Қасиетті Рамазан айында Жітіқара аудандық «Ержан Тәтішев» мешітінде «Рамазан Құран түскен ай» атты Құран Кәрімнің 30 парасын жатқа айтудан байқау ұйымдастырылды.

Бұл сайысқа 11 адам қатысты. Қатысушылардың ең жасы 12, ең үлкені 51 жаста. Әділқазылар алқасының шешімі бойынша 1 орынды Салауат Өтепбергенов (100 000 теңге), ІІ орынды Тимур Баймұхамедов (50 000 теңге), ІІІ орынды Дияр Бисембаев (30 000 теңге), ІV орынды Ахмад Тлекешов ( 20 000 теңге) иеленді.

Қостанай облыстық мешітінің баспасөз қызметі

Арқалық қалалық «Мухтасиф Әлмұхаммед» мешітінің ұйытқы болуымен шәкірттер арасында “Рамазан Құран түскен ай” атты интеллектуалды сайыс өткізілді.

Аталған Құран жарысына 15 талапкер қатысты. Онда Құранды жатқа және жүзінен оқу, тәжуит ережелері мен оның тарихына қатысты сұрақтар қойылды. Үш түрлі тапсырма берілді.

Оған мешіттің Бас имамы Балғабай Оразханұлы, ұстаз Арлан Бауыржанұлы және Түркия елінен келген қари Фатих Ерен әділқазылық етті. Сайыс қорытындысы бойынша жеңімпаздарға Алғыс хат пен ақшалай сыйлық табыс етілді.

Қостанай облыстық мешітінің баспасөз қызметі

Қасиетті Рамазан айында облыстық «Аймағанбет қажы Спанұлы» мешітінде өңірдегі «Зекет және қайырымдылық қоры» мен «Әйел-қыздар секторының» ұйымдастыруымен «Рамазан тәттілері» қайырымдылық іс-шарасы өткізілді.

Оған Қостанай қаласында тұратын 100 ге жуық балалар бас қосты. Шара барысында балдырғандар мен бүлдіршіндерге концерттік бағдарлаа көрсетілді.

Наиб имам Азамат Серікбайұлы мен ұстаз Жансая Салауатқызы ораза туралы уағыз-насихат айтты. Жиналған балаларға тәттілер мен сыйлықтар табыс етілді.

Қостанай облыстық мешітінің баспасөз қызметі

Қостанай қалалық “Жайлаубай ата” мешіті және “Халқыма көмек-Қостанай” ұйымының қызметкерлері Рудный шаһарындағы жетім балалар үйіне барды.

Онда қасиетті Рамазан айының құрметіне ауызашар дастарқаны жайылды. Наиб имам Казбек Көшеров жасөспірімдерге Оразаның қадыр қасиетін түсіндірді. Сый-сияпат жасалды.

Балалардың жүзінен қуаныштың нышаны айқын сезіліп, дән риза болды.

Қостанай облыстық мешітінің баспасөз қызметі

Жақында Рудный қалалық «Нұр» мешітінде Рамазан айының құрметіне Құран жарысы өткізілді. Ол әйел-қыздар жамағаты арасында ұйымдастырылды. Сайысқа оннан астам қыз балалар қатысты.

Перизат ұстаздың бастамасымен имандылық ордасының шәкірттері бақ сынасты. Олар Құран оқуда білімдері мен шеберліктерін көрсетті.

Қазылар алқасының құрамында аталмыш мешіттің Бас имамы Серік Темірбекұлы және Түркия елінен келген қари Рамазан Етер болды.

Жарыс нәтижесі бойынша 1 орынды Гүлімхан Умарова, 2 орынды Ардақ Жолдыбаева, 3 орынды Аиша Данияр иеленді.

Соңында Перизат ұстаз барлық қатысушыларға алғысын білдіріп, алдағы уақытта да Құран ілімінде биік жетістіктерге жетулеріне тілектестігін білдірді.

Қостанай облыстық мешітінің баспасөз қызметі

Қасиетті Рамазан айында Лисаков қалалық “Әбдіхаим Саламатұлы” мешітінің ұйымдастыруымен “Рамазан тәттісі” атты қайырымдылық іс-шарасы өтті.

Игі шараның басты мақсаты – қасиетті айда балаларға қуаныш сыйлап, олардың жүрегіне мейірім мен ізгіліктің дәнін егу. Осы мақсатта ұйымдастырылған іс-шара барысында 50 балаға арнайы дайындалған “Рамазан тәттісі” үлестірілді. Бүлдіршіндерге түрлі тәттілер мен сыйлықтар тарту етіліп, мерекелік көңіл-күй сыйланды.

Аталған қайырымдылық шарасы арқылы қоғамдағы бауырмалдық пен бірлік құндылықтары насихатталып, жас ұрпаққа жақсылық жасаудың маңызы көрсетілді.

Қасиетті Рамазан айында жасалған әрбір қайырымдылық пен игі іс – үлкен сауап. Осындай ізгі бастамалардың алдағы уақытта да жалғасын табатынына сенім мол.

Қостанай облыстық мешітінің баспасөз қызметі

Қазақстан мұсылмандары діни басқармасы Қостанай облысы өкілдігінің ұйымдастыруымен облыстық «Аймағанбет қажы Спанұлы » мешітінде «Muftiyat» баспасынан шыққан кітап жәрмеңкесі өткізілді.

Онда жұма намазына жиналған жамағатқа арнайы сөрелер қойылып, баспа өнімдері көпшілік назарына ұсынылды. Жәрмеңкеде діни-танымдық, рухани-тәрбие, отбасылық құндылықтар және ұлттық дәстүрлер тақырыбындағы түрлі кітаптар мен әдістемелік құралдар қойылды.

Келушілер өздеріне қажетті әдебиеттерді қолжетімді бағамен сатып алды. Сөйтіп «Muftiyat» баспасының жаңа басылымдарымен танысу мүмкіндігіне ие болды.

Мұндай жәрмеңкелерді ұйымдастырудағы негізгі мақсат – Қостанай өңірі тұрғындарының діни сауатын арттыру, имандылыққа баулитын отандық басылымдарды насихаттау және кітап оқу мәдениетін қалыптастыру.

Қостанай облыстық мешітінің баспасөз қызметі

Еліміздегі мешіттерде қарапайым болса да адал еңбек етіп жатқан қызметкерлерге құрмет көрсету ҚМДБ-ның Төрағасы, Бас мүфти Наурызбай қажы Тағанұлының тұрақты назарында. Міне, осы, үрдісті басшылыққа алған Қостанай өңіріндегі өкілдік те қасиетті Рамазан айында ұзақ жылдар бойы өз саласында аянбай жұмыс істеген кісілерге құрмет көрсетті.

Облыстық «Аймағанбет қажы Спанұлы» мешітінде жұма намазы алдында марапаттау рәсімі өтті. Онда Бас имам Бектұрсын қажы Торғайбайұлы сөз алып, барша жиналған қауымды Рамазан айымен шын жүректен құттықтады. Тіршілікте адамдар арасындағы сыйластықтың шыңы адамгершілік, оның ішінде бір-біріне ізгілік дәнін сеуіп, қуанышқа бөлеу екендігін тебіреніспен айтты. Бұл үлкен сауап болып табылатындығын тілге тиек етті.

«Жақсының жақсылығын айт нұры тасысын» демекші, төрт қызметкерге Ұмраға жолдаманы табыс етті. Олардың қатарында Әулиекөл аудандық «Әмит ишан» мешітінің тазалықшы Гүлжаухар Әнесқызы, облыстық мешіттің шаруашылық меңгерушісі Нұрлан Нұртайұлы, күзетші Жеңіс Рамазанұлы, ұстаз Саидаббас Сайдаламұлы секілді мамандар бар.

Олар алдағы уақытта қасиетті орынға діни басқармаға қарасты «Tawaf Travel» қажылық компаниясы арқылы баратын болады.

Жолдамаға өңіріміздегі кәсіпкерлер мен жамағат демеушілік етті. Алла тағала мешіт жанашырларының шаңырақтары мен кәсіптеріне береке берсін.

Қостанай облыстық мешітінің баспасөз қызметі

ҚМДБ-ның Қостанай облысы бойынша Зекет және қайырымдылық қорының қолдауымен «Ел үлесі – пәтерге» қайырымдылық жобасы аясында Бейімбет Майлин ауданының тұрғынына жаңа баспана кілті табысталды.

Аталған баспана бұрын пәтер жалдап тұрып келген, жағдайы төмен, созылмалы науқасқа шалдыққан, екі баланы жалғыз тәрбиелеп отырған анаға берілді. Бұл игі іс отбасының тұрмыс жағдайын жақсартып, балалардың болашағына үміт сыйлады.

Салтанатты сәтте Қостанай облысы бойынша Зекет және қайырымдылық бағытына жауапты Бақытжан Икрамұлы сөз сөйлеп, жаңа қоныс иелеріне ізгі тілегін білдіріп, батасын берді.

Қасиетті Рамазан айында жасалған мұндай игі бастамалар – қоғамдағы бірлік пен жанашырлықтың айқын көрінісі. Жиналған жұрт жаңа үй иелеріне қуаныш тілеп, ақ баталарын айтты.

Айта кетейік, «Ел үлесі – пәтерге» жобасы аясында осы уақытқа дейін еліміз бойынша 891 баспана берілген. Оның 50-і Қостанай облысының тұрғындарына табысталған.

Қостанай облыстық мешітінің баспасөз қызметі

Қостанай қалалық “Жайлаубай ата” мешітінің наиб имамы Казбек Кошеров Қостанай инженерлік-экономикалық университетіне қарасты колледжінде студенттермен кездесу өткізді.

Онда ол «Рамазан - қасиетті ай» тақырыбында әңгіме өрбітті. Ислам діні адам баласын имандылыққа, мейірімділікке, қайырымдылыққа, төзімділікке баулитындығын айтты.

Сондай-ақ, үлкенді сыйлау, кішіге ізет көрсету, адамгершілік қасиетті жоғары ұстау әрбір мұсылманның негізгі міндеті екеніндігіне тоқталды.

Қостанай облыстық мешітінің баспасөз қызметі