 2 орынды Әйет селосының, 3 және 4 орындарды Рудный мен Қостанай шаһарларының командалары иеленді.

Жүлдегерлерге арнайы мадақтау қағаздары мен бағалы сыйлықтар табыс етілді.

Қостанай облыстық мешітінің баспасөз қызметі

Мәуліт мерекесіне орай Қостанай облыстық «Аймағамбет қажы Спанұлы» мешітінде әйел-қыздар секторы «Сағындық сені, ия Расулулла!» атты рухани кеш ұйымдастырды.

Бұл мазмұны терең іс-шараға облысқа қарасты аудан-қалалардан қыз-келіншектер, әйел жамағаты қатысты.

Мейрамның беташары қасиетті Құран оқумен басталды. Әйел-қыздар секторының меңгерушісі Жансая ұстаз «Мәуліт қандай мереке» тақырыбын жан-жақты түсіндірді.

Содан кейін «КВИЗ» интеллектуалды ойыны өткізілді. Жеңімпаздарға демеушілер атынан сыйлықтар табыс етілді.

Дастарханның берекелі де мол жайылуына «Muslima» кафесі мен «Mali.dessert» ұжымдары ұйытқы болды.

Аталмыш басқосу алғаш рет кең көлемде ұйымдастырылып отырғанына қарамастан жастарға ерекше ықпал етті.

Қалалық «Марал ишан» мешітінің ұстазы Гүлдана Жаңабайқызы және «Жайлаубай ата» мешітінің ұстазы Сәуле Мәжитқызы жоғарыда кештің жоғары деңгейде өткізілуіне белсене атсалысып, қатысқан демеушілік жасаған қыз-келіншектерге алғысын білдірді.

Қостанай облыстық мешітінің баспасөз қызметі

Жақында еліміздегі айтулы Республика күніне орай Ұзынкөл аудандық «Балықты» мешітіңде отбасы құндылықтарын дәріптейтін «Ізгі қоғам» бұрышы ашылды.

Онда жастарға тәлімдік жағы мол «Ата – ананы құрметтеу», «Үлкенге құрмет - кішіге ізет» атты уағыз-насихаттар айтылды. Сондай-ақ, 5-10 жастағы балалардың ой-өрістерін дамытуға септігін тигізетін жексенбілік дәрістер өткізіліп, дойбы мен шахмат ойындары ұйымдастырылды.

Қостанай облыстық мешітінің баспасөз қызметі

Қазіргі таңда елімізде белең алған құмарлық ойынынан жастарды сақтандыру және оның алдын алу мақсатында түрлі деңгейдегі басқосулар өткізіліп жатқаны белгілі.

Бұл орайда Қазақстан мұсылмандары діни басқармасының Қостанай өңіріндегі өкіл имамы Бахытбек қажы Тәжімбет те облыстық мешітте өскелең ұрпаққа тағылым боларлық жиынның ұйымдастырылуына ұйытқы болды. Дін қайраткері кездесуде жастардың құмарлық ойындар мен букмекерлік кеңселерден аулақ жүру керектігі, оның тигізер зияны мен зардабы жөнінде насихат айтты.

Сондай-ақ осы жүздесуде тренер – оқытушы Залим Кувамбаев қозғалып отырған мәселеге байланысты өмірден нақты мысалдар келтірді. Ел болашағы жеткіншектерді ондай пайдасы жоқ әдеттерден бойларын аулақ ұстап, денсаулық кепілі спортқа ден қоюға шақырды.

Қостанай облыстық мешітінің баспасөз қызметі