Жуырда Қостанай облыстық "Аймағамбет қажы Спанұлы" мешітінің найб имамы Нұрлан Жұмабекұлы және Тобыл қаласындағы "Маңдай батыр" мешітінің найб имамы Қапар Бекзат Қостанай ауданына қарасты Жамбыл ауылында болды.

Дін саласының білікті мамандары елді мекендегі тұрғындармен жергілікті Ақпараттық Насихат тобы аясында "Экстремизм және терроризм: түсінік, мән-маңызы, басқару тәсілі" атты тақырыпта кездесу өткізді. Жиын қазақ және орыс тілдерінде жүргізілді.

Жүздесу барысында қатысушылар тарапынан сауалдар қойылып, нақты да тиянақты жауаптар берілді.

Сарыкөл аудандық «Аққозы қажы» мешітіне қыста жағатын көмір және ағаш түсірілді. Оған имандылық ордасының жанашыры Аққозы қажының ұрпағы Шойынтай Өтемісов демеушілік етті.

Ол «Қолы ашықтың – жолы ашық» деген қағиданы берік ұстанады. Әрдайым мешіттің мұқтажына қолдау көрсетіп отырады. Оның ісіне береке беріп, табысы еселей түссін.

Қостанай облыстық мешітінің баспасөз қызметі

Жуырда Сарыкөл аудандық «Аққозы қажы» мешітінде салауат оқудан сайыс ұйымдастырылды. Оған жергілікті қыз-келіншектер қатысып, бақтарын сынады.

Сайыстың тиісті деңгейде өткізілуіне мешіттің ұстазы Фатима Асанова ұйытқы болды. «Жүйріктен жүйрік озар жарысқанда» демекші, сайыстың қорытындысында Гүлмира есімді талапкер тыңғылықты білім көрсетіп, жеңімпаз атанды. Ол 19 800 салауат оқыды.

Содан кейін қыз-келіншектерге арнайы дастархан жайылып, салауаттың маңыздылығы мен ерекшелігі жайлы уағыз айтылды. Жарысқа жергілікті кәсіпкерлер демеушілік жасады.

Қостанай облыстық мешітінің баспасөз қызметі

Қостанай облыстық «Аймағамбет қажы Спанұлы» мешітінің жанындағы Зекет және қайырымдылық қорының қызметкерлері өткен тамыз айында да ұйымшылдықтың үлгісін көрсетті.

Өңір бойынша 45 іс-шара ұйымдастырылды. Онда 1326 отбасы қамтылып, қайырымдылық көмегі көрсетілді. Осы мақсатқа 17 960 881 теңге жұмсалды Облыстық мешіттің найб имамы, жоғарыда аталған қордың жетекшісі Бақытжан қажы Икрамның айтуына қарағанда, демеушілер мен жүрегі жомарт жандар белсенділік танытқан.

«Алтын алма, алғыс ал» деген қағиданы берік ұстанған жанашыр азаматтарға Алланың нұры жауа берсін!

Қостанай облыстық мешітінің баспасөз қызметі

Қазақстан мұсылмандары діни басқармасының төрағасы, Бас мүфти Наурызбай қажы Тағанұлының бұйрығымен Қостанай облысындағы бірқатар мешіттерге жаңа Бас және найб имамдар тағайындалды.

Мәселен, Руслан Маратұлы Жиенбаев Федоров аудандық «Жиентай қажы» мешітіне Бас имамдық қызметке кірісті. Ол осы уақытқа дейін Алтынсарин аудандық «Алдиярұлы Жанұзақ» мешітіне басшылық етті.

Ал, «Нұр-Мүбарак» Египет ислам мәдениеті университетінің түлегі Аңсаған Нұрлыбекұлы Абдрахман Алтынсарин аудандық «Алдиярұлы Жанұзақ» мешітіне Бас имам болып бекітілді.

Сондай-ақ, жоғарыда аталған университеттің түлегі Әділет Ордабекұлы Қожан Алтынсарин аудандық «Алдиярұлы Жанұзақ», Ерлан Серікболатұлы Тілегенов Федоров аудандық «Жиентай қажы», Тобыл қалалық «Маңдай батыр» мешітінде ұстаздық қызмет атқарған Думан Сәндібекұлы Сағымбаев Амангелді аудандық «Сатыбалды ишан» мешіттеріне найб имам болып тағайындалды.

Қостанай облыстық мешітінің баспасөз қызметі

Жуырда Қостанай облыстық «Аймағамбет қажы Спанұлы» мешітінің найб имамы Нұрлан Жұмабекұлы және Тобыл қаласындағы «Маңдай батыр» мешітінің Бас имамы Дархан Манарбекұлы Қостанай аудандық ветеринарлық станциясы ұжымы қызметкерлерімен кездесті.

Онда жергілікті ақпараттық насихат аясында «Зайырлы қоғам мен жоғары руханият – бірлік пен келісім кепілі» атты тақырып қозғалды. Жүздесу қазақ және орыс тілдерінде өткізілді.

Дін қызметкерлері қатысушыларлың қойған сауалдарына нақты жауап берді.

Қостанай облыстық мешітінің баспасөз қызметі

Қостанай облысы Амангелді селосында батыр бабамыз Амангелді Үдербайұлының туғанына 150 жыл толуына байланысты танымдық-тағылымдық жағынан мәні жоғары іс-шаралар ұйымдастырылды.

Мәселен, аудан орталығындағы А. Имановтың ескерткіші орнатылған алаңға облыс әкімі Құмар Ақсақалов бастаған зиялы қауым өкілдері, алыс-жақыннан келген қонақтар бас қосты. Онда облыстың Бас имамы Бахытбек қажы Тәжімбет батыр бабамыздың аруағына бағыштап құран оқыды.

Қостанай облыстық мешітінің баспасөз қызметі

Бүгін Қостанай қаласында ҚМДБ «Зекет және қайырымдылық» қорының «Ел үлесі – пәтерге» жобасы аясында төрт бірдей отбасы баспаналы болды.

Өңірге жұмыс сапарымен барған Бас мүфти Наурызбай қажы Тағанұлы баспана иелерін құттықтап, қуанышқа ортақтасты.

Осылайша республика бойынша аталмыш қайырымдылық акциясының 673-баспана кілті берілді.

Бүгін Қостанай облыстық «Аймағанбет қажы Спанұлы» мешіті жанынан жаңадан салынған асхана ашылды. Ресми ашылуына ҚМДБ Төрағасы, Бас мүфти Наурызбай қажы Тағанұлы арнайы қатысты.

«Асымыздың адалдығы біздің құлшылығымызға, дұғамызға әсер етеді. Сондықтан адал ас ішу өте маңызды. Бұл тұрғыда мешіттің өз асханасының болуы тиімді. Мешіт жанынан асхана ашылуы жергілікті жамағатқа да пайдасын тигізері анық. Осы іске демеу білдірген азаматтарға Алла разы болсын» деді Бас мүфти.

Асхананың ашылуына орай өңірде түрлі дертке шалдыққан 100 балаға Бас мүфти атынан дастархан жайылып, Наурызбай қажы Тағанұлы ізгі ниетін жеткізді.

«Осында сынаққа ұшырап, түрлі дертпен күресіп жүрген балалармен кездесудегі мақсатымыз бір мезгіл көңілін аулап, қуаныш сыйлау. Алла Тағала олардың дертіне шипа берсін. Айығып, ата-аналарының көз-қуанышы болып өссін. Балалардың қуанышы біздің де қуанышымыз. Осы балалардың ертеңгі тағдыры жарқын, болашақта бақытты ғұмыр кешсін» деді ҚМДБ Төрағасы.

Мешіт асханасы мен мүфтият жатақханасына үлес қосқан демеуші бір топ азаматқа Бас мүфти атынан Алғыс хат берілді.

Айта кетейік, асхана 450 адамға арналған. Сонымен қатар облыстық мешіттің ерлерге арналған намаз залы кеңейтілді. Жаңадан ашылған қосымша намаз оқитын орында 550 адам құлшылығын өтей алады.

Бүгін Қостанай облыстық Аймағанбет қажы Спанұлы мешіті жанынан мүфтияттың студенттерге арналған қайырымдылық негізде салынған жатақханасы ашылды. Салтанатты шараға Қазақстан мұсылмандары діни басқармасының төрағасы, Бас мүфти Наурызбай қажы Тағанұлы мен жергілікті ақсақалдар арнайы қатысты.

Алғашқы болып сөз алған Бас мүфти Қостанай халқын қуанышпен құттықтап, ізгі тілегін жеткізді.

«ҚМДБ жұмысының басты бағытының бірі діни оқу-ағарту, сауат ашу болса, екінші жағынан біз қайырымдылық жұмыстарын да тыс қалдырған емеспіз. Жыл басында бағдарлық баяндамамда облыс имамдарына бірқатар тапсырма жүктедім. Соның ішінде биыл аймақтарда қайырымдылық негізде мүфтият жатақханаларын ашу тапсырылды. Білесіздер, қазіргі таңда жоғары оқу орындары жанындағы жатақханаларда орын тапшылығы байқалады. Одан бөлек әлеуметтік аз қамтылған отбасылардың балалары үлкен қалаларда қиналып, пәтер іздеп жүреді. Осындай әлеуметтік мәселелерді ескере отырып мүмкіндігінше қайырымдылық негізде студенттерге арналған жатын орындары бар ғимарат салу, ашу тапсырылды. Алла Тағала осы іске тамшыдай болсын үлес қосқан баршаңызға сауаптан жазсын» деді Бас мүфти.

Жаңа нысанды таныстырған облыс имамының сөзінше мешіт жанындағы жатақханада оқу корпусы болады. Қазіргі таңда 30 бала жатып оқитындай мүмкіндік бар. Келесі жылы 2 қабатты нысанның құрылысы бітсе, оған 70 бала қамтылады. Жалпы алғанда 100 студент жақсылығын көргелі отыр деді облыс имамы Бақытбек Нұрғабылұлы.

Жатақхананың ашылуына келген облыс ақсақалдары да қуанышқа ортақтасып, батасын берді. Кейін қонақтар қайырымдылық негізде салынған жатақхананы аралап, кітапхана, асхана, жатын орындары мен тазалық бөлмелерін аралап толық танысты.